Tanan nga Akses

Ni David A. Edwards

Mga Magasin sa Simbahan

Si Jesukristo makahatag nimo og akses nga labaw pa sa imong mahunahunaan.

Tan-awa kining mga paghulagway. Unsa ang komon kanila?

Sa usa ka pulong, kini nga mga litrato tanan mahitungod sa akses. Ang akses nagpasabot nga kita makahimo o gitugotan nga mosulod sa usa ka dapit, moduol sa usa ka tawo o usa ka butang, o mogamit o makabenepisyo gikan sa usa ka butang.

Bag-ohay lang, ang mga lider sa Simbahan daghan og gitudlo mahitungod sa akses. Mihimo sila og daghang pahayag sama niining usa nga gikan ni Presidente Russell M. Nelson:

Busa, sutaon nato og maayo kon unsa ang gipasabot sa akses diha sa gipahiuli nga ebanghelyo ni Jesukristo.

Si Jesukristo Naghatag og Akses

Pinaagi lamang ni Jesukristo nga kita makakuha og akses sa labing dako nga mga panalangin niini nga kinabuhi ug sa sunod. Ang propeta nga si Jacob migamit og imahe nga naghulagway sa tahas sa Manluluwas sa paghatag og akses:

“Ang dalan sa tawo pig-ot, apan anaa kini sa tul-id nga agianan sa iyang atubangan, ug ang magbalantay sa ganghaan mao ang Usa nga Balaan sa Israel; ug wala siya magbutang og sulugoon didto; ug walay laing agianan gawas diha sa ganghaan” (2 Nephi 9:41).

Unsa kini nga ganghaan? Si propeta Nephi mipasabot:

“Ang ganghaan nga kinahanglan ninyong agian mao ang paghinulsol ug bunyag pinaagi sa tubig; ug dayon mosunod ang kapasayloan sa inyong mga sala pinaagi sa kalayo ug sa Espiritu Santo” (2 Nephi 31:17).

Ug unsa ang anaa lapas sa ganghaan? Unsa ang gihatag ni Jesukristo nga akses nganhi kanato? Si Nephi miingon:

“Dayon maanaa na kamo sa higpit ug pig-ot nga dalan padulong sa kinabuhing dayon” (2 Nephi 31:18).

Moduol kita sa Manluluwas ug mosulod niini nga agianan pinaagi sa:

Hugot nga Pagtuo Kaniya.
Paghinulsol.
Mga ordinansa ug mga pakigsaad.
Pagkamasulundon.
Paglahutay hangtod sa kataposan.

Ang kinabuhing dayon mao ang sa kataposan gihatag ni Jesukristo kanato nga akses. Apan aduna usab daghang panalangin nga Iyang giablihan alang kanato niini nga kinabuhi, samtang kita anaa sa agianan.

Lain-laing Ang-ang sa Akses ngadto sa Gahom sa Dios

Ang Langitnong Amahan ganahan nga mohatag og kahingpitan sa mga panalangin ngadto sa tanan, apan Siya dili mopugos niini kanato. Unsa ang mga panalangin nga atong madawat nakadepende sa kon asa nga ang-ang sa akses ang atong gitinguha ug andam nga mosarang.

Ubang Butang nga ang Bisan Kinsa Adunay Akses

Sama sa pampublikong parke, adunay pipila ka panalangin gikan sa Dios nga ang tanan adunay akses—walay espesyal nga pagtugot nga gikinahanglan.

Pananglitan, ang tanan adunay akses sa:

Gugma sa Dios.
Ang Kahayag ni Kristo.
Pag-ampo.
Ang pagsaksi sa Espiritu Santo.
Pagtuon sa kasulatan.
Pagsimba.

Ubang Butang nga Maakses Lang pinaagi sa mga Pakigsaad

Sama sa usa ka kalihokan diin nagkinahanglan ka og tiket, adunay mga panalangin nga ang pipila ka tawo adunay espesyal nga akses tungod kay gusto nila kini ug gibuhat ang unsay kinahanglan aron makuha kini.

Kadtong mohimo ug motuman sa mga pakigsaad sa bunyag makakuha og akses sa mga panalangin nga sama sa:

Pagkalimpyo pinaagi sa Espiritu Santo ug kapasayloan sa mga sala.
Ang gasa sa Espiritu Santo ug Iyang makanunayon nga pag-uban.
Mga Gasa sa Espiritu.
Ang pagtambong sa templo alang sa mga pagbunyag ug kompirmasyon (alang niadtong mag-12 o mas magulang pa).
Patriyarkal nga mga panalangin.
Mga calling sa pagserbisyo.

Dugang nga Akses pinaagi sa Templo

Samtang magpadayon ka diha sa dalan sa pakigsaad, makapahigayon ka og mga ordinansa diha sa templo ug maghimo og mga pakigsaad didto. Si Presidente Nelson mitudlo og gamhanang mga kamatuoran mahitungod niini:

Pinaagi sa pagsimba sa templo ug sa mga pakigsaad sa templo, ikaw makadawat og:

Usa ka kahingpitan sa Espiritu Santo.
Mga anghel nga mobantay kanimo.
Mga tubag sa pag-ampo.
Personal nga pagpadayag.
Mas dako nga pagtuo, kalig-on, ug kahupayan.
Dugang nga kahibalo ug gahom.

Unsay Kahulogan Niini alang Kaninyo?

Pinaagi sa mga pakigsaad, ikaw maadunay kahigayonan nga makaakses sa usa ka espesyal gayod kaayo nga butang. Si Presidente Nelson mitudlo:

Sa higayon nga ikaw mohimo og mga pakigsaad, ikaw mosulod sa usa ka espesyal nga relasyon uban sa Dios ug mahimong usa sa Iyang katawhan. Dayon maanindot nga mga butang ang mahitabo:

Samtang maningkamot ka sa pagtuman sa imong mga pakigsaad, ang Dios:

Mopanalangin kanimo og sobra nga gugma ug kaluoy.
Mopasaylo kanimo kon ikaw maghinulsol.
Motabang kanimo nga makit-an og usab ang imong dalan pabalik Kaniya kon ikaw mahisalaag.
Dili gayod kapoyon sa Iyang mga paningkamot sa pagtabang kanimo.
Dili mahutdan sa maluluy-ong pailob diha kanimo.
Mobuhat sa tanang butang kutob sa Iyang mahimo, nga walay paglapas sa imong kabubut-on, aron matabangan ka nga motuman sa imong mga pakigsaad.

Si Presidente Nelson mitudlo usab:

Unsa nga matang kini sa gahom?

Pananglitan, ikaw maadunay gahom nga:

Makabaton og kalinaw ug usa ka espesyal nga matang sa pahulay.
Mabuntog ang kalibotan ug malikayan ang makanunayong impluwensiya niini.
Magkat-on.
Maghinulsol ug magpakabalaan.
Makakaplag og paglaom, kahupayan, ug kalipay samtang imong atubangon ang mga hagit sa kinabuhi.
Maprotektahan gikan sa impluwensiya sa kaaway.

Ang Labing Dako nga Akses

Mao nga, unsa nga matang sa akses ang imong gusto? Ug unsay andam nimong buhaton aron maangkon kini?

Gusto sa Langitnong Amahan nga makabaton og mas suod nga relasyon nganha kanimo ug mohatag nimo og dugang ug dugang pa nga akses sa Iyang gahom. Padayon sa dalan sa pakigsaad, ug Iya kining ihatag kanimo. Higugmaa Siya uban sa tibuok nimong kasingkasing. Motuman. Mohinulsol. Moambit sa sakramento. Moadto sa templo.

Sa umaabot nga adlaw, samtang nagtuman ka sa imong mga pakigsaad sa templo, si Jesukristo makahatag kanimo sa labing dako nga akses ngadto sa Amahan—makabalik ngadto Kaniya, mahimong sama Kaniya, ug makadawat sa “tanan nga anaa sa Amahan” (Doktrina ug mga Pakigsaad 84:38).

Sa pagkatinuod Siya mohatag nimo sa tanan nga akses.