Usa ka Leksiyon sa Gugma sa Dios
Ang Langitnong Amahan motugot nga makasinati kita og mga hagit aron kita mas molig-on. Wala kana magpasabot nga Siya wala mahigugma nato.
Mga litrato pinaagi ni Niel Kabiling
Ang akademiko importante kaayo nako. Hilabihan ang akong paninguha nga makakuha og nindot nga mga grado, mao nga naningkamot ko og maayo kutob sa mahimo. Apan usahay mapakyas ko.
Kausa, wala ko makasulod sa mga klase tungod kay duna koy kontest sa art sa akong eskwelahan. Daghan kaayo kog leksiyon nga wala maapili. Sa dihang mibalik na ko, naglisod ko sa pagsabot sa mga diskusyon sa klase. Ang akong grado nagsugod sa pagkunhod.
Ang pagkadili makasabot sa mga leksiyon nakapasagmuyo nako, ug misugod ko sa pagkwestiyon sa bili sa akong kaugalingon. Mibati ko nga dili ko ingon ka maayo tungod sa gagmay nakong mga iskor, ug nagsige ko og hilak. Wala ko kahibalo unsa ang buhaton.
Sa kataposan, nag-ampo ko ug mihangyo sa Langitnong Amahan sa pagtabang nako sa pagdawat ug sa pagbuntog sa mga pagsulay.
Ang Dios Nahibalo sa Akong mga Panglimbasog
Human sa akong pag-ampo, nakadawat ko og text gikan sa akong higala nga si Shiella. “Hoy, OK ra ka?” nangutana siya. “Kumusta na ka?”
Gisultihan nako si Shiella nga naglisod ko. Lahi ang iyang eskwelahan, apan pareha kami og grado, mao nga managsama ang among mga leksiyon. Gitabangan ko niya nga makasabot sa mga leksiyon nga wala nako maapili.
Nasayod ko nga ang Langitnong Amahan nakakita nako nga nasakitan, ug gipadala Niya si Shiella sa paghupay nako. Kini nakapaamgo nako nga ang Langitnong Amahan mogamit sa ubang mga tawo aron ipakita nga Siya nagpakabana gayod nato.
Kini usab nagtudlo nako nga dili kinahanglan nga magmalamposon ko sa tanang butang. Kon kita adunay mga hagit, ang Langitnong Amahan makatabang nga kita mahimong mas lig-on. Wala kana magpasabot nga Siya wala mahigugma nato. Akong nakat-onan nga mas maayo nga mosulay sa usa ka butang ug mapakyas kaysa walay buhaton, tungod kay makakat-on ko gikan sa kapakyasan. Karon, malipayon ko sa akong mga iskor tungod kay gitabangan ko sa Langitnong Amahan sa pagbuntog niana nga pagsulay.
Usa ka Instrumento diha sa Iyang mga Kamot
Sama nako, daghang batan-on sa akong ward ang naglisod sa akademiko. Ang uban dili na aktibo tungod kay sila adunay mga proyekto nga himoon sa grupo o mga kalihokan sa eskwelahan nga nakaeskedyul ma-Dominggo, o dugay sila makatulog sa paghimo og homework ug dili mosimba aron makapahulay.
Usa ko ka lider sa akong klase sa Young Women, mao nga sa matag una ug ikaupat nga Dominggo, mokuyog ko sa mga misyonaryo o sa ubang kabatan-onan aron mangalagad sa dili kaayo aktibo nga kabatan-onan. Mohatag ko sa akong pagpamatuod ngadto nila nga ang pagpaduol ngadto sa Langitnong Amahan ug ni Jesukristo mas mopalig-on nato ug motabang nato sa pagbuntog sa atong mga pagsulay. Ang pagbaliwala Kanila dili mao ang solusyon.
Usa ka higayon, nangalagad kami ngadto sa usa ka batan-ong lalaki. Gidapit namo siya nga maoy mohatag og panapos nga pag-ampo sa pagtapos sa pagbisita. Sa iyang pag-ampo, nagpasalamat siya sa Langitnong Amahan alang sa among pagbisita. Malipayon ug mapasalamaton kaayo siya nga migahin kami og panahon sa pagpangumusta niya.
Gibati usab nako ang pagkamapasalamaton, ug sa akong mga pagbati sa bili sa kaugalingon. Akong naamgohan nga ang ubang mga tawo nalipay sa akong presensya, ug makatabang ko nila. Mahimo kong usa ka instrumento diha sa mga kamot sa Dios aron ipakita sa uban nga wala sila mag-inusara.
He Healed Them All [Giayo Niya Silang Tanan], ni Michael Malm
Ang Kapakyasan Dili Maoy Motino sa Akong Pagkatawo
Tingali nasagmuyo kamo tungod kay napakyas kamo sa usa ka butang, apan ang kapakyasan wala magpasabot nga dili kamo ingon ka maayo. Ang Langitnong Amahan ug si Jesukristo makatabang ninyo sa pagtubo nga mas lig-on sa pisikal, sa espirituwal, ug sa emosyonal nga paagi.
Sa higayon nga mobati kita nga nag-inusara, si Jesukristo anaa. Kita dili kanunay nga makakita Kaniya, ug usahay dili kita mobati nga Siya anaa, apan anaa gayod Siya. Bisan kon kamo mibati nga layo Kaniya, si Jesukristo andam nga modawat ninyo uban sa bukas nga mga bukton. Sa higayon nga kamo moduol ngadto Kaniya, anaa Siya, ug Siya modawat ninyo kon kinsa kamo ug mobayaw ninyo.
Diha sa pag-ampo, kamo makasulti sa Langitnong Amahan sa inyong gibati ug mangayo og tabang. Ako nasayod nga Siya motubag niadto nga mga pag-ampo. Sa higayon nga mag-ampo ko, mobati ko nga gihupay, nga murag adunay usa ka tawo nga naggakos nako. Mopabati kini kanako nga makahimo ko sa bisan unsang butang. Makahimo ko sa tanang butang uban Kaniya.
Ang tagsulat nagpuyo sa Cebu, Philippines.