Mobarog diha sa Labing Balaan nga Dapit

Isip mga lider sa Simbahan, kanunay kami nga mapangutana, “Nganong nagtukod man kamo og daghan kaayong templo?” Nahinumdom ba kamo sa tubag ni Presidente Russell M. Nelson niana nga pangutana sa iyang pakigpulong niadtong Oktubre 2024 nga kinatibuk-ang komperensiya? Miingon siya nga nagtukod kami og mga templo sa ingon nga gipaspason nga wala pa mahitabo sukad “tungod ang Ginoo nagsugo kanato sa pagbuhat sa ingon.”

Usa ka importante nga rason alang niini mao nga ang mga templo gi-set apart sa gahom sa pagkapari aron ang mga pakigsaad nga atong himoon ug ang mga ordinansa nga atong madawat didto pagabugkoson dinhi sa yuta ug sa langit (tan-awa sa Mateo 16:19). Kon atong sundon ang instruksiyon sa Ginoo sa pagtukod og mga templo sa tibuok kalibotan, ang gahom ug mga panalangin nga gisangkap sa mga templo moabot ngadto sa mas daghang anak sa Dios sa duha ka habig sa tabil.

Si Presidente Nelson mitudlo nga “ang matag tawo nga mohimo og mga pakigsaad diha sa mga bunyaganan ug diha sa mga templo—ug motuman niini—nakapadugang og agianan ngadto sa gahom ni Jesukristo.”

Kini nga gahom gisaad atol sa pagpahinungod sa Templo sa Kirtland. Si Propeta Joseph Smith nag-ampo nga “ang tanang katawhan nga mosulod … sa pultahan sa balay sa Ginoo mobati sa gahom [sa Ginoo]” ug “molakaw … Inubanan sa [Iyang] gahom” (Doktrina ug mga Pakigsaad 109:13, 22).

Nagpadayon kini karon. Akong dungog nga gikauban si Presidente Nelson alang sa pagpahinungod pag-usab sa Manti Utah Temple niadtong Abril 2024, diin nag-ampo siya nga unta atong masabtan “ang gahom diin [kita] gitugahan [diha sa templo].”

Si Presidente Emily Belle Freeman, ang Kinatibuk-ang Presidente sa Young Women, nga akong kaila sukad niadtong nagserbisyo ko isip iyang bishop sa usa ka unibersidad nga ward mga katuigan ang milabay, mitudlo nga si Jesukristo “mobayaw nato ngadto sa kon asa man Siya ug, diha sa proseso, mopahimo nato nga mahisama kon unsa Siya” samtang kita “mosinati sa mas lawom nga relasyon sa pakigsaad uban Niya” pinaagi sa templo.

Ang mga ordinansa ug mga pakigsaad makapaduol nato ngadto sa Ginoo, mobugkos nato ngadto Kaniya, ug makahatag nato og mas dakong akses ngadto sa Iyang gahom ug mga panalangin, nga gikinahanglan natong tanan. Si Presidente Nelson mitudlo nga “Si Jesukristo … , ug Siya lamang, ang [adunay] gahom sa pagtabang ninyo sa pagbuntog sa mga tentasyon niini nga kalibotan.”

Wala madugay human ko matawag sa Seventy, gisangonan ko nga moserbisyo sa England. Si Sister Rasband ug ako midala sa among duha ka mas manghod nga mga anak, si Shannon ug Christian, uban namo. Naamgohan dayon namo nga dako kining sakripisyo alang nila, ilabi na ni Christian. Siya 17 anyos ug naghinamhinam sa iyang senior year sa high school kauban sa iyang mga higala ug sa mga kompetisyon sa dula, nga karon dili na niya mahimo.

Sa pagtabang ni Shannon ug ni Christian nga maka-adjust niining bag-ong dapit, nakadesisyon kami nga moadto sa Preston England Temple aron mopahigayon og mga bunyag alang sa mga patay. Wala namo kini mahimo sa among bisi nga kinabuhi niadtong naa pa kami sa among panimalay. Sa dihang misulod na kami sa bunyaganan sa templo, ang tanan nausab.

Human sa pagpahigayon sa mga bunyag, giagbayan ko ni Christian ug sinserong nangutana, “Pa, nganong wala man kita magbuhat niini kaniadto?”

Nakakat-on ko og importante nga leksiyon nianang adlawa. Ang templo nakapausab sa among mga panglantaw, naghatag og kalinaw ug kalipay, ug espirituhanong mibayaw namo labaw pa sa mahimo sa bisan unsa nga torneyo sa football o dula sa basketball. Kon kamo adunay kahigayonan sa pagtambong sa templo, ako moawhag ninyo nga moadto kanunay kutob sa mahimo. Pagdala og ngalan sa inyong mga katigulangan ug ipahigayon ang mga bunyag ug kompirmasyon alang nila. Ang inyong mga kasinatian sa templo maghatag ninyo og kalinaw ug kalipay ug sa uban dinhi ug sa kinabuhi nga moabot.

Kon ang inyong mga ginikanan, mga apohan, o mga igsoon nakaadto na sa templo, dapiton ko kamo sa pag-obserbar kon giunsa nila sa paghatag og bili ang templo pinaagi sa ilang pamatasan ug mga gibuhat—sama sa akong gihimo sa akong mga ginikanan. Pangita og mga oportunidad sa pagpakig-istorya sa inyong pamilya, inyong bishop, ug sa ubang mga lider mahitungod sa templo. Motabang sila ninyo.

Dapiton ko usab kamo nga kanunayng motutok sa Ginoo ug magmahimong takos. Unya sama sa gisulti sa akong minahal nga higala, si Presidente M. Russell Ballard (1928–2023), “Kamo mahimong magmapasalamaton kon moabot ang panahon alang kaninyo nga motambong sa templo ug kamo andam na sa pagdawat sa tanan nga kahibulongan nga mga saad ug mga panalangin nga gitinguha sa Ginoo nga ihatag diha kaninyo.”

Mopamatuod ko nga si Jesukristo buhi. Ang pagbarog diha sa Iyang mga templo—atong labing balaan nga mga dapit—pinaagi sa pag-andam ug dayon sa pagtahod sa sagrado nga mga ordinansa ug mga pakigsaad mopanalangin ninyo og kalinaw, kalipay, ug gahom karon ug sa tibuok ninyong kinabuhi.