Dad-a Unsay Anaa Kaninyo
Ang Manluluwas makahimo sa bisan unsa nga inyong ihalad—dako o gamay—ngadto sa gamhanang mga pagpahayag sa gugma.
Kausa, sa akong misyon, ang akong kompanyon ug ako naghimo og matahom nga coconut cake. Gusto namong ipakita ang among gugma ug pasalamat alang sa mga miyembro sa among ward, mao nga sa dihang nakakita kami og cake mix sa grocery, nahibalo na kami kon unsay buhaton.
Migahin kami og pipila ka oras sa paghatod sa mga hiniwa nga cake, gilain ang nahibilin alang sa bag-ohay lang nga nauli nga mga misyonaryo. Mihunong kami sa among apartment aron kuhaon ang kataposang gisudlan sa cake, dayon nagdali sa pag-adto sa balay sa among mga higala latas sa kusog nga ulan.
Ngitngit ang ilang pasilyo, mao nga dili ko kaayo makakita sa ilang mga reaksiyon, apan mahunahuna lang nako ang ilang mapasalamatong mga pahiyom samtang gitilawan ang among matahom nga cake. Ako wala maghunahuna nga ang usa nila mohunong sa pagkaon ug moingon nga naglibog, “Sister … kan-on man ni.”
Ang pagkaamgo nakasagmuyo nako. Sayop diay nga sudlanan ang akong nadala—ug nadala ngadto nila ang among sobra sa paniudto!
Naulaw kaayo ko. Naunsa man nga ang akong buhat sa pagserbisyo nahimong sayop?
Ginagmay nga mga Halad …
Nakasulay ba kamo nga nabalaka mahitungod sa “pagkapakyas” sa pagserbisyo? Usahay, masagmuyo kita sa higayon nga maghunahuna kita nga ang pagserbisyo kinahanglan nga nindot tan-awon. Tingali mobati kamo nga kamo walay tukmang mga himan sa pagtabang sa usa ka tawo o dili kamo segurado kon unsa gayod ang gikinahanglan sa usa ka tawo. Kon mibati kamo niana, wala kamo mag-inusara.
Apan nakahinumdom ka ba sa dihang si Jesus mipakaon sa 5,000? Kini nga milagro nahitabo tungod kay ang batang lalaki mitanyag sa unsay anaa niya: lima ka pan ug duha ka gagmayng isda (tan-awa sa Juan 6:9). Ang batang lalaki nahibalo nga dili kadto paigo nga ipakaon sa tanan. Tingali mibati siya nga murag binuang ang pagtanyag niini. Apan si Jesus mihimo sa iyang pagkamanggihatagon ug sa gamay nga buhat sa pagserbisyo ngadto sa usa ka milagro.
Ang Manluluwas makahimo usab sa atong ginagmay nga mga buhat sa pagserbisyo ngadto sa gamhanang mga pagpahayag sa gugma. Bisan kanus-a—ug sa bisan unsa nga paagi—nga kita “[molakaw] ug maghimog mga maayong butang,” ang Dios mag-uban nato.
… Dagkong mga Resulta
Ang Ginoo nag-ingon, “Ayaw kakapoy sa maayong buhat, kay kamo nagpahimutang sa pundasyon sa usa ka mahinungdanon nga buhat. Ug gikan sa gagmay nga mga butang magagikan ang dagko” (Doktrina ug mga Pakigsaad 64:33). Ang matag buhat sa tinuoray nga gugma, bisan unsa ka gamay, magkaanam sa pagkahimong dagko nga mga butang, lakip na ang makahuloganong panahigalaay, nagtubo nga gugma, ug mas lawom nga koneksiyon ngadto sa Manluluwas.
Bisan kon ang akong paghatod og cake dili mao, ang akong mga higala nagpasalamat sa gibuhat (ug nangatawa na lang). “Dili kini mahitungod sa cake,” ang usa nila miingon. “Ang tinuod nga gasa mao ang paningkamot nga inyong gihimo aron moserbisyo namo.” Dili importante nila ang unsay akong nahimo, ang importante nga aduna koy gihimo. Tungod niana, ang among panaghigalaay nalig-on.
Si Sister Maxfield ug ang iyang kompanyon, si Sister Sousa
Mao nga ayaw kahadlok sa pagserbisyo! Dili kinahanglan nga himoon ninyo kini sa hingpit nga paagi. Itanyag ang bisan unsay anaa ninyo—bisan kon kini kan-on imbes cake.