Tinago nga mga Bahandi

Niadtong 1836, si Propeta Joseph Smith ug ang pipila ka kauban miadto sa Massachusetts aron mangita sa gihungihong nga tinago nga kwarta nga walay tag-iya aron itabang sa Simbahan nga mabayran ang mga utang niini.

Apan wala diay kwarta. Kining matinud-anong kalalakin-an tingali mibati og gamayng kaulawan. Apan ang Manluluwas midasig nila: “Ako, ang Ginoo nga inyong Dios, wala masuko sa inyong pag-abot niini nga pagbiyahe, bisan pa sa inyong mga binuang nga buhat” (Doktrina ug mga Pakigsaad 111:1).

Ang nahitabo, adunay “bahandi” nga mao ang potensiyal nga mga kinabig diha sa dapit nga andam maminaw sa gipahiuli nga ebanghelyo (tan-awa sa Doktrina ug mga Pakigsaad 111:2–3). Si Joseph ug ang iyang mga kauban mitudlo ug mibunyag sa pipila ka kinabig. Busa ang nahitabo wala mausik ang ilang pagbiyahe. Gani, ang nakab-ot nilang kalamposan mas importante pa kaysa pagpangita og kwarta.

Si Oliver Granger usa ka matinud-anong miyembro sa Simbahan nga gihatagan og lisod nga buluhaton nga magpabilin sa Kirtland, Ohio, aron sulbaron ang mga pinansiyal sa Simbahan human nga ang kadaghanan sa mga Santos mibiya paingon sa Missouri.

Nagpasabot kini nga makigsabot sa pipila sa mao gihapon nga mga tawo kinsa mipalayas sa mga Santos. Dili ikatingala, si Brother Granger wala makakolekta sa igong kantidad nga nautang nila sa mga Santos.

Apan ang Ginoo mitabang ni Brother Granger nga maandam alang niini nga kasagmuyo sa dihang Siya mihatag sa buluhaton. Giingnan niya si Joseph Smith, “kon siya [si Oliver Granger] mapukan makabangon siya pag-usab, kay ang iyang sakripisyo mas sagrado ngari kanako kay sa iyang paglambo” (Doktrina ug mga Pakigsaad 117:13).

Hunahunaa ang mga butang nga gihangyo sa Ginoo nato. Gusto Niya nga kita mahimong mga tigpasiugda og kalinaw, motabang sa kabos ug timawa, ug mopakatap sa kaayohan. Kita mobuhat sa tanan kutob sa atong mahimo—apan nasayod usab kita, sa luyo sa atong mga hunahuna, nga kita dili kanunay nga magmalamposon sa hingpit. Ang gubat, kakabos, ug sala magpadayon hangtod nga mahitabo ang Ikaduhang Pag-anhi.

Apan kita makahimo sa tanang paningkamot nga malikay ang kalibotan (ug ilabi na ang atong kaugalingong kinabuhi) niini nga mga butang.

Bisan pa sa ilang labing maayo nga mga paningkamot, ang mga Santos wala makatukod og templo sa Jackson County, Missouri. Ang mga pagpanggukod ug kabayolente nga ilang giatubang hilabihan ka grabe.

Hunahunaa ang ilang kahupayan sa dihang ang Manluluwas misulti ni Propeta Joseph Smith:

“Kon ako mohatag og sugo ngadto ni bisan kinsa nga mga anak sa mga tawo sa paghimo og buhat alang sa akong ngalan, ug kana nga mga anak sa mga tawo molihok sa tibuok nilang kusog ug sa tanan nga anaa kanila sa paghimo niana nga buluhaton, ug dili mohunong sa ilang kakugi, ug ang ilang mga kaaway mosulong kanila ug mopugong kanila sa paghimo niana nga buhat, tan-awa, akong kabubut-on nga dili na mangayo niana nga buhat gikan sa mga kamot sa mga anak sa tawo, hinuon dawaton ang ilang mga halad” (Doktrina ug mga Pakigsaad 124:49).

Kon kamo mohimo sa tanang paningkamot sa pagtuman sa buluhaton apan gibabagan sa inyong “mga kaaway”—ug kana naglakip sa mga kaaway sama sa mga sakit, depresyon, tibuok kalibotan nga mga pandemya, ug ubang mga sirkumstansya nga dili ninyo makontrolar—OK ra. Bisan unsa nga makaya ninyong buhaton, ang Ginoo modawat niana.