Pag-scroll Kamo diha sa Balaan nga mga Dapit
Kontrola ang inyong panahon nga igahin sa online!
Nahunahunaan na ba ninyo ang pag-usab sa inyong mga kasinatian sa online ngadto sa balaan nga mga dapit?
Ang Ginoo misugo kanato nga mobarog diha sa balaan nga mga dapit (tan-awa sa Doktrina ug mga Pakigsaad 87:8). Mahimo ninyo kini pinaagi sa paggahin og panahon sa mga templo, mga chapel, inyong panimalay, ug ubang dapit diin mabati ninyo ang Espiritu.
Kamo mahimo usab nga mas adunay katuyoan sa kon unsaon ninyo paggamit ang inyong mga smartphone, social media, ug artificial intelligence (A.I.). Mahimo mong mogamit og estratehiya sa inyong interaksyon sa mga post, mga bidyo, mga litrato, ug uban nga online media. Kon buhaton ninyo kini, kamo magmugna og mga dapit diin mas mabati ninyo ang Espiritu ug mas makapaduol sa Langitnong Amahan ug ni Jesukristo.
Ania ang pipila ka paagi nga kamo maka-scroll diha sa balaan nga mga dapit.
Bansaya ang Inyong mga Algoritmo
Karon sayon ra sa atong mga hunahuna nga hingpit nga maokupado sa virtual nga luna samtang kita mogamit sa teknolohiya. Kon dili kita magmatngon, mahimong padayon kita nga madala sa kanunay nga pagtan-aw sa mga walay kataposang online content—sama gayod sa sulog sa suba—ug dili na makahatag og atensiyon sa unsay labing mahinungdanon. Sa daghang paagi, kini tungod sa mga algoritmo.
Ang algoritmo usa ka grupo sa mga lagda o mga proseso nga gisunod sa program sa kompyuter. Ang ubang algoritmo mopili sa unsay inyong makita diha sa inyong mga rekomendasyon ug mga feed. Kini nga mga algoritmo nakabase sa kon giunsa ninyo pagtan-aw sa content—sa mga like, mga share, mga comment, mga save, bisan gani kon unsa mo ka dugay nga motan-aw sa mga bidyo o mga hulagway.
Ang katuyoan niini nga mga algoritmo mao ang pagkuha sa inyong interes aron magpadayon mo sa pag-scroll sa hangtod unsa ka dugay nga posible. Ang problema niini mao nga kini makaapekto sa atong paggamit sa kabubut-on. Kabahin sa teknolohiya, si Elder David A. Bednar sa Korum sa Napulog Duha ka Apostoles mipahinumdom nato nga, isip mga anak sa Dios, kita “mahimong mga tinugyanan nga molihok ug dili lamang mga butang nga palihokon.” Ang moral nga kabubut-on, nga mao ang “abilidad ug pribilihiyo sa pagpili ug pagbuhat alang sa atong kaugalingon sa mga paagi nga maayo, matinuoron, mahiyason, ug halangdon,” usa ka mahinungdanon nga bahin sa plano sa Dios alang kanato.
Si Elder Bednar nagtudlo nga ang algoritmo “wala makagusto kanimo. Wala kini magpakabana kanimo. Wala gayod kini makahibalo kon ikaw anaa ba o wala.” Kini usa lamang ka proseso “nga magtratar [kaninyo] ingon nga usa ka butang nga palihokon, kon tugotan ninyo kini.” Mao nga, ayaw tugoti kini!
Mahimo ninyong mabansay ang inyong algoritmo aron mas makaserbisyo kaninyo. Kon makakita kamo og hulagway sa templo, motan-aw og Strive to Be nga music video, o kon makakita og bisan unsa nga positibo nga mga mensahe, seguradoha nga motan-aw kamo niini. Gahini og panahon nga inyo kining matagamtam imbes nga iklik kini ug ibalhin dayon. Kini adunay gamhanan nga epekto sa algoritmo ug motudlo niini nga mas kanunay nga iduso kaninyo kini nga matang sa content! Paglabay sa panahon, kini makatabang ninyo nga makamugna og mas balaan nga dapit sa pag-scroll.
Pagmatngon sa mga Echo Chamber
Ang mas dakong panahon nga inyong igahin sa usa ka partikular nga matang sa content, mas dako ang kahigayonan nga kadto nga mga matang sa content ang tanan nga inyong makita. Ang inyong panglantaw sa kalibotan magkagamay hangtod nga kon unsa ang inyong makita murag mao na ang kamatuoran. Kini gitawag og echo chamber.
Kon dili kamo magmabinantayon, mapiit kamo sa dili makatabang ug kuyaw sa espirituhanong paagi nga mga echo chamber. Ang mga lider sa Simbahan nagtudlo nga kita kinahanglang maglikay sa content nga nagtinguha “sa pagpasiugda og kasuko, panagbingkil, kahadlok, o dili tinuod nga mga teyoriya sa pagkunsabo.” Kinahanglan kitang motutok sa katuohan, kasaligan, ug tinuod nga mga tinubdan sa impormasyon ug maglikay sa unsay “pangagpas o gikan sa hungihong.” Ang Espiritu Santo ug ang mabinantayong pagtuon, makatabang kanato sa pag-ila tali sa kamatuoran ug sa sayop (tan-awa sa Doktrina ug mga Pakigsaad 11:12; 45:57). Ang kamatuoran kanunay nga makaplagan diha sa mga kasulatan ug sa mga pagtulun-an sa buhing mga propeta ug apostoles.
Ang ebanghelyo nagdasig kanato sa pagpangita og kahibalo ug panabot. Apan magmabinantayon. Kon kamo makasugat og usa ka butang nga dili tinuod o gipahimangno sa Espiritu nga likayan kini, pilia nga mosunod niadto nga mga pag-aghat ug pangita og mas makabayaw nga mga dapit nga gahinan sa inyong panahon. Pangitaa ang mga butang nga “mahiyason, matahom, o maayo og dungog o dalaygon” (Ang mga Artikulo sa Hugot nga Pagtuo 1:13), sa virtual nga paagi ug sa tinuod nga kalibotan.
Hinumdomi Kon si Kinsa Kamo
Daghang tingog ang nagtinguha sa atong atensiyon. Ang uban maayo, apan ang pipila kay makailad—labi na sa online. Kini naglakip sa mga pagsulay ni Satanas sa paghimo kanato nga makalimot kon kinsa gayod kita aron nga kita mahimong alaot sama niya (tan-awa sa 2 Nephi 2:27).
Kamo anak nga lalaki o babaye sa Dios nga adunay walay kinutoban nga bili ug balaang potensyal. Itugot nga kini nga kahibalo mogiya ninyo sa tanang dapit sa inyong kinabuhi lakip na kon kamo mangita og makabayaw nga content ug mopakigbahin niini sa uban. Tan-aw kanunay ngadto ni Jesukristo sa tanan ninyong buhaton (tan-awa sa Doktrina ug mga Pakigsaad 6:36). Dayon, samtang kamo mag-scroll diha sa balaan nga mga dapit, kamo makamugna og luna nga makatabang ninyo nga mobati sa Espiritu ug mopalig-on sa inyong pagtuo.