Kalig-on aron Hunongon ang Pagtandi

Paghulagway pinaagi ni Katelyn Budge

Usahay akong itandi ang akong kaugalingon ngadto sa uban ug mobati og dili maayo nga ako dili parehas ka gwapa o “ka-perpekto” sama nila. Tungod niini, nakasinati ko og lisod nga mental ug emosyonal nga mga pagsulay. Nag-search ko sa online alang sa mga kapanguhaan aron makabuntog niini, apan wala ko makakita og bisan unsa nga makatabang.

Usa ka adlaw nakadesisyon ko, “Kinahanglan lang ko nga moluhod ug mag-ampo, tungod kay adunay naa diha sa ibabaw nga makahatag nako sa labing dako nga gakos.” Mao nga misalig ko sa Langitnong Amahan ug ni Jesukristo ug tinud-anay nga nag-ampo.

Sa dihang gibuhat nako kini, nahinumdoman nako nga ang Langitnong Amahan mibuhat nako sa indibidwal nga paagi ug sa Iyang imahe, mao nga kinahanglan nako nga daygon ang akong kaugalingon. Gibutang ko Niya dinhi nga adunay katuyoan, ug nalipay ko nga naa ko sa kalibotan! Pinaagi sa Espiritu Santo, Siya mipahinumdom kanako nga ako labaw pa kaayo sa kon unsay akong gihunahuna, ug kana naghatag nako og kalig-on.

Nakadesisyon ko nga dili na motan-aw sa social media ug segurohon nga palibotan nako ang akong kaugalingon sa positibo ug suportado nga mga tawo—mga tawo nga nagpakita nako og Kristohanong gugma. Mapasalamaton kaayo ko sa akong mga higala diha sa akong klase sa Young Women tungod kay sila nakahatag og kaayohan, kapositibo ug kalig-on sa akong kinabuhi. Bisan unsang higayon nga sawayon nako ang akong kaugalingon, sila mopahinumdom nako nga ako gwapa ug adunay bili.

Itandi gihapon nako ang akong kaugalingon ngadto sa uban usahay. Apan matag higayon nga ako mag-ampo, usa ka ligdong, hinagawhaw nga tingog moingon nako, “Amara, gwapa ka.”

Si Jesukristo mao ang akong Manunubos ug labing suod nga higala. Siya anaa kanunay alang nako, bisan kon bation nako nga mura og wala ko kanunay naghinumdom Kaniya sama sa angay unta nakong buhaton. Nasayod ko nga Siya ug ang Langitnong Amahan nahigugma kanako, ug ako nahigugma Kanila. Seguro dili na gayod nako masinati ang matang sa gugma nga gihatag Nila nako sa bisan asa pa man.