O loo Vaavaaia A’u e le Atua

Ata na pueina e Christina Smith

Sa taia a’u i se osofaiga faafuasei o le atuatuvale i ni nai vaiaso talu ona maua lo’u valaauga o le misiona. Sa leai so’u malosi, leai se uunaiga, ma o le mea sili ona taufaafefe o mea uma, sa ou ita. Ita i lo’u aiga, uo, le Atua, ma ia te a’u lava. Ona o o’u lagona, sa le mafai ai ona ou ausia sini sa ou faatuina mo a’u lava.

Sa ou lagona e pei na tuuina mai e le Atua ia te a’u se taui o a’u filifiliga. Mo le tele o lo’u olaga, sa ou maua ai le fiafia i le auauna atu i a’u uo ma le aiga. Sa ou mafaufau i taimi uma i ni auala e siitia ai i latou i luga ma faaleleia ai o latou olaga. Ma le isi, o lea faato’a ou tautino lava e faaalu le isi lua tausaga o lo’u olaga e fai ai le mea lava e tasi. Sa ou lagona le tuuto atu o lo’u olaga i auaunaga, ae e le o mafai e le Atua ona uunaia se tagata se toatasi e siaki a’u pe o a mai? Sa foliga moni mai e le o popole mai o Ia.

Ae o le mea moni, e matua le sa’o lena mea. Sa popole mai le Atua ia te a’u e sili atu i lo le mea na ou malamalama i ai. Sa Ia foai mai ia te a’u mea uma na ou manaomia. Sa ia aumai ia te a’u se vaega o ni mausa malolosi na faatumauina ai la’u fesootaiga ma le talalelei, o se aiga maoae sa agalelei ma agaalofa ma lagolagosua ae sa latou tuleia foi a’u e fai ni suiga ma faaleleia a’u lava, ma sa Ia faamanuiaina a’u i ni uo lelei tele o e (pe na latou iloa pe leai) sa aumaia ia te a’u le malosi sa ou manaomia e faaauau ai pea.

E ui sa le’i mafai ona ou vaaia moni a o ou i ai i le lotolotoi o o’u tofotofoga, ae sa vaavaaia a’u e le Atua. A o ou mauaina o’u faaeega paia o le malumalu, sa ou iloa ai sa vaavaaia lava a’u e le Atua mai le amataga o taimi - vaaia moni lava! Sa fausia vaega uma o le fuafuaga ina ia mafai ona ou lagonaina mulimuli ane, le atoatoaga o le olioli faaselesitila. O le maataua laualuga o lenei fuafuaga o le taulaga a Lona Alo e Toatasi na Fanaua, o se meaalofa matua atoatoa e le mafai ona toe totogia.

Ou te matua faafetai mo le Atua. Ou te matua faafetai mo lo’u Faaola ma mo le taulaga na Ia faia ina ia mafai ai ona ou solaese mai tiga ou te lagonaina i lenei lalolagi. O loo soifua Iesu Keriso, ma e finagalo o Ia ia tatou ola foi!