Ae faapefea pe afai ou te tauivi e fai ni uo?

O le tausaga lenei ina ua ou suia i se aoga fou, sa ou tele ina ou tagi ona ou te le manao e tuua a’u uo tuai. Sa ou fai ifo ia te au lava ia o le a ou le fiafia lava i la’u aoga fou ma lagona e pei o le a ou faalataina a’u uo tuai pe afai ou te faia ni uo fou.

I le vaiaso atoa, sa faanoanoa o’u foliga. Ou te le’i talanoa i se tagata. Sa i ai nisi o teineiti sa taumafai e talanoa mai, ae ou te le’i manao e faauo ma i latou.

I se tasi aso, na ou iloa ai ou te le manao e tuua na o a’u. Sa ou iloa e tatau ona ou tatala atili. A o matamata i se ata faasolo o le televise e uiga ia Iesu Keriso, sa musuia au e mafaufau i le auala na Ia faia ai ni uo. E oo lava ia te Ia e lei faafiafiaina tagata uma, ae mo le toatele o tagata, sa Ia suia o latou olaga.

Ona o le faataitaiga a Keriso, na ou filifili ai e taumafai e fai ni uo fou, e ui lava i lo’u fefe. Sa ou fefe ona sa ou matamuli ma popole o le a ula mai tagata ia te au. Ae sa ou mafaufau, “O loo ia te oe se Tama oi le Lagi o le a fesoasoani ia te oe. E tusa lava pe teena oe e tagata uma, o le a i ai o Ia iina.”

O le toe tepa nei i tua, ua mafai ona ou iloa ai o le Uo e toatasi e lei tuua lava au i lena taimi o le Faaola. Ona o aafiaga faigata na ou oo i ai, sa ou latalata atili atu ai ia te Ia. O Lona alofa tele mo i tatou na Ia tuuina mai ai Lona lava soifua mo i tatou. Ma sa Ia tuuina mai ia i tatou tusitusiga paia ina ia mafai ona tatou iloa le auala e avea ai faapei o Ia. E mafai ona e faalagolago ia Iesu Keriso e avea ma au Uo.