Na Te Le’i Iloa Sa Ou Mana’omia

Ata na pueina e Melanie Miza

Sa ou feagai ma nisi o mataupu patino. I se tasi aso sa ou le maua ai se lagona lelei, ma ou te lei manao moni lava e alu i le seminare. Ae sa ou mafaufau, “O lo’u tausaga mulimuli lenei, ma e tatau ona ou faaaogaina.”

O lea sa ou alu ai, ma sa ma talanoa e uiga i le auala e silafia ai e Iesu Keriso i tatou taitoatasi i o tatou igoa. Tatou te faitau i le Mataupu Faavae ma Feagaiga 18:10: Ua tele le taua o agaga i le silafaga a le Atua.” Sa amata ona ou lagona le ootia a o ou faamamafaina le fuaiupu. Pe a ou lagona le ootia, e tele ina ou tagi, o lea ou te le toe manao ai e toe faitau i le vasega.

Mulimuli ane, sa fesili mai le faiaoga, “O le a le mea na sili ona e fiafia i ai, ma pe aisea?” Ou te lei manao e talanoa, ae sa ta’ua e sa’u uo lena mau. Sa ia tuuina mai lana molimau o le a le tuulafoaiina i tatou e le Atua, o nisi taimi o le a galo ia i tatou, ae Na te silafia i tatou ma o le a i ai o Ia iina mo i tatou.

Ina ua ou faalogo i lena mea, sa ou lagonaina e pei o loo fetalai mai le Tama Faalelagi ia te au e ala mai i la’u uo. Sa pei lava o loo Ia fetalai mai, “Aua e te liliu ese mai ia te au—ua ou i ai iinei.”

Mulimuli ane, sa ou alu e solo faamago o’u foliga, ma sa sau la’u uo ia te au. Fai mai a ia, “Sa ou le manao e faasoa atu, ae sa ou lagonaina e tatau ona ou faasoa atu aua o le a fesoasoani ai i se tasi. Ou te le’i iloa o lena tagata o oe.” O lena mea na atili faamautu mai ai ia te au o loo manatu mai le Tama Faalelagi ia te au.

Ina ua uma le seminare, sa ou alu i le fale ma tatalo. E masani lava, ou te faafetai ma ole atu mo mea. Ae o lena tatalo—ou te manatu o le tatalo aupito sili lea ona faafetai ua ou faia. Sa ou lagonaina le Agaga i totonu o lo’u potu, ma sa ou lagonaina sa i ai iina le Tama Faalelagi faatasi ma au.