O Oa Natia

I le Mataupu Faavae ma Feagaiga 95, sa fai si faanoanoa o le Alii i le Au Paia. Sa Ia poloaiina muamua i latou e fausia se malumalu (tagai i le Mataupu Faavae ma Feagaiga 88:119)—ae i le lima masina mulimuli ane, latou te lei faia lava se mea e uiga i ai.

E foliga mai e le mafai ona mafaufauina i aso nei. O le fausiaina o malumalu o se taulaiga autu lea mo i tatou! Ae e lei tele ni mea na faaali mai e le Alii e uiga i malumalu i le 1833. Sa lei talisapaia atoatoa e le Au Paia le taua o le a i ai i latou.

O le a la le mea na fai e le Alii? Sa Ia auiliiliina le mafuaaga na finagalo ai o Ia ia latou fausia se malumalu (tagai i le Mataupu Faavae ma Feagaiga 95:8–17). Na ia faamatalaina le mea na Ia saunoa ai muamua, ma tuuina atu ni malamalamaaga fou ma faamalosia i le fale le taua o lena mea.

I le 1834, sa mafaufau le Au Paia pe aisea na faatagaina ai e le Alii o latou fili e faalavelave ia i latou ma tuliesea i latou mai lo latou lava laueleele. E ala mai i le Perofeta o Iosefa Samita, na auina mai ai e le Alii ni tali se lua:

Muamua, na fetalai mai le Alii o nisi taimi na te faatagaina ai e amioleaga e fai mea leaga “ina ia mafai ona latou faatumuina le fuataga o a latou amioletonu” (Mataupu Faavae ma Feagaiga 103:3). Na tuuina mai e Alema faapea: “Ma na tigaina o Ia ina ia latou faia [ni mea leaga], ina ia tonu faamasinoga o le a Ia faia i luga o i latou i Lona toasa” (Alema 14:11).

O le isi mafuaaga na tuuina mai e le Alii i le Au Paia mo o latou faafitauli atonu sa sili atu ona faigata ona faalogoina: “Ina ia aoaiina i latou o e ua ta’ua i latou lava i lo’u igoa mo se vaitau itiiti … aua sa latou le faalogo atoa mai i faatonuga ma poloaiga na Ou tuu atu ia te i latou” (Mataupu Faavae ma Feagaiga 103:4).

E lē faapea ai ua faamaonia e le Atua gaoioiga amioleaga ma lē tusa ai ma le tulafono a o latou fili. Na te lei “musuia” tagata faatupu faalavelave e osofaia le Au Paia; Sa Ia faatagaina i latou e faaaoga lo latou faitalia ma e lei faalavelave mai e taofia ai i latou.

Ae na folafola mai pea e le Alii afai o le a usitai le Au Paia, “o le a le taofia lava lo latou manumalo” (Mataupu Faavae ma Feagaiga 103:7).

Atonu na e mafaufau pe aisea ua faaigoa ai le perisitua maualuga ia Mekisateko. Na faamatala mai e le Alii e ala i le Perofeta o Iosefa Samita.

“Ao lei oo mai [Mekisateko] i ona aso sa taʼua o le Perisitua Paia, e tusa ma le Faatulagaga a le Alo o le Atua. Ae ona o le faaaloalo po o le migao i le suafa o Lē Silisili, ina ia aloese ai mai le ta’u soo o lona suafa, na faaigoaina ai lea perisitua ia Mekisateko, po o le Perisitua faa-Mekisateko, e i latou, le ekalesia, i aso anamua” (Mataupu Faavae ma Feagaiga 107:3–4

Mafaufau pe faafia ona tatou ta’ua le “Perisitua Mekisateko” i sauniga a le Ekalesia ma talanoaga faasamasamanoa. Vaai faalemafaufau la pe afai e le o “Mekisateko”, tatou te faapea atu “le Alo o le Atua” i taimi uma. O le a amata ona foliga mai e le faaaloalo. Sa finagalo le Alii e taofia lena mea.