O Faamanuiaga o le Pule ma le Mana o le Perisitua

O Iesu Keriso o le faaao o le Ekalesia. O le Ekalesia o le meafaigaluega lea na Ia foafoaina e faataunuu ai le galuega taua o le togiolaina o tagata. E ala i le Ekalesia, e mafai ai ona Ia:

• Folafola atu Lana talalelei i le lalolagi atoa.

• Ofo atu le papatisoga ma isi feagaiga uma—e oo lava i se ala o feagaiga i Lona malo selesitila.

• Tuufaatasia o aiga mo le faavavau.

• Ofo atu meaalofa o le faaolataga, e oo lava ia i latou o e ua maliliu e aunoa ma na mea.

• Auauna atu i manaoga faaletino o fanau a le Atua i le taimi nei.

O lo o aoaoina e Iesu ia Maria, saunia e Dan Burr

Ina ia ausia nei faamoemoega maoae, ma saunia ai mo le toe afio mai o le Faaola, e manaomia e le Ekalesia le taitaiga faifai pea, pule, ma le mana o le Atua. O le Ekalesia o le “ekalesia moni ma le ola” (Mataupu Faavae ma Feagaiga 1:30) aua ua tuuina atu e Keriso i Lana taitaiga ma le mana e ala i Lana perisitua.

A aunoa ma lenei perisitua paia, semanu o le Ekalesia o se faalapotopotoga faalelalolagi e pei o le toatele o isi, o loo faia mea lelei i le lalolagi ae leai se malosi e ausia ai le faamoemoega o le sauniaina o fanau a le Atua mo le olioli o le ola e faavavau i Lona afioaga. Faatasi ai ma lenei perisitua, ma ki e taitaia ai le galuega o lenei perisitua, o loo i ai uma le pule ma le faatulagaga lelei i le Ekalesia.

“I le Ekalesia, o le pule uma o le perisitua e faaaoga i lalo o le taitaiga a i latou o ē umia ki o le perisitua.

“O tamatane agavaa o le Ekalesia e mauaina le pule o le perisitua e ala i le faaee atu o le perisitua ma le faauuga i tofi o le perisitua. E mafai e tagata uma o le Ekalesia ona faaaoga le pule faamatuu, pe a vaetofiaina pe tofiaina foi i latou e fesoasoani i le faataunuuina o le galuega a le Atua.”

A o faaliliuina le Tusi a Mamona i le 1829, sa amata ona faatulagaina e le Alii Lana faatulagaga o le perisitua. I le tali atu i le tatalo a Iosefa Samita ma Oliva Kaotui e faatatau i le papatisoga, na faaali mai ai Ioane le Papatiso toetu ma faaee atu i o laua luga le Perisitua Arona, lea “ua umia ki o le auaunaga a agelu, ma o le talalelei o le salamo, ma o le papatisoga i le faatofuina mo le faamagaloina o agasala” (Mataupu Faavae ma Feagaiga 13:1). Faatasi ai ma lena pule, na papatisoina ai e Iosefa ma Oliva le tasi ma le isi ma isi a o faatulagaina aloaia le Ekalesia.

E lei leva mulimuli ane, ae faaali mai Aposetolo anamua o Peteru, Iakopo, ma Ioane ma faaee atu le Perisitua maualuga po o le Mekisateko, e aofia ai “ki o lo’u malo, ma se tisipenisione o le talalelei mo … le atoaga o taimi!” (tagai i le Mataupu Faavae ma Feagaiga 27:12–13; 128:20).

Na oo mai le pule faaopoopo o le perisitua ina ua faaali mai perofeta anamua e toatolu, o Mose, Elaia, ma Elia, ia Iosefa ma Oliva i le Malumalu o Katelani ma tuu atu ia i laua ki o le faapotopotoina o Isaraelu ma le galuega o malumalu o le Alii (tagai i le Mataupu Faavae ma Feagaiga 110:11–16).

I se faaupuga, o le faamoemoega o le pule ma le mana o le perisitua lea na toefuatai mai e Iesu Keriso o le faamanuiaina. E mafai ai e tagata uma o le Ekalesia ona faaaoga le mana o le Atua i le auauna atu ma le faamanuiaina o isi i le Ekalesia, i le aiga, ma le lalolagi atoa. E auai tagata o le ekalesia i le Faaola i le faataunuuina o Lana galuega o le faaolataga ma le faaeaga, i le faaaogaina o meaalofa paia ma le mana e sili atu nai lo o latou lava meaalofa e fesoasoani ai i le malo o le Atua ia tuputupu ae e faatumulia ai le lalolagi (tagai i le Mataupu Faavae ma Feagaiga 65:2, 5–6).

Ua folafola mai e le Alii e faapea “ma o le perisitua tele lea [Mekisateko] e pulea le talalelei ma umia le ki o mealilo o le malo, o le ki lava lea o le malamalama e uiga i le Atua.

“O lea, o ona sauniga, ua faaalia ai le mana o le faale-atua” [Mataupu Faavae ma Feagaiga 84:19-20.

O sauniga o sauniga ia e faatautaia e le perisitua lea tatou te osia ai feagaiga ma le Atua, e amata i le papatisoga ma faaauau ai i feagaiga e maua i le maota o le Alii. O le tausia o nei feagaiga e liua ai i tatou mai alii ma tamaitai “o le lalolagi” i le au paia (tagai Mosaea 3:19) e ala i le alofa tunoa togiola o Keriso ma avea ai ma tagata ta’uamiotonuina ma faapaiaina—e le sala ma le pona—i luma o le Atua (tagai i le Mataupu Faavae ma Feagaiga 20:29–31; 3 Nifae 27:16–20).

Keriso i Amerika, saunia e Ben Sowards

“O Le Toefuataiga o le Atoatoaga o le Talalelei a Iesu Keriso: O Se Folafolaga i le Lua Selau Tausaga i le Lalolagi,” saunia e le Au Peresitene Sili ma le Korama a Aposetolo e Toasefululua, o loo faailoa mai ai se aotelega talafeagai:

“Matou te tautino atu O Le Ekalesia a Iesu Keriso o le Au Paia o Aso e Gata Ai, sa faatulagaina i le aso 6 o Aperila, 1830, o le Ekalesia lava lea a Keriso o le Feagaiga Fou ua toefuata’iina. O lenei Ekalesia ua taula i le soifuaga ato’atoa o lona ma’a tulimanu, o Iesu Keriso, ma i Lana Togiola lē i’u ma le Toetu moni. Ua toe vala’auina e Iesu Keriso ia Aposetolo ma tu’u atu ia i latou le pule o le perisitua. Ua Ia vala’aulia i tatou uma ia ō mai ia te Ia ma Lana Ekalesia, ia maua le Agaga Pa’ia, o sauniga o le faaolataga, ma ia maua le olioli tumau.”