3 Auala e Faasino Atu ai Perofeta ma Aposetolo ia Keriso

Na aoao mai Iesu Keriso e faapea e fetalai mai o Ia e ala mai i Ana perofeta "e peiseai mai [i Lona] lava fofoga" (Mataupu Faavae ma Feagaiga 21:5). O lona uiga latou te aoao atu Lana talalelei ma tuuina atu savali e finagalo o Ia tatou te faalogo i ai.

Mo se faataitaiga, i le konafesi talu ai, na aoao mai ai e Peresitene Dallin H. Oaks, Fesoasoani Muamua i le Au Peresitene Sili le auala e mafai ai e Iesu Keriso ona fesoasoani ia i tatou e toe foi atu i le Tama Faalelagi:

"O le mea moni, o le fesoasoani sili ona malosi a le Atua i le olaga nei o Lana sauniuniga lea o se Faaola, o Iesu Keriso, o le o le a puapuagatia e totogi le tau ma tuuina atu le faamagaloga mo agasala ua salamoina. O lena Togiola alofa mutimutivale ma le mamalu ua faamalamalama mai ai le mafuaaga ua avea ai le faatuatua i le Alii o Iesu Keriso ma uluai mataupu faavae o le talalelei."

O mataupu faavae na aoao mai e perofeta ma aposetolo e fesoasoani e faamalosia ai lo tatou faatuatua ia Iesu Keriso. I le taimi o le konafesi aoao, mafaufau e uiga i nei savali. E faapefea ona latou aumaia oe e latalata atili atu i le Faaola? Tatalo ia iloa o loo aoao mai e Ana Aposetolo le upumoni.

I le avea ai ma molimau faapitoa a Iesu Keriso, ua molimau mai perofeta ma aposetolo o loo soifua o Ia ma o Ia o le Faaola o le lalolagi. Mafaufau i lenei molimau mamana mai ia Peresitene Henry B. Eyring, Fesoasoani Lua i le Au Peresitene Sili:

"O au o se molimau o le Toetu o le Alii e pei lava o loo ou i ai iina ma soo e toalua i totonu o le fale i le ala o Emau. Ou te iloa o loo soifua o Ia.

"O Lana Ekalesia moni lenei—o le Ekalesia a Iesu Keriso. …

"Ou te tautino atu o se molimau i le Faaola toetu ma lo tatou Togiola."

I le taimi o le konafesi aoao, ia tusi i lalo faamatalaga o nei molimau. O le a se mea e te a’oa’oina mai ia i latou? E mafai faapefea ona e faamalosia lau lava molimau ia Iesu Keriso? A o e gauai atu i molimau filifilia a le Faaola, o le a faamautu atu e le Agaga Paia ia te oe e moni a latou molimau e uiga i le Keriso soifua.

E pei lava o se fatu o le a le ola pe afai e le faasūsūina ma tausia, o le a le tuputupu a’e foi a tatou molimau pe afai tatou te le faafaileleina. Pe a valaaulia i tatou e perofeta ma aposetolo e faatino, latou te ofoina mai ni auala musuia e faamalolosia ai a tatou molimau, faalolotoina la tatou sootaga ma Iesu Keriso, ma maua faamanuiaga folafolaina a le Faaola.

I le konafesi aoao ia Aperila 2025, o nisi nei o valaaulia na faia:

• Ia tuputupu a’e i le talitonuga mautinoa i luma o le Alii e ala i le faateleina o lou alofa mama ma le mama.

• Tuu atu le "taimi tutusa, ae le o le taimi avanoa" ia Iesu Keriso ma Lana talalelei.

• Faamanatu atili ma le loto i ai le Toetu o Iesu Keriso i le taimi o le vaitau o le Eseta.

• Mafaufau soo ma le faamaoni atili i le Togiola a le Faaola.

Tagai mo valaaulia faapenei a o e faalogologo i le konafesi aoao. Ua tuuina mai faapitoa lava mo i tatou i nei taimi! O le taliaina ma le faatinoina o na mea o se auala sili lea e faalatalata atili atu ai ia Iesu Keriso ma tumau ai i le saogalemu faaleagaga i aso e gata ai.

Na aoao mai Peresitene Russell M. Nelson i se tasi taimi, "O le mamanu ua leva ona faavaeina e le Atua o le aoaoina o Ana fanau e ala mai i perofeta ua faamautinoa mai ai ia i tatou o le a Ia faamanuiaina perofeta taitasi ma o le a Ia faamanuiaina i latou o e usitai i fautuaga faaperofeta." A o e sauniuni ma faalogo i savali musuia a perofeta filifilia a le Atua, o le a sili atu ona mafai ona e lagonaina le alofa o lou Faaola ma malamalama i le auala e mulimuli ai ia te Ia.