O Le Folafolaga i Le Aiga ma Oe
O le folafolaga i le aiga ua atoa lona 30 tausaga i le masina nei. Vaai pe mafai faapefea ona faamanuiaina ai lou aiga i le aso.
Ata na tusia e Irtaxe López de Munáin
I le 30 tausaga tonu lava ua mavae, ia Setema 1995, na tuuina mai ai e le Au Peresitene Sili ma le Korama a Aposetolo e Toasefululua le “O Le Aiga: O Se Folafolaga i le Lalolagi,” ma tautino mai ai “o le aiga o le totonugalemu lea o le fuafuaga a Le Foafoa mo le taunuuga e faavavau o Lana fanau.”
Peresitene Dallin H. Oaks, Fesoasoani Muamua i le Au Peresitene Sili, sa avea ma Aposetolo i lena taimi. Fai mai a ia, “Ou te molimau atu o le folafolaga i le aiga o se faamatalaga o le upumoni e faavavau. … Aoao atu, ola ai, ma o le a faamanuiaina oe. ”
O le folafolaga i le aiga ua faamanuiaina ai aiga i le lalolagi atoa mo le 30 tausaga—ma o le a faaauau pea ona faamanuiaina.
Motugaafa mo Aiga Malolosi ma Fiafia
I le folafolaga i le aiga, ua aoao mai a tatou perofeta ma aposetolo soifua faapea “E maua le fiafia i le olaga faaleaiga pe a faavae i aoaoga a le Alii o Iesu Keriso.”
O nei mea e aofia ai le “faatuatua, tatalo, salamo, faamagaloga, faaaloalo, alofa, agaalofa, galuega, ma gaoioiga faafiafia lelei.”
O le faaaogaina o nei aoaoga e mafai ona faamanuiaina ai lou aiga i ni auala ofoofogia. Mo se faataitaiga, e mafai ona e:
-
Uunaia tatalo faaleaiga. O le tatalo e mautinoa lava e fesoasoani i aiga ia malolosi atili. Afai e le o se mausa le tatalo i lou aiga, ia uunaia i latou e faataitai. O le tatalo faatasi e mafai ona aumaia ai le filemu, alofa, ma le lotogatasi.
-
Faaali atu le alofa e ala i upu ma faatinoga. Ta’u so’o atu i lou aiga le tele o lou alofa ia i latou—e tusa lava pe e te mautinoa ua uma ona latou iloa. Faaaoga upu agalelei ma faamalosiau. E valaaulia ai le Agaga i lou aiga.
O le auauna atu i lou aiga o se tasi lea o auala sili e faaali atu ai le alofa. Mafaufau e fai ni mea faalilolilo mo ou tei po o le fesoasoani i galuega i le fale e aunoa ma le talosagaina.
-
Faaalu se taimi faatasi ma fiafia. O loo ta’ua i le folafolaga i le aiga “gaoioiga faafiafia lelei” o se auala e fesoasoani ai i aiga ia malolosi ma fiafia. E mafai ona outou o i se tietiega uila i totonu o le paka, saunia ma fefaasoaa’i mea’ai, faia se savaliga sopo pu’upu’u, pe ta’alo i ta’aloga po o taaloga laupapa faatasi. E mafai ona faaauau pea le lisi, ae o le faaaluina o le taimi faatasi o le a faamanatu atu ai ia te oe o le aiga o le mea e sili ona taua.
-
Auauna atu faatasi. E mafai ona vavalalata lou aiga e ala i le auauna faatasi. E mafai ona faigofie lenei mea e pei o le sauniaina o se meaai e sili ona fiafia i ai mo se tasi o lo’o mana’omia le fesoasoani po o le suo o le kiona mai le auala taavale a se tuaoi.
E mafai e le Faaola ona fesoasoani e foia le le femalamalamaa’i ma luitau i totonu o aiga e ala i le salamo, faamagaloga, ma le faatuatua. A o tatou mulimuli ma faalagolago ia Iesu Keriso, o le a tuputupu ae le alofa ma le faaaloalo tatou te lagonaina i o tatou aiga.
E tele isi auala e malolosi ai ma fiafia aiga ma aumaia ai i latou e vavalalata faatasi.
O a ni mea e mafai ona e faia?
Upu Moni mo le Taimi Nei ma Taimi Uma
E Leai se aiga e atoatoa. O nisi o loo feagai ma luitau ogaoga. Atonu e te vaai i le tulaga o lou aiga ma mafaufau pe mafai faapefea e le folafolaga i le aiga ona faamanuiaina lou aiga. Ae ua faatumulia i upumoni e faavavau ia o le a faamanuiaina ai lou aiga—e tusa lava po o le a.