Iesu Keriso E mo Aso Lelei Foi
Pe a sologa lelei mea uma, e mafai faapefea ona tatou taulai atu pea i le Faaola? O ni nai manatu nei.
Vaai faalemafaufau pe afai e na o le pau le taimi e faaalu ai e se uo le taimi ma oe o le taimi na latou tauivi ai, ae ‘alofia oe i taimi latou te fiafia ai. Mafutaga maloloina? E le moni atoatoa.
Pe tatou te faia ea lena mea i lo tatou Faaola—saili atu ia te Ia i taimi faigata ma faagalo o Ia i taimi lelei?
Tatou te talanoa tele lava e uiga i le auala e fesoasoani ai Iesu Keriso ia i tatou i o tatou taimi o faigata, atonu ona o tagata uma, i se tasi taimi po o se isi, e feagai ma mea faigata.
Ae e i ai ni aso—vaiaso po o tausaga e oo lava i ai, pe afai tatou te laki—o loo sologa lelei ai mea uma. O nisi taimi tatou te faagaloina ai le Faaola i na taimi. Sa faia e tagata o le Tusi a Mamona. Sa latou manuia mai faamanuiaga a le Atua mo se taimi, ae na iu lava ina pauu atu i le faamaualuga ina ua galo ia i latou o Ia.
O taimi lelei e le faapea, e faafuasei ai ona tatou le toe manaomia Iesu Keriso. O taimi o le manuia o taimi atoatoa ia e olioli ai faatasi ma le Faaola, ae le o le faagaloina o Ia.
E faapefea la ona tatou fesootai atu ia Iesu Keriso ma lo tatou Tama oi le Lagi pe a le faamanatu mai e tofotofoga ia i tatou e liliu atu ia i Laua?
Tumau i le lotomaualalo
A sologa lelei mea uma, e lelei le faamanatuina o ou faamanuiaga ma mea ua ausia. Ae aua ne’i galo po o ai na mafai ai ona e i ai i le mea o lo’o e i ai. Sa faamatalaina e le Tupu o Peniamina i lana lauga i le Tusi a Mamona:
“Aua faauta, pe lē o i tatou uma ea o ni tagata aisi? Pe ua tatou lē faalagolago uma ea i le Tagata e tasi, o le Atua lava lea, mo mea uma ua tatou maua, mo meaai ma lavalava, ma mo auro, ma mo ario, ma mo ituaiga uma o oloa eseese ua tatou maua?” Mosaea 4:19
O le lotomaualalo e uiga i lou manuia e ala i le manatuaina o mea ua faia e le Tama Faalelagi ma Iesu Keriso mo oe, o se auala sili lea e faaaofia ai i Laua i ou taimi lelei.
Tumau i le lotofaafetai
O le lotofaafetai o se tasi lea o vaifofo sili ona lelei i le faamaualuga ma le faagaloina. O le faafetai i le Atua o le a fesoasoani ia te oe e manatua ai o Ia ma mea lelei uma o loo Ia faia ma Lona Alo i lou olaga. E tutusa lava le aoga i taimi lelei e pei ona i ai i taimi faigata.
Ia Mataala.
O se tasi o osofaiga e sili ona fiafia i ai Satani o le “faaoleole, ma faamoemoe malie ese atu [outou] i le saogalemu faaletino” (2 Nifae 28:21). I se isi faaupuga, o le a fiafia o ia pe afai e te lagona le faamalieina ma le saogalemu i ou taimi lelei e galo ai ia te oe le mea e sili ona taua. Aua nei galo le Atua! Pe a e nofouta pea i togafiti maaleale a le fili ma tetee atu e oo lava i ou taimi fiafia, e mafai ona e tumau latalata atu i le Tama Faalelagi ma Iesu Keriso.
O Le Leoleo Mamoe Lelei, saunia e Michael Malm
Ia Faatotonugalemu ia Keriso
Na aoao mai Peresitene Russel M. Nelson: “Afai o le taulaiga o o tatou olaga e i le fuafuaga o le faaolataga a le Atua … ma ia Iesu Keriso ma Lana talalelei, e mafai ona tatou lagona le olioli e tusa lava po o a mea o tutupu—pe le o tutupu foi—i o tatou olaga. O le olioli e sau mai [ia te Ia] ma ona o Ia. O Ia o le puna o le olioli uma.”
E faafia ona e mafaufau i lenei upumoni e uiga i le olioli pe a sologa lelei le olaga? E le na o se fautuaga faamafanafana lenei mo taimi e faigata ai mea. E moni i taimi uma, e aofia ai i ou aso sili ona lelei. O lea la, ia faia mea uma e te mafaia e taulai atu ai ia Keriso, e oo mai i le leaga po o le lelei.