Ang Dios Nagtan-aw Kanako

Litrato pinaagi ni Christina Smith

Naapektahan ko sa kalit kaayo nga hugna sa depresyon pipila ka semana human nako madawat ang akong tawag sa misyon. Wala koy kalagsik, walay kadasig, ug ang labing makahahadlok sa tanan, nasuko ko. Nasuko sa akong pamilya, mga higala, sa Dios, ug sa akong kaugalingon. Tungod sa akong gibati, wala nako makab-ot ang mga tumong nga akong gitakda alang sa akong kaugalingon.

Gibati nako nga ang Dios dili makiangayong mitagad nako. Sa kadaghanan sa akong kinabuhi, nakaplagan nako ang kaipay diha sa pagserbisyo sa akong mga higala ug pamilya. Naghunahuna ako kanunay og mga paagi sa pagbayaw kanila ug paghimo sa ilang mga kinabuhi nga mas maayo. Dugang pa, bag-o lang kong mipasalig nga mogahin sa sunod nga duha ka tuig sa akong kinabuhi sa paghimo sa maong sama nga butang. Gibati nako nga ang akong kinabuhi gihalad sa pagserbisyo, ug pero ang Dios wala makaaghat og usa ka tawo bisan sa pagsusi kon kumusta nako? Ingon og wala gayod Siya magpakabana.

Siyempre, dili gayod kana tinuod. Ang Dios nagpakabana nako labaw pa gani sa akong masabtan. Gihatag niya ang tanan nga akong gikinahanglan. Gihatagan ko niya og lig-ong mga kinaiya nga maoy nakapadayon nako sa ebanghelyo, usa ka talagsaon nga pamilya nga mabination ug mahigugmaon ug maayong mosuporta apan moawhag usab nako sa paghimo og mga kausaban ug pagpalambo sa akong kaugalingon, ug Siya mipanalangin nako og duha ka talagsaong higala kinsa (nakahibalo man sila o wala) nakahatag nako og kalig-on nga akong gikinahanglan sa pagpadayon.

Bisan og dili nako kini makita samtang anaa ko taliwala sa akong pagsulay, ang Dios nagtan-aw kanako. Samtang akong nadawat ang akong pagtuga sa templo, nakaamgo ko nga ang Dios nagtan-aw nako gikan sa sinugdanan sa panahon—sa literal nga paagi Ang matag bahin sa plano nahimo aron nga ako, sa kataposan, mobati sa kahingpitan sa celestial nga hingpit nga kalipay. Ang labing importante nga aspeto niini nga plano mao ang sakripisyo sa Iyang Bugtong Anak, usa ka gasa nga hingpit kaayo nga dili gayod kabayran.

Mapasalamaton kaayo ko sa Dios. Mapasalamaton kaayo ko sa akong Manluluwas ug alang sa sakripisyo nga Iyang gihimo aron nga ako makaikyas gikan sa mga kasakit nga akong gibati niining kalibotana. Si Jesukristo buhi, ug Siya gusto nga kita mabuhi, usab!