Ang Pamahayag sa Pamilya ug Kamo
Ang pamahayag sa pamilya mo-30 na ka tuig karong bulana. Tan-awa kon sa unsang paagi kini makapanalangin sa inyong pamilya karon.
Mga paghulagway pinaagi ni Irtaxe López de Munáin
Eksaktong 30 ka tuig na ang milabay, pagka Septiyembre 1995, ang Unang Kapangulohan ug ang Korum sa Napulog Duha ka mga Apostoles miisyu sa “Ang Pamilya: Usa ka Pamahayag ngadto sa Kalibotan,” namahayag nga “ang pamilya mahinungdanon sa plano sa Tiglalang alang sa walay kataposan nga destinasyon sa Iyang mga anak.”
Si Presidente Dallin H. Oaks, Unang Magtatambag sa Unang Kapangulohan, usa ka Apostol niana nga panahon. Miingon siya: “Mopamatuod ko nga ang pamahayag sa pamilya usa ka pamahayag sa mahangtorong kamatuoran. … Itudlo kini, sunda kini, ug ikaw mapanalanginan.”
Ang pamahayag sa pamilya mipanalangin og mga pamilya sa tibuok kalibotan sulod sa 30 ka tuig—ug magpadayon kini.
Mga Sugyot alang Lig-on, Malipayong mga Pamilya
Sa pamahayag sa pamilya, ang mga propeta ug mga apostoles nagpamatuod nga ang “kalipay diha sa kinabuhi sa pamilya labaw nga makab-ot kon kini gibase sa mga pagtulun-an sa Ginoo nga si Jesukristo.”
Naglakip kini sa pagtuo, pag-ampo, paghinulsol, pagpasaylo, pagtahod, gugma, kaluoy, buhat, ug maayong makalingaw nga mga kalihokan.”
Ang paggamit niini nga mga pagtulun-an makapanalangin sa inyong pamilya sa makahingangha nga mga paagi. Sama pananglit, kamo makahimo sa:
-
Pag-awhag og pamilya nga pag-ampo. Ang pag-ampo seguradong makatabang sa mga pamilya nga mas molig-on. Kon ang pag-ampo dili naandan nga buhat sa inyong pamilya, dasiga sila nga sulayan kini. Ang dungan nga pag-ampo makadala og kalinaw, gugma ug panag-uyon.
-
Ipakita ang gugma pinaagi sa mga pulong ug sa mga buhat. Sultihi ang inyong pamilya sa kanunay nga gihigugma ninyo sila—bisan og sa inyong hunahuna nasayod na sila. Gamit og mabination ug makadasig nga mga pulong. Nagdapit kini sa Espiritu nganha sa inyong panimalay.
Ang pagserbisyo sa inyong pamilya usa ka lahi nga talagsaong paagi sa pagpakita og gugma. Ikonsiderar ang paghimo og sekretong mga pabor sa inyong mga igsoon o pagtabang sa mga buluhaton sa panimalay nga dili mag-agad nga sugoon.
-
Paggahin og panahon nga magkauban ug maglingaw. Ang pamahayag sa pamilya naghisgot sa “maayo og makalingaw nga mga kalihokan” isip paagi sa pagtabang sa mga pamilya nga malig-on ug maglipayon. Mahimo kamong mag-uban nga magbisikleta ngadto sa parke, mag-andam ug magdungan sa pagpangaon, maglakaw-lakaw bisag sa duol lang, magdula og sport o magdula og board games. Daghan pa ang mahimong malista nga buhaton, apan ang paggahin og panahon nga mag-uban mopahinumdom kaninyo nga ang pamilya maoy labing mahinungdanon.
-
Mag-uban sa Pagserbisyo. Ang inyong pamilya mas magkasuod pinaagi sa panag-uban nga pagserbisyo. Mahimo kini sama sa yanong pag-andam og paborito nga pagkaon sa tawo nga nagkinahanglan o pagpala sa snow sa parkinganan sa silingan.
Ang Manluluwas makatabang sa pagsulbad sa wala magkasinabot ug sa mga hagit sulod sa mga pamilya pinaagi sa paghinulsol, pagpasaylo, ug pagtuo. Samtang kita mosunod ug mosalig ni Jesukristo, ang gugma ug pagtahod nga atong bation sa atong mga pamilya molambo.
Adunay daghang uban pang mga paagi sa paghimo sa mga pamilya nga malig-on ug malipayon ug magpasuod kanila.
Unsa pang mga butang ang inyong mahimo?
Mga Kamatuoran alang sa Karon ug sa Kanunay
Walay pamilya nga hingpit. Ang uban nag-atubang og dagkong mga hagit. Puwede ninyong tan-awon ang sitwasyon sa inyong pamilya ug maghunahuna kon sa unsang paagi ang pamahayag sa pamilya makapanalangin sa inyong pamilya. Apan puno kini sa mahangtorong mga kamatuoran nga mopanalangin sa inyong pamilya—bisan unsa pa man.