Si Jesukristo Mao ang Labing Maayo nga Moabot
Ang kalipay nga gitanyag ni Jesukristo anaa kanunay alang kaninyo.
Paghunahuna og usa ka panahon dihang nagtuo kamo nga ang kalibotan matapos na. Walay tiaw! Nakasulay na ba mo nga anaa sa labing kalisod nga nagtuo mo nga dili na ninyo makaya?
OK, tingali wala mo naghunahuna nga ang kalibotan naghinapos na. Apan ikaw ba mibati sab nga ang imong kalibotan matapos na? Tingali posibling butang kini sama sa pagkahagbong sa usa ka importante nga eksamin, sa imong higala nga mibalhin, o sa wala dahomang pagkamatay sa usa ka minahal.
Bisan unsa pa man ang inyong gihimo sa pag-atubang niadtong milabay nga mga kalisdanan, tan-awa ang inyong kaugalingon karon: nakasugakod kamo! Mas maayo pa gayod, ang mga propeta ug mga apostoles nagpahinumdom kanato nga kita makahimo og labaw pa kay sa basta lang makasugakod sa karon ug sa umaabot nga mga kalisdanan. Makakaplag kita og kalipay bisan nagsinati sa pagsulay.
“Ang Labing Maayo Moabot Pa”
Ang Manluluwas nag-antos labaw kay sa atong mahunahunaan didto sa Gethsemane ug sa krus. Ang pagpas-an sa mga kasakit, mga sakit, ug mga sala sa tibuok kalibotan (tan-awa sa Alma 7:11–13) malisod, nga ipasabot! Apan gibuntog Niya kining tanan.
Si Elder Patrick Kearon sa Korum sa Napulog Duha ka Apostoles mitudlo, “Oo, namalandong kita sa mga pag-antos ug mga walay kaangayan nga gipahamtang sa atong Manunubos tungod sa atong mga sala, ug kana maoy hinungdan sa seryoso nga pagpamalandong. Apan usahay kita magpabilin didto—didto sa tanaman, didto sa krus, sulod sa lubnganan. Napakyas kita sa pagsaka ngadto sa hingpit nga kalipay sa pag-abli sa lubnganan, sa kapildihan sa kamatayon, ug sa kadaogan ni Kristo!”
Tungod kang Jesukristo, dili kinahanglan nga magpabilin kita diha sa kaugalingon natong pag-antos. Makapadayon kita sa unahan ug gani makalantaw sa unahan ngadto sa umaabot dala ang kalipay ug pagtuo.
Busa, samtang ang kinabuhi ingon og mas lisod kay sa hunahuna nato nga ato rang makaya, hinumdomi ang bag-o lang gitudlo ni Presidente Russell M. Nelson: “Ang labing maayo moabot pa!” Pagkaanindot, makahatag og kaseguroan nga saad! Si Presidente Nelson nahibalo kaayo mahitungod sa kahapdos ug kasakit nga makita sa kalibotan matag adlaw. Apan sa gihapon siya makaingon nga “ang labing maayo moabot pa!”
Sa unsang paagi mausab ang inyong panglantaw kon kamo mahibalo gayod nga ang labing maayo moabot pa? Sa unsang paagi kini mousab sa paagi nga inyong maatubang ang mga hagit sa kinabuhi?
Pagseguro nga si Kristo anaa Kanunay sa Hunahuna
Usa ka umaabot nga hitabo nga gidapit ni Presidente Nelson nga puno sa kalipay natong paaboton mao ang Ikaduhang Pag-anhi ni Jesukristo.
Sa dili pa nimo hisgotan nga “ang mga kasingkasing sa mga tawo mopakyas kanila” (Lucas 21:26) ug ang kalaglagan nagpangatagak ngadto sa mga daotan wala kaayo na magpasabot nga “ang labing maayo moabot,” klarohon nato ang pipila ka butang: mao kini ang Ikaduhang Pag-anhi ni Jesukristo. Mawala kita sa punto kon papason nato ang Iyang pangalan dinha. Siya ang “labing maayo” nga moabot pa—Siya ang hinungdan nganong kita magmaya! Sigon sa giingon ni Presidente Nelson, “Ang labing maayo moabot pa … tungod kay ang Manluluwas moanhi pag-usab!”
Tan-awa ang mga Nephita, pananglit. Bisan og sila tua sa lahi kaayo nga kontinente, dihang namatay ang Manluluwas, nakasinati sila og pipila ka sama nga matang sa katalagman sa Ikaduhang Pag-anhi: kamatayon, kalaglagan, kinaiyanhong mga kalamidad. Ang tibuok siyudad naunlod sa kinahiladman sa dagat (tan-awa sa 3 Nephi 8).
Apan human sa tanan nga kasamok, kadtong mga mituo sa Manluluwas nasayod nga ang mga kalamidad mao mga timailhan sa pagkamatay sa Manluluwas. Niana gayod nga gutlo nga naghisgot sila mahitungod ni Jesukristo ug sa mga timailhan nga ilang nakita, ang Manluluwas mipakita kanila (tan-awa sa 3 Nephi 11:1–11).
Hunahunaa ang kadako sa kalipay nga gibati sa mga Nephita! Human nianang makapasubo nga kalaglaglagan, ang Manluluwas nangalagad kanila ug miayo kanila. Human sa tanang kahadlok ug kataranta, ang mga Nephita naglipay ug nagdayeg sa Dios nga sila nakahimamat sa ilang Manluluwas (tan-awa sa 3 Nephi 11:14–17).
Ang Manluluwas tingali dili sa pisikal mobisita kaninyo niining kinabuhia sama sa Iyang gibuhat sa mga Nephita. Apan kamo makaila Kaniya pinaagi sa pagbasa sa mga kasulatan, pag-ambit sa sakramento, pagtuman sa mga pakigsaad, ug daghan pa. Makatabang Siya kaninyo nga mobati sa kalipay karon ug sa umaabot, bisan unsa pay inyong mga kahimtang.
Samtang Nanaghulat Kita …
Ang Ikaduhang Pag-anhi sa Manluluwas tingali mahitabo panahon sa inyong kinabuhi, o tingali dili. Sa bisan unsa nga paagi, adunay kalipay diha kang Jesukristo karon.
Si Presidente Nelson mitudlo sa mosunod nga makadasig nga kamatuoran nga magtabang nato samtang maghulat kita sa pagbalik sa Manluluwas: “Minahal kong mga kaigsoonan, daghan kaayong talagsaon nga mga butang ang moabot pa. Sa umaabot nga mga adlaw, kita makakita sa labing dako nga mga pagpakita sa gahom sa Manluluwas nga sukad wala makita sa kalibotan. Sa tungatunga karon ug sa panahon nga Siya mobalik ‘uban sa gahom ug dakong himaya,’ Siya motanyag og dili maihap nga mga pribilehiyo, mga panalangin, ug mga milagro diha sa mga matinud-anon.”
Sa laing pagkasulti, makakaplag kita og kalinaw ug kalipay diha kang Kristo karon gayod, hangtod sa Iyang pagbalik, ug sa kahangtoran. Si Jesukristo mao ang kahayag sa tumoy sa matag langob. Siya ang kalipay sa personal nga kalisod. Siya ang kahupayan gikan sa kahadlok. Siya ang inyong Manluluwas. Samtang magtutok kamo ngadto Kaniya, ang kalinaw ug kalipay mahimo ninyong makab-ot dinhi, karon, ug sa kanunay.