Tinago nga mga Bahandi

Sa Doktrina ug mga Pakigsaad 95, ang Ginoo medyo nasagmuyo sa mga Santos. Sa nangagi Siya misugo kanila sa pagtukod og templo (tan-awa sa Doktrina ug mga Pakigsaad 88:119)—apan lima ka bulan ang milabay wala silay gihimo bahin niini.

Kana ingon og lisod hunahunaon karon. Ang pagtukod og mga templo usa ka dako nga tumong alang kanato! Apan ang Ginoo wala kaayo mohatag og pagpadayag mahitungod sa mga templo niadtong 1833. Ang mga Santos wala kaayo mohatag og bili unsa kaimportante kini sa umaabot.

Busa unsay gihimo sa Ginoo? Gisulti Niya ang mga detalye mahitungod kon ngano nga Siya gustong magtukod og usa ka templo (tan-awa sa Doktrina ug mga Pakigsaad 95:8–17). Iyang gipasabot og maayo unsay Iyang gisulti kaniadto, naghatag og bag-ong mga panglantaw ug pagpasabot sa kaimportante sa pagtukod niini.

Niadtong 1834, naghunahuna ang mga Santos kon nganong ang Ginoo mitugot nga samokon sila sa ilang mga kaaway ug papahawaon sila sa kaugalingon nilang yuta. Pinaagi ni Propeta Joseph Smith, ang Ginoo mihatag og duha ka tubag.

Una, ang Ginoo miingon nga usahay itugot niya nga ang daotan mohimo og dili maayong mga butang “aron ilang pun-on ang sukdanan sa ilang kadaotan” (Doktrina ug mga Pakigsaad 103:3). Gisulti kini ni Alma sa ingon niini nga paagi: “Ug mitugot Siya nga sila mobuhat [og daotan] nga [mga] butang … aron ang mga paghukom nga Iyang ipahamtang kanila sa Iyang kasuko makiangayon” (Alma 14:11).

Ang laing rason nga gihatagan sa Ginoo ang mga Santos sa ilang mga problema tingali maoy usa nga daw lisod paminawon: “Ug kadtong nagtawag sa ilang mga kaugalingon sunod sa akong ngalan mapanton sa mubo nga panahon … tungod kay wala sila mopatalinghog sa mga lagda ug mga sugo nga akong gihatag kanila” (Doktrina ug mga Pakigsaad 103:4).

Wala kana magpasabot nga ang Dios miaprobar sa daotan ug dili legal nga mga buhat sa ilang mga kaaway. Wala Siya “magdasig” sa mga manggubot nga moatake sa mga Santos, Iya silang gitugotan nga mogamit sa ilang kabubut-on ug wala mopugong sa pagpahunong kanila.

Apan sa gihapon ang Ginoo misaad nga kon ang mga Santos mosunod, “dili mahunong ang ilang pagkamadaogon” (Doktrina ug mga Pakigsaad 103:7).

Tingali naghunahuna kamo nganong ang mas taas nga pagkapari gipangalan sunod kang Melchizedek. Ang Ginoo mipasabot niini pinaagi kang Propeta Joseph Smith:

“Sa wala pa ang kapanahonan ni [Melchizedek] gitawag kini og ang Balaang Pagkapari, sunod sa Kapunongan sa Anak sa Dios. Apan tungod sa pagtahod o sa balaang pagtahod sa ngalan sa Labing Gamhanang Binuhat, sa paglikay usab sa kanunay kaayo nga pagbalik-balik sa iyang ngalan, sila, ang simbahan, sa karaang mga adlaw, mitawag niana nga pagkapari sunod ni Melchizedek” (Doktrina ug mga Pakigsaad 107:3–4).

Hunahunaa kon unsa kakanunay natong mahisgotan ang “Melchizedek nga Pagkapari” sa mga miting sa Simbahan ug sa impormal nga mga diskusyon. Karon hunahunaa kon, imbis nga “Melchizedek,” moingon kita og “Anak sa Dios” sa matag higayon. Magsugod kini nga sama og kawalay pagtahod. Ang Ginoo gusto nga malikayan kana.