Unsa Kaha kon Maglisod Ko sa Pagpakighigala?

Karong tuiga sa dihang mibalhin ko og bag-ong eskwelahan, mihilak ko og kadaghan kay dili ko gusto nga mobiya sa akong karaan nga mga higala. Nakaingon ko sa akong kaugalingon nga dili gyod ko maganahan sa akong bag-ong eskwelahan ug mibati nga akong matraydor ang akong karaang mga higala kon makakaplag ko og bag-ong mga higala.

Sa tibuok semana, kanunay ko nga nagkusmod. Wala ko makig-istorya ni bisan kinsa. Dunay ubang mga batang babaye nga misulay sa pagpakig-istorya nako, apan wala koy tuyo nga makighigala nila.

Usa ka adlaw, nakaamgo ko nga dili ko gustong mag-inusara. Nabantayan nako nga kinahanglan ko nga mahimong mas daling maistorya. Samtang nagtan-aw og teleserye mahitungod ni Jesukristo, nadasig ko sa paghunahuna mahitungod kon giunsa Niya sa pagpakighigala. Bisan kon wala niya mapalipay ang tanan, apan alang sa kadaghanan sa mga tawo, Iyang giusab ang ilang kinabuhi.

Tungod sa ehemplo ni Jesukristo, nakahukom ko nga mosulay sa pagpakighigala, bisan pa sa kahadlok nga anaa kanako. Nahadlok ko kay maulawon ko ug nabalaka nga himoon kong kataw-anan sa mga tawo. Apan aduna akoy hunahuna, “Ikaw adunay Langitnong Amahan nga motabang nimo. Bisan kon ang tanan mosalikway nimo, Anaa Siya.”

Karon sa paglantaw og balik sa nangagi, akong nakita nga ang usa ka Higala nga wala gyod mobiya nako niadtong higayona mao ang Manluluwas. Tungod sa malisod nga mga kasinatian nga akong naagian, nahimo kong suod kaayo Kaniya. Dako kaayo ang Iyang gugma kanato nga gihatag Niya ang Iyang kaugalingong kinabuhi alang kanato. Ug gihatagan Niya kita sa mga kasulatan aron mahibaloan kon unsaon nga mahimong sama Kaniya. Kanunay nimong masaligan si Jesukristo nga mahimo nimong higala.