Kaugtas, ang Espiritu, ug ang mga Kasulatan

Paghulagway pinaagi ni Katelyn Budge

Nagsige ko og balhin-balhin og puluy-anan sa tibuok nakong kinabuhi. Pipila ka tuig ang milabay, mibalhin mi sa Dubai sa mubong panahon. Dihang akong gihabwa ang sulod sa akong maleta, ang kataposan nga anaa sa ilawom mao ang akong mga kasulatan. Naghunahuna ko nga angay ko kining basahon. Gibuhat nako, nga medyo talagsaon kaayo kay kasagaran dili ko maayong mosunod sa mga pag-aghat. Apan nagsugod ko gikan sa sinugdanan gyod, ug murag nagbasa ko og lima ngadto sa unom ka kapitulo.

Mga adlaw ang milabay, gihangyo ko sa paghatag og pakigpulong sa miting sa sakramento. Duna koy impresyon nga maghisgot mahitungod sa importansiya sa pagtuon sa kasulatan. Gisulat nako ang akong pakigpulong ug naghunahuna, “Wow, kinahanglan gyod nga permihon pa gyod nako ang akong pagbasa sa mga kasulatan.” Murag nahimo usab kadto nga kompetisyon nako ug sa akong papa. Ning-abot na siya sa Alma, ug gusto ko nga mogukod niya. Nagsugod ko sa pagbasa sa akong mga kasulatan kada adlaw—usahay mga 10 o 15 ka kapitulo!

Hinayhinay kong nakabatyag og mas daghang espirituwal nga mga kasinatian. Kon nagbasa ka og ingon niana kadaghan, mohatag kini nimo og panahon nga makadawat og personal nga pagpadayag. Naggahin gyod ko og panahon alang sa Ginoo.

Nagsugod ko sa pagsulat og espirituwal nga journal. Sa usa ka entry, misulat ko, “Nagbasa ko sa 3 Nephi mahitungod kon giunsa ni Jesukristo pagkanaog ngadto sa katawhan ug sa tanang maanindot kaayo nga mga butang nga Iyang gihimo. Gibati nako nga suod kaayo ako sa Langitnong Amahan ug ni Jesukristo karong adlawa.”

Nasurpresa gyod ko kon unsa ka daghan ang akong mga kasinatian, ilabi na sa dihang nangita ko niini. Nakaingon ko, “Wow, kadaghan gyod nakig-istorya nako ang Dios.”

Ang pagtuon sa kasulatan nakatabang gyod nako, ilabi na sa tanan nakong mental nga kaugtas tungod sa pagsige og balhin-balhin og puluy-anan. Ang mga kasulatan mga pulong ni Kristo. Makigsulti Siya nato pinaagi niini. Pinaagi sa Iyang mga pulong, nakahimo ko sa pagpaduol ngadto Kaniya.