Ang mga Panalangin sa Awtoridad ug Gahom sa Pagkapari

Si Jesukristo mao ang pangulo sa Simbahan. Ang Simbahan mao ang instrumento nga Iyang gihimo aron mapatuman ang mahinungdanon nga buhat sa pagtubos sa katawhan. Pinaagi sa Simbahan, makahimo Siya sa:

• Pagsangyaw sa Iyang ebanghelyo sa tibuok kalibotan.

• Pagtanyag og bunyag og tanang ordinansa—gani ang dalan sa pakigsaad ngadto sa Iyang celestial nga gingharian.

• Paghiusa sa mga pamilya alang sa kahangtoran.

• Pagtanyag sa mga gasa sa kaluwasan, gani niadtong namatay na nga wala makaangkon niini.

• Pagpangalagad sa pisikal nga mga panginahanglan sa mga anak sa Dios niining panahona.

Jesus Teaching Mary [Jesus Nagtudlo ni Maria], ni Dan Burr

Aron mapatuman kining halangdon nga mga katuyoan, ug aron maandam alang sa pagbalik sa Manluluwas, ang Simbahan nanginahanglan sa padayon nga paghatag og direksiyon, awtoridad, ug gahom sa Dios. Ang Simbhan mao ang “tinuod ug buhi nga simbahan” (Doktrina ug mga Pakigsaad 1:30) tungod kay gigahinan kini ni Kristo sa Iyang pagpangulo ug gahom pinaagi sa Iyang pagkapari.

Kon wala kining balaan nga pagkapari, ang Simbahan mahimo lamang nga usa ka temporal nga organisasyon nga sama sa uban, naghimo og daghang maayo dinhi sa kalibotan apan walay gahom sa pagtuman sa katuyoan sa pag-andam sa mga anak sa Dios alang sa kalipay ug kinabuhing dayon sa Iyang presensiya. Pinaagi niini nga pagkapari, ug sa mga yawe sa paghatag og direksiyon sa buluhaton niini nga pagkapari, anaa ang awtoridad ug kahan-ay sa Simbahan.

“Sa Simbahan, ang tanang awtoridad sa pagkapari gigamit ubos sa direksiyon niadtong naghupot sa mga yawe sa pagkapari.

Ang takos nga lalaki nga mga miyembro sa Simbahan modawat sa awtoridad sa pagkapari pinaagi sa pagtugyan sa pagkapari ug ordinasyon ngadto sa mga katungdanan sa pagkapari. Ang tanang miyembro sa Simbahan makagamit sa gidelegar nga awtoridad samtang sila i-set apart o sangonan sa pag-abag sa paghimo sa buhat sa Dios.”

Samtang gihubad ang Basahon ni Mormon niadtong 1829, gisugdan sa Ginoo ang pagpahiluna sa organisasyon sa Iyang pagkapari. Agig tubag sa pag-ampo ni Joseph Smith ug Oliver Cowdery kabahin sa bunyag, ang nabanhaw nga si Juan Bautista mipakita ug mikomperma sa Aaronic nga Pagkapari ngadto kanila, nga “naghupot sa mga yawe sa pagpangalagad sa mga anghel, ug sa ebanghelyo sa paghinulsol, ug sa bunyag pinaagi sa pagpaunlod alang sa kapasayloan sa mga sala” (Doktrina ug mga Pakigsaad 13:1). Pinaagi niana nga awtoridad, si Joseph ug si Oliver mibunyag sa usag-usa ug sa uban samtang pormal nga giorganisar ang Simbahan.

Sa wala madugay, ang karaang mga Apostol nga sila si Pedro, Santiago, ug Juan mipakita ug mikomperma sa mas taas o Melchizedek nga Pagkapari, lakip na sa “mga yawe sa akong gingharian, ug sa dispensasyon sa ebanghelyo … sa kataposang higayon!” (tan-awa sa Doktrina ug mga Pakigsaad 27:12–13; 128:20).

Dugang nga awtoridad sa pagkapari miabot sa dihang ang tulo ka karaang mga propeta, si Moises, Elias, ug Elijah, mipakita kang Joseph ug Oliver didto sa Kirtland Temple ug mihatag ngadto kanila sa mga yawe sa pagpundok sa Israel ug sa buluhaton sa mga templo sa Ginoo (tan-awa sa Doktrina ug mga Pakigsaad 110:11–16).

Sa mubo nga pagkasulti, ang katuyoan sa awtoridad ug gahom sa pagkapari nga gipahiuli ni Jesukristo mao ang pagpanalangin. Nagtugot kini sa tanang miyembro sa Simbahan sa paggamit sa gahom sa Dios pinaagi sa pagserbisyo ug sa pagpanalangin sa uban diha sa Simbahan, sa panimalay, ug sa tibuok kalibotan. Ang mga miyembro nag-apil sa Manluluwas sa pagtuman sa Iyang gimbuhaton sa kaluwasan ug sa kahimayaan, naggamit sa balaang mga gasa ug gahom nga labaw pa sa ilang kaugalingong gahom aron motabang nga ang gingharian sa Dios molambo aron mopuno sa yuta (tan-awa sa Doktrina ug mga Pakigsaad 65:2, 5–6).

Ang Ginoo namahayag nga “kining labaw [Melchizedek] nga pagkapari nangalagad sa ebanghelyo ug naghupot sa yawe sa mga misteryo sa gingharian, gani ang yawe sa kahibalo sa Dios.

“Busa, diha sa mga ordinansa niana, ang gahom sa pagka-diosnon gipakita” (Doktrina ug mga Pakigsaad 84:19–20).

Ang mga ordinansa mao ang mga seremonya nga gipangalagad pinaagi sa pagkapari nga pinaagi niini mohimo kita og mga pakigsaad ngadto sa Dios, sugod sa bunyag ug hangtod sa mga pakigsaad nga madawat sa sulod sa balay sa Ginoo. Diha sa pagtuman niini nga mga pakigsaad mausab kita gikan sa “kinaiyanhon” nga mga lalaki ug mga babaye ngadto sa pagkahimong mga santos (tan-awa sa Mosiah 3:19) pinaagi sa maulaon nga grasya ni Kristo ug mahimong mahatagan og kaangayan ug mabalaan—dili sad-an ug walay mantsa—sa atubangan sa Dios (tan-awa sa Doktrina ug mga Pakigsaad 20:29–31; 3 Nephi 27:16–20).

Christ in America [Kristo didto sa Amerika], ni Ben Sowards

“Ang Pagpahiuli sa Kahingpitan sa Ebanghelyo ni Jesukristo: Usa ka Pamahayag ngadto sa Kalibotan sa Ikaduhang Siglo nga Kasaulogan,” nga gimantala sa Unang Kapangulohan ug sa Korum sa Napulog Duha ka Apostoles, nagpahayag og haom nga minubo nga saysay:

“Kami modeklarar nga Ang Simbahan ni Jesukristo sa mga Santos sa Ulahing mga Adlaw, nga giorganisar niadtong Abril 6, 1830, mao ang Simbahan ni Kristo sa Bag-ong Tugon nga gipahiuli. Kini nga Simbahan nakaangkla sa hingpit nga kinabuhi sa ulohang bato sa pamag-ang niini, si Jesukristo, ug diha sa Iyang walay kinutoban nga Pag-ula ug literal nga Pagkabanhaw. Si Jesukristo mitawag na usab og mga Apostol ug mihatag kanila og awtoridad sa pagkapari. Nagdapit Siya kanatong tanan sa pagduol ngadto Kaniya ug sa Iyang Simbahan, sa pagdawat sa Espiritu Santo, sa mga ordinansa sa kaluwasan, ug sa pag-angkon og malungtarong kalipay.”