Mga Timailhan sa Ikaduhang Pag-anhi: Walay Hinungdan nga Mahadlok
May pipila ka ngilngig nga mga butang nga gipanagna sa dili pa moanhi pag-usab ang Manluluwas. Apan may maayo kamong mga rason nga dili mahadlok.
He Comes Again to Rule and Reign [Siya Moanhi Pag-usab sa Pagmando ug Paghari], ni Mary R. Sauer
Ang atong Manluluwas, si Jesukristo, moanhi pag-usab. Klaro ang Iyang pagtudlo niini nga kamatuoran (tan-awa sa Mateo 24). Daghang mga tawo ang gustong mahibalo kon kanus-a kini mahitabo, apan miingon si Jesus, “mahitungod sa maong adlaw ug takna, walay usa nga nasayod, bisan pa ang mga manulunda sa langit gawas sa Amahan lamang” (Mateo 24:36).
Apan, ang Ginoo mipadayag og ubang mga timailhan nga mahitabo sa dili pa ang Iyang Ikaduhang Pag-anhi. Daghan niini ang makapahinam ug talagsaon, sama sa Pagpahiuli sa ebanghelyo, ang pag-abot sa Basahon ni Mormon, ug ang pagpundok sa Israel.
Apan sa gihapon adunay … uban pang mga timailhan. Pananglitan:
-
Mga timailhan sa kalangitan (lakip na sa adlaw, sa buwan, ug sa mga bituon) ug diha sa yuta (lakip sa mga kalayo, mga unos, mga bagyo, ug mga hinungaw sa aso).
Kanang tanan daw makalilisang. Gani, miingon ang Manluluwas nga sa kataposang mga adlaw, daghan sa mga kasingkasing sa mga tawo ang dili na mobati tungod sa kalisang.
Karon, tingali matan-aw ninyo ang mga problema sa tibuok kalibotan, ingon man ang kaugalingon ninyong mga pagsulay nga inyong giatubang, ug mobati og sobra nga kabug-at ug kabalaka. Tingali naghunahuna mo kon unsay inyong mapaabot kon ang mga panghitabo mahimo lamang nga mas makahadlok ug mas lisod hangtod moabot ang Ikaduhang Pag-anhi.
Apan dili kini ang paagi nga gusto ni Jesukristo diin ikaw—usa sa Iyang mga disipulo—magpaabot sa Iyang pagbalik.
Ang Mensahe sa Manluluwas ngadto sa Iyang mga Disipulo
Bisan sa tanan nga kasamok ug kagubot sa kataposang mga adlaw, ang Manluluwas misulti ngadto sa Iyang mga disipulo “Ayaw kabalaka.” Ngano man? Kay “kon kining tanan nga butang mahinabo, inyong masayran nga ang mga saad nga gihimo nganha kaninyo matuman” (Doktrina ug mga Pakigsaad 45:35).
Si Jesukristo nagsulti kanato nga “ayaw kahadlok” (Doktrina ug mga Pakigsaad 50:41) ug ‘pagmalipayon” (Doktrina ug mga Pakigsaad 61:36). Mao nga, imbis magtutok sa mga katalagman nga moabot, labing maayo nga lahi ang tutokan.
Ania ang tulo ka importanteng mga paagi nga kamo “dili mahadlok,” maglantaw sa mahimayaon nga Ikaduhang Pag-anhi, ug moingon, uban ni Juan nga Tigpadayag, “Dali na, Ginoong Jesus” (Pinadayag 22:20).
1. Tan-aw ngadto sa Propeta
Ang Manluluwas mipahimangno nga adunay daghang mini nga mga Kristo ug mini nga mga propeta sa dili pa sa Iyang pag-anhi nga molingla sa daghang mga tawo. Sa atong palibot, adunay mga lanog, makalibog, ug negatibo nga mga tingog nga nagtinguha sa pagpahisalaag kanato. Sa ulahing mga adlaw, si Satanas “mopaulbo og kayugot diha sa kasingkasing sa mga anak sa mga tawo, ug mosulsol kanila ngadto sa pagkasuko batok niana nga maayo” (2 Nephi 28:20). Bisan gani ang labing mga pinili mapalayo gikan sa kamatuoran.
Ang Ginoo naghatag kanato og dako nga tabang. Nagtawag Siya og mga propeta aron manalangin ug mogiya kanato. Ang Unang Kapangulohan ug ang Korum sa Napulog Duha ka Apostoles dili mopahisalaag kanato. Ang Manluluwas mipahayag, “Bisan pinaagi man sa akong kaugalingong tingog o pinaagi sa tingog sa akong mga sulugoon, managsama ra kini” (Doktrina ug mga Pakigsaad 1:38). Makahangyo mo sa Langitnong Amahan alang sa Espiritu Santo aron mopamatuod sa mga kamatuoran nga ilang gitudlo, sama sa labing bag-o nga mga pagtulun-an ni Presidente Russell M. nelson: “Ang labing maayo moabot pa, … kay ang Manluluwas moanhi pag-usab!” Ug: “Siya nangandam aron moanhi pag-usab. Hinaot nga kita sa samang paagi mangandam sa pagdawat Kaniya.”
Ug samtang mosunod kamo sa ilang mga pagtulun-an “sa tumang pagpailob ug pagtuo” (Doktrina ug mga Pakigsaad 21:5), inyong makita kon giunsa niini sa pagpanalangin ang inyong kinabuhi.
Si Elder Allen D. Haynie sa Seveny nagsulti: “Niadtong bata pa ko, [ang] mga panagna kabahin sa kataposang mga adlaw nakapahadlok nako ug nakaaghat kanako sa pag-ampo nga ang Ikaduhang Pag-anhi dili [unta] moabot sa akong panahon. … Apan karon sukwahi na ang akong pag-ampo. …
“… Dili kita kinahanglang mahadlok. Ang doktrina ug mga baroganan nga kinahanglan atong sundon aron makasugakod sa espirituwal ug makalahutay sa pisikal nga paagi makita diha sa mga pulong sa usa ka buhi nga propeta.”
Samtang mosunod kamo sa paggiya sa mga propeta ug apostoles, ang inyong mga kahadlok mapulihan og pagtuo, paglaom, ug kalipay.
2. Barog sa Balaan nga mga Dapit
Ang Manluluwas nag-ingon nga taliwala sa mga katalagman sa ulahing mga adlaw, “ang akong mga tinun-an magbarog sa balaan nga mga dapit, ug dili mabalhin” (Doktrina ug mga Pakigsaad 45:32). Kining balaan nga mga dapit naglakip sa mga panimalay, mga meetinghouse, ug mga templo.
Mahitungod sa mga templo, si Presidente Nelson nagtudlo nga ang “atong [labing] luwas nga paniguro mao ang pagpadayon nga mahimong takos nga makasulod sa Iyang balaan nga balay.” Ug “ang pagdugang og panahon diha sa templo makatabang kanato nga maandam alang sa Ikaduhang Pag-anhi.”
Eventide [Kagabhion], ni Yongsung Kim
3. Andama ang Kalibotan
Usa ka importante nga responsibilidad sa Ang Simbahan ni Jesukristo sa kataposang mga adlaw mao ang pagtabang sa kalibotan nga maandam alang sa Iyang pag-anhi. Ug makatabang ka pinaagi sa pag-apil sa Iyang buhat.
Makapakigbahin mo sa ebanghelyo ngadto sa uban ug motabang sa pagdala sa kahayag sa Dios ug kamatuoran ngadto niadtong “kinsa natago gikan sa kamatuoran tungod kay wala sila masayod asa kini pangitaa” (Doktrina ug mga Pakigsaad 123:12).
Mahimo usab kamong mopahigayon og mga bunyag sa sulod sa templo alang niadtong anaa na sa pikas nga habig sa tabil kinsa nagpuyo ug “namatay nga wala kahibalo [sa] ebanghelyo, kinsa modawat unta niini” (Doktrina ug mga Pakigsaad 137:7).
Sa daghan kaayong mga negatibo sa kalibotan, puwede kang mahimong kahayag sa uban ug makatabang sa pagdala og pagkaayo sa kalibotan. Makatabang ka sa pag-andam og usa ka katawhan nga mahimong maadtohan sa Manluluwas kinsa andam nga modawat Kaniya.
Usa kana ka dakong responsibilidad ug usa ka butang nga maanindot nga laoman.