Pagpakigbahin og Kalipay didto sa Kenya
Dihang nakaplagan ni Robert ang ebanghelyo, kinahanglan gayod niyang ipakigbahin kini sa tanan niyang kaila. Seryoso, sa tanan—gayod.
Mga litrato pinaagi ni Leslie Nilsson ug Eric D. Snider
Sukad nga nabunyagan niadtong Agosto 2024, si Robert L., 18, nga taga-Kenya, nakadala og sobra sa 50 ka mga higala ngadto sa simbahan—ug nakabunyag og 25 kanila!
Bitaw,mao kana ang tanan nga gidaghanon dihang nakig-istorya mi niya pipila ka bulan na ang milabay. Tingali mas nidaghan na sila sukad niadtong panahona nga nagka-istorya mi.
Si Robert, usa ka miyembro sa Bukuru Branch sa Kisumu Kenya District, gipaila-ila sa Simbahan ni Jesukristo sa mga Santos sa Ulahing mga Adlaw niadtong sayo nga bahin sa 2024, sa dihang nakahimamat siya og tawo nga Amerikano nga naghimo og makitawhanon nga buhat sa Kenya.
“Wala gyod ko magdahom nga mahimong mas maayo ang akong kinabuhi,” miingon si Robert. “Walay kwarta ang akong mga ginikahan; dili sila makapa-eskwela nako.” (Sa Kenya, bisan ang pampubliko nga mga eskwelahan nagkinahanglan og kwarta.)
“Apan nasayod ko nga ang Langitnong Amahan motabang nako. Nagsugod ko sa pag-ampo ug pagbasa sa Bag-ong Tugon. Dayon nakahimamat ko sa akong esponsor.”
Ang iyang “esponsor” usa ka miyembro sa Ang Simbahan ni Jesukristo sa mga Santos sa Ulahing mga Adlaw kinsa nakapanalangin sa kinabuhi ni Robert sa duha ka paagi: mitabang siya kaniya nga maka-eskwela ug, labing importante, mipakigbahin kaniya sa ebanghelyo (sama sa laing batan-ong lalaki nga bag-ohay lang nga mipasakop sa Simbahan). Nabunyagan si Robert mga unom ka bulan human niadto.
Si Robert L. sa Kenya nakadapit og daghang mga tawo ngadto sa simbahan—mga silingan, mga kadungan sa eskwela, mga batang iyang kadula sa sports—ang tanan.
Pagbalos sa Kaayohan nga Nadawat
Natural lang gayod, gusto ni Robert nga mopakigbahin sa bag-o niyang mga panalangin ngadto sa uban. Dili siya maka-esponsor sa edukasyon ni bisan kinsa. Apan makatudlo gyod siya kanila sa ebanghelyo!
Misugod siya sa pagdapit og mga tawo ngadto sa simbahan—mga silingan, mga kadungan sa eskwelahan, mga batang iyang kadula sa sport—tanan nga iyang kaila. “Usa ka Dominggo nagdala ko og, mga, lima, dayon sa laing Dominggo nagdala ko og 10,” miingon siya. “Dayon akong gipadala ang mga misyonaryo ngadto nila aron makasabot sila ug makahibalo nga kini nga Simbahan tinuod ug makasinati sila kon unsay akong nasinati.”
Sa wala madugay ang ubang mga higala ni Robert mipili nga magpabunyag ug mihangyo niya nga mopahigayon sa ordinansa.
Ang Simbahan paspas nga naglambo sa Africa, usa ka hinungdan niini tungod sa mga disipulo nga sama ni Robert. Mibunyag siya og 10 ka tawo usa ka semana, 11 sa sunod nga semana, ug 4 “lang” sa misunod nga semana.
Gidapit ni Robert ang iyang mga higala sa iyang branch sa Simbahan, nga nagtigom sulod sa tolda sa kasagbotan nga lote.
Sobra sa usa ka dosena niadtong bag-ohay nabunyagan nga mga higala ang nakauban niya sa FSY conference didto sa Kenya sa miaging Disyembre, lakip sa usa ka higala nga nakabunyag na sa usa sa iyang mga higala.
Makita ba nga nag-anam og kapaspas? Ang kaayohan mobalik-balik ra!
Mibati sa Espiritu
Si Fredrick A., 17, misulti nga sa dihang ang iyang higala nga si Robert midapit niya sa simbahan, gibati niya ang Espiritu nga kusog kaayo nga dili niya kini ikalimod.
“Dihang miadto ko sa simbahan, ang Espiritu sa Dios gipadala ngari kanako,” miingon si Fredrick. “Dihang gihatagan ko og Basahon ni Mormon, misugod ko sa pagbasa niini. Kon dili ko makasabot, kanunay kong mangutana sa akong presidente sa branch ug mag-ampo.”
Si Robert (sa wala) ug Fredrick nagpabiling managhigala sukad nga gipaila ni Robert ngadto niya ang ebanghelyo.
Si Gift M., 18, mao ang usa ka lain pang higala nga gibunyagan ni Robert. “Nalipay ko nga nahimong kabahin sa tinuod nga Simbahan—ang bugtong tinuod nga Simbahan sa tibuok nga uniberso,” misulti si Gift nga nagpahiyom.
Nagpaabot si Gift nga magserbisyo og misyon.
Daghan sa mga tawo nga gidapit ni Robert sa simbahan mipili nga magpabunyag, ug nagdapit sila sa uban nga mosimba usab.
Daghan Pang Buluhaton sa Unahan
Nagplano si Robert nga moalagad og full-time nga misyon inig kahuman dayon niya og eskwela (mao usab si Gift ug Fredrick). Nganong gusto man niyang buhaton kana nga klarong nahibaloan na niya kon unsaon sa pagpakigbahin sa ebanghelyo?
“Kinahanglan ko nga magmisyon aron makasinati pa og daghan ug makat-on pa og daghan,” misulti si Robert. “Molig-on kini sa akong pagtuo ug mousab sa akong kinaiya. Mao kana ang gusto sa Dios nga akong buhaton.”
Wala pa mahuman si Robert sa pagpakigbahin sa ebanghelyo. Nagplano siya nga moserbisyo og misyon. “Mao kana ang gusto sa Dios nga akong buhaton,” misulti siya.