Si Jesukristo alang Usab sa Maayong mga Adlaw
Kon maayo ang dagan sa kinabuhi, unsaon nato nga padayong makatutok sa Manluluwas? Ania ang ubang mga ideya.
Hunahunaa kon ang usa ka higala makig-uban lang nimo kon nagkalisod siya ug molikay nimo kon malipayon siya. Maayo ba kana nga mga relasyon? Dili kaayo.
Gibuhat ba nato kana sa Manluluwas—mangita Kaniya sa panahon sa mga kalisod ug makalimot Niya sa maayong mga panahon?
Kadaghan maghisgot kita kon giunsa ni Jesukristo pagtabang kanato sa malisod nga mga panahon, tingali tungod kay ang tanan, sa usa o sa ubang higayon, nag-atubang og malisod nga mga butang.
Apan adunay mga adlaw—mga semana o gani mga tuig, kon swertehon ta—nga maayo kaayo ang dagan sa kinabuhi. Usahay makalimtan nato ang Manluluwas atol niini nga mga panahon. Nahitabo kini sa mga tawo sa Basahon ni Mormon. Miuswag sila gikan sa mga panalangin sa Dios sa mubong panahon apan sa kataposan nadaog sa garbo sa dihang nakalimot sila Kaniya.
Ang maayong mga panahon wala magpasabot nga sa kalit lang wala na kita magkinahanglan ni Jesukristo. Ang mga panahon sa kabulahanan mao ang perpektong mga panahon sa paglipay uban sa Manluluwas, dili ang pagkalimot Kaniya.
Nan unsaon nato nga padayong makonekta ni Jesukristo ug sa atong Langitnong Amahan sa higayon nga ang mga pagsulay dili mopahinumdom nato sa pagduol Kanila?
Magpabiling Mapainubsanon
Kon maayo ang dagan sa kinabuhi, maayo ang pagsaulog sa inyong mga panalangin ug mga kalamposan. Apan ayaw kalimti kon kinsa ang nagpahimong posible nga makaabot mo sa inyong nahimutangan karon. Giingon niini pagpasabot ni Hari Benjamin ang iyang pagsermon diha sa Basahon ni Mormon:
“Kay tan-awa, dili ba kitang tanan makililimos? Kitang tanan wala ba magsalig sa sama nga Binuhat, gani sa Dios, sa tanan nga kabtangan nga atong naangkon, sa pagkaon ug panapot, ug sa bulawan, ug sa pilak, ug sa tanang matang sa katigayonan nga atong naangkon?” (Mosiah 4:19).
Ang pagmapaubsanon sa inyong kalamposan pinaagi sa paghinumdom kon unsa ang nahimo sa Langitnong Amahan ug ni Jesukristo para ninyo maoy usa ka mahinungdanong paagi sa paglakip Nila sa inyong maayong mga panahon.
Magpabiling Mapasalamaton
Ang pagkamapasalamaton maoy usa ka labing maayong panguntra sa garbo ug pagkamalimtanon. Ang pagpasalamat sa Dios makatabang ninyo sa paghinumdom Kaniya ug sa tanang maayo nga gihimo Niya ug sa Iyang Anak sa inyong kinabuhi. Pareho kining epektibo alang sa maayong mga panahon ug sa malisod nga mga panahon.
Padayong Magmabinantayon
Ang usa ka paborito nga pag-atake ni Satanas mao nga “hupayon, ug anam-anamon [kamo] sa pagguyod ngadto sa kalibotanong kaharuhay,” (2 Nephi 28:21). Sa laing pagkasulti, ganahan siya nga mobati mo og dakong katagbawan ug kahilwasan sa inyong maayong mga panahon nga makalimot mo kon unsa ang labing mahinungdanon. Mao nga, ayaw kalimti ang Dios! Kon padayon kamong magmabinantayon sa malipoton nga mga paglingla sa kaaway atol sa maayong mga panahon, makapabilin kamong suod ngadto sa Langitnong Amahan ug ni Jesukristo.
The Good Shepherd [Ang Maayong Magbalantay], ni Michael Malm
Magpabiling Nakasentro ni Kristo
Si Presidente Russell M. Nelson mitudlo: “Kon ang sentro sa atong kinabuhi anaa sa plano sa Dios sa kaluwasan … ug ni Jesukristo ug sa Iyang ebanghelyo, mobati kita og kalipay bisan unsa pay mahitabo—o wala mahitabo—sa atong kinabuhi. Ang kalipay moabot gikan ug tungod Kaniya. Siya ang tinubdan sa tanang kalipay.”
Unsa ka sagad kang maghunahuna niini nga kamatuoran mahitungod sa kalipay kon maayo ang dagan sa kinabuhi? Dili lamang kini makahupay nga tambag kon malisod ang kinabuhi. Kanunay kining tinuod, lakip sa inyong labing maayo nga mga adlaw. Mao nga buhata ang tanan ninyong mahimo sa pagtutok kang Kristo, sa bati man o sa maayo nga panahon.