3 ka Paagi nga ang mga Propeta ug Apostoles Nagtudlo ngadto ni Kristo

Si Jesukristo mitudlo nga Siya namulong pinaagi sa Iyang mga propeta “sama og gikan sa [Iyang] kaugalingon nga ba-ba,” (Doktrina ug mga Pakigsaad 21:5). Kana nagpasabot nga sila nagtudlo sa Iyang ebanghelyo ug mohatag sa mga mensahe nga Iyang gikinahanglan nga atong madunggan.

Pananglitan, sa miaging komperensiya, si Presidente Dallin H. Oaks, Unang Magtatambag sa Unang Kapangulohan mitudlo kon sa unsang paagi nga si Jesukristo makatabang nato nga makabalik ngadto sa Langitnong Amahan:

“Labing seguro, ang labing lig-on nga mortal nga tabang sa Dios mao ang Iyang paghatag og usa ka Manluluwas, si Jesukristo, kinsa mag-antos aron mobayad sa kantidad sa sala ug mohatag og kapasayloan alang sa gihinulsolang mga sala. Kana nga maluluy-on ug mahimayaong Pag-ula nagpasabot kon nganong ang pagtuo diha ni Ginoong Jesukristo mao ang unang baroganan sa ebanghleyo.”

Ang mga baroganan nga gitudlo sa mga propeta ug apostoles motabang sa pagpalig-on sa atong hugot nga pagtuo diha ni Jesukristo. Atol sa kinatibuk-ang komperensiya, hunahunaa kini nga mga mensahe. Sa unsa nga paagi kini makapaduol ninyo ngadto sa Manluluwas? Pag-ampo aron makahibalo nga ang Iyang Apostoles nagtudlo sa kamatuoran.

Isip espesyal nga mga saksi ni Jesukristo, ang mga propeta ug apostoles nagpamatuod nga Siya buhi ug nga Siya mao ang Manluluwas sa kalibotan. Ikonsiderar kining gamhanan nga pagpamatuod gikan ni Presidente Henry B. Eyring, Ikaduhang Magtatambag sa Unang Kapangulohan:

“Ako usa ka saksi sa Pagkabanhaw sa Ginoo sama kasegurado ingon og ako atua didto uban sa duha ka disipulo diha sa balay sa dalan sa Emaus. Ako nasayod nga Siya buhi.

“Kini mao ang Iyang tinuod nga Simbahan—ang Simbahan ni Jesukristo. …

“Ako mopamatuod isip usa ka saksi sa nabanhaw nga Manluluwas ug atong Manunubos.”

Atol sa kinatibuk-ang komperensiya, hinumdomi kini nga mga pagpamatuod. Unsa ang inyong nakat-onan gikan niini? Unsaon ninyo pagpalig-on ang inyong kaugalingong pagpamatuod kang Jesukristo? Samtang mohatag kamo og pagtagad sa pinili nga mga saksi sa Manluluwas, ang Espiritu Santo mokompirma nganha kaninyo nga ang ilang mga pagpamatuod sa buhi nga Kristo tinuod.

Sama nga ang usa ka liso dili motubo kon dili kini bisbisan ug atimanon, ang atong mga pagpamatuod dili motubo kon dili nato kini amumahon. Kon ang mga propeta ug apostoles moimbitar nato sa pagbuhat, nagtanyag sila og makadasig nga mga paagi sa pagpalig-on sa atong mga pagpamatuod, pagpalawom sa atong relasyon ni Jesukristo, ug pagdawat sa gisaad nga mga panalangin sa Manluluwas.

Niadtong Abril 2025 nga kinatibuk-ang komperensiya, pipila lamang kini sa mga imbitasyon nga gihimo:

• Patuboa ang pagsalig sa atubangan sa Ginoo pinaagi sa pagpalambo sa inyong gugmang putli ug hiyas.

• Ihatag ang “patas nga oras, dili salin nga oras” ngadto ni Jesukristo ug sa Iyang ebanghelyo.

• Sauloga ang Pagkabanhaw ni Jesukristo nga mas tuyo nga mohinumdom atol sa panahon sa Pasko sa Pagkabanhaw.

• Pamalandongi ang Pag-ula sa Manluluwas nga mas kanunay ug sa mas matinud-anong paagi.

Pangita og mga imbitasyon nga sama niini samtang maminaw mo sa kinatibuk-ang komperensiya. Gihatag kini ilabi na alang nato niining mga panahona! Ang pagdawat ug pagbuhat niini mao ang labing maayong paagi nga mas makapaduol ngadto ni Jesukristo ug magpabilin nga luwas sa espirituwal nga paagi sa ulahing mga adlaw.

Si Presidente Russell M. Nelson mitudlo niini: “Ang dugay nang naestablisar sa Dios nga sundanan sa pagtudlo sa Iyang mga anak pinaagi sa mga propeta nagseguro kanato nga Siya mopanalangin sa matag propeta ug nga Siya mopanalangin niadtong mopatalinghog og propetikanhong tambag.” Samtang kamo mag-andam ug maminaw sa dinasig nga mga mensahe sa pinili nga mga propeta sa Dios, mas makahimo kamo sa pagbati sa gugma sa Manluluwas ug makasabot unsaon sa pagsunod Kaniya.