Ciqoma na Nona iSolisoli

Au via vosa ena dua na isolisoli baleti keda taucoko ena dina tawamudu e yavutaka na noda rawa ni ciqoma na veika kece e gadreva tu na Tamada me solia vei keda—e dua na kilaka bibi, ni ciqomi vakataucoko tu ka ciqomi ena loma ni yaloda, ena vakamatatataka na reki kei na dredre ni bula kei na vakatataro tawasaumi rawa: Oya ni da sa luve ni Kalou vakaidina. Esa vakarisiyate! Veivakurabuitaki! Na dina oqo e sega ni vosa vakaibalebale.

Na salatu o sa lakova tiko sai koya na Nona ituvatuva ni marau. Isa, sa gadreva dina o Koya mo lesu tale Vua ena dua na siga, mo ciqoma na inaki cecere ni Nona isolisoli totoka kecega, na bula tawamudu vata kei Koya.

O rawa ni lako vei Karisito ena yalodei ena Nona yalololoma ka ciqoma na Nona isolisoli kece sara ni reki, vakacegu, inuinui, rarama, dina, ivakatakila, kilaka, kei na vuku—ni laveti tu na ulumu, dodoki ka tadola na ligamu, mo vakarau ciqoma. Ka rawa ni o ciqoma na isolisoli oqo baleta ni ko sa tudei ka yavutaki tu ena kilaka nio sa luvena yalewa lomani na Kalou, o iko e dua na luvena tagane vakamareqeti na Kalou, ka sa solia vei iko o Koya na Luvena tabu vinaka sara, me vueti iko, vakadonui iko, ka vakatabui iko.

Ciqoma tale na isolisoli oqo, se ciqoma dina ena matai saraga ni gauna, ka raica me veisautaka na veitiki kece ni nomu bula. Oqo na sala uasivi duadua sa vakarautaka vei iko na Kalou ena vuku ni solisoli ni Luvena. O iko mo rawata sara na reki!