Noda Vakavakarau ni Sotava na iVakabula

Ni vosa o Peresitedi Nelson me baleta na iKarua ni Lako Mai, esa dau ka rekitaki dina. Ia, a tukuna vei au e dua na goneyalewa ena Lalai ena dua na gauna lekaleka sa oti ni dau nuiqawaqawa ena veigauna kece e cavuti kina na iKarua ni Lako Mai. E kaya o koya, “Au rere baleta ni na yaco na veika ca ni bera ni lesu tale mai o Jisu.”

Na ivakasala vinaka duadua vua, vei iko, kei au o ya mo muria na ivakavuvuli ni iVakabula.

Ni voleka ni cava na Nona cakacaka vakalotu ena bula oqo, a tarogi o Jisu Karisito se gauna cava ena lako tale mai kina.

A tukuna taumada na iVakabula na vosa vakatautauvata ni tini na goneyalewa.

Na lesoni bibi ni vosa vakatautauvata oqo me baleti iratou na tini na goneyalewa savasava sai koya ni da sa yalomatua nida ciqoma na kosipeli, vakasaqara me tiko vata kei keda na Yalo Tabu, ka levea na veivakaisini. Sa dodonu meda cakava oqo me baleti keda.

A qai tukuna na iVakabula na vosa vakatautauvata ni taledi.

E dua na itukutuku ni vosa vakatautauvata oqo sa ikoya ni sa namaka tiko na Kalou meda vakalevutaka na gugumatua sa soli vei keda, ia e sega ni vinakata o Koya meda vakatauvatana na noda rawaka kei na nodra tale eso.

Kena itinitini, a tukuna na iVakabula na vosa vakatautauvata ni sipi kei na me.

Na lesoni ni vosa vakatautauvata ni iVakabula me baleta na sipi kei na me oya meda na vakayagataka na isolisoli sa soli tu vei keda—gauna, taledi, kei na veivakalougatataki—me da qaravi ira kina na luvena na Tamada Vakalomalagi, vakabibi o ira ka malumalumu sara ka vakaleqai tu.

Na noqu veisureti kivua na gone nuiqawaqawa ena Lalai au a tukuna taumada, kei kemuni yadua, moni muri Jisu Karisito ka vakararavi kina Yalo Tabu me vaka tu kina dua na itokani vakamareqeti.