Soqoni ena Yakavi ni Sigatabu
Yalodei ena iserau ni Kalou
Veitikina lavetaki
Nida cakava ka maroroya na veiyalayalati kei na Kalou, sa rawa nida yalodei ka sucu ena Yalotabu. A kaya na Turaga vua na Parofita o Josefa Simici ni noda yalodei e rawa ni “vakaukauwataki ena mata ni Kalou.”
Niu tukuna tiko na yalodei vua na Kalou, au vakaibalebaletaka tiko na yalodei meu torova na Kalou ena gauna sara ga oqo!
Ia, eda na rawata vakacava na yalodei vakaoqo?
Ena nona vosa sara ga na Turaga, na loloma cecere kei na ivalavala dodonu e dolava na sala kina yalodei vua na Kalou!
iMatai, na loloma cecere.
Na loloma cecere dina vei ira na tamata kecega sa ivakatakilakila ni dautataro! Sa ka bibi sara me tiko vei keda na loloma cecere ena noda vunau, e matanalevu kei na tamata yadua.
Meda vakatakekere vua na Tamada Vakalomalagi me vakasinaita na yaloda ena loloma cecere cake—vakauasivi vei ira e dredre me da lomana—ni loloma cecere sa isolisoli mai vua na Tamada Vakalomalagi vei ira na daumuri dina i Jisu Karisito.
Ia, meda tukuna mada na ivalavala dodonu. E tukuna vei keda na Turaga meda ukutaka tikoga na noda vakanananu ena ivalavala dodonu. Na ivalavala dodonu ena vinaka cake ka marau kina na veika kecega! Na ivalavala dodonu ena sereki iko mai na vakanananu nuiqawaqawa, ka veivakaleqai.
Na madigi cecere e tu e matada sai koya meda yaco me tamata e gadreva vei keda na Kalou.
Au sureti kemuni mo ni taura na ikalawa vakainaki mo ni tubu kina na nomuni yalodei vua na Turaga. Ia, nida lako vua na Tamada Vakalomalagi ena yalodei levu cake, eda na vakasinaiti ena reki vakalevu cake, ka na tubu cake na nomu vakabauti Jisu Karisito. Eda na tekivu vakila na kaukauwa vakayalo ka uasivia na noda inuinui cecere duadua.