Ia Eda Tukuni Karisito

O ira na parofita bula ena noda gauna—ka ra ciqoma na ivakatakila mai vua na Kalou me vakatavulici ka liutaki keda—sa sureti keda tiko meda lako mai vei Karisito. E rawa ni da cavuta e vuqa na ivakaraitaki ni veivakadodonutaki kei na veivakatorocaketaki eratou sa kacivaka na Mataveiliutaki Taumada ka tuvanaki me vakatabakiduataki keda vei Jisu Karisito.

Meda raica mada vakavoleka na revurevu ni so vei ira oqo. Matai, na ivakatakilakila ni Lotu.

Na ivakatakilakila oqo e vakaraitaka na dina ni o Karisito e tiko ena uto ni Nona Lotu ka sa dodonu me tiko ena uto ni noda bula.

Na ivakatakilakila oqo e ivakaraitaki ni loloma ni iVakabula o Jisu Karisito ka sa ivakananumi tudei ni bula tiko na Karisito.

Me da vakasamataka mada na bibi ni Siganimate. Me vakalekalekataki, eda sa vakauqeti meda marautaka vakalevu cake ka vakabibi na Siganimate.

Na Siganimate e vakatara vei keda meda doka ruarua na solibula ni veisorovaki i Jisu Karisito kei na Nona Vakaturicake lagilagi.

Me vaka ni sa tubu cake tiko na ivakarau vei ira na daunilotu Vakarisito me ra raica na Tucaketale ena vosa vakaibalebale kei na ivakatakarakara, eda vakadeitaka na noda ivunau ni “Tucaketale e kena ibalebale nio ira kece era sa bula oti era na tucake tale, ka sa ka dina na Tucaketale.” Sa tagutuva o Jisu Karisito na ivesu ni mate ki na tamata bula kecega.

Meu tinia, au vakadinadinataka nio ira kece ka ciqoma na veisureti mai vua na noda parofita bula kei rau na nona daunivakasala ni nanuma dei tu na veika tabu e matataka na Siganimate ena raica ni sa qaqaco sara na kedra isema kivei Jisu Karisito.