“Dou Toro Voleka mai vei Au”

Ena so na gauna eda dau vakila nida voleka cake vua na iVakabula o Jisu Karisito. Ia, ena so na gauna ena noda vakatovolei ni bula oqo, eda vakila nida yawa mai Vua ka gadreva na veivakadeitaki ni kila o Koya na veika e tu e yaloda ka lomani keda vakayadua.

E lomani keda yadua o Jisu Karisito. E solia o Koya na madigi o ya me toro voleka yani Vua. Me vaka vua e dua na itokani dauloloma, o na cakava ena sala vata ga, ena nomu veitaratara ena masu vua na Tamada Vakalomalagi ena yaca i Jisu Karisito, vakarorogo kina veidusimaki vakamareqeti mai vua na Yalo Tabu, ka qai qaravi ira na tani ena vuku ni iVakabula ena marau.

Me vakataki ira ga na Nona tisaipeli lomani, na luvena vakayadua na Tamada Vakalomalagi era digitaka me curu mai ena matamata ni papitaiso era sa yalataka me ra ivakadinadina bula ni iVakabula ka qaravi ira era leqa tu ena gauna taucoko ni bula oqo.

Nio sa yalodina kina veiyalayala oqo, ona raica ni na maroroya na Turaga na Nona yalayala me duavata kei iko ena nomu veiqaravi, ka vakamamadataka na nomu icolacola. O na kila tu na iVakabula, ka na yaco mo vakataki Koya ka “vakataucokotaki vua.” Ena nodra vukei na tani kivua na iVakabula, ona raica nio sa volekati Koya.

Nio sa vauca na nodra mavoa o ira era vakaleqai, ena tokoni iko na kaukauwa ni Turaga. Ena dodoka yani o Koya na ligana kei na ligamuni me veivuke ka vakalougatataki ira na luvena na Tamada Vakalomalagi.

Na italai veiyalayalati yadua i Jisu Karisito ena ciqoma na Nona veidusimaki mai na Yalotabu nira vakalougatataki ka qaravi ira na tani ena Vukuna. Era na qai vakila na loloma ni iVakabula ka kunea na reki ena nodra toro voleka ki Vua.