Vakamareqeti ni Bula

Ena so na gauna, na veilecayaki dredre ka mosimosi e rawa ni salavata kei na taqomaki ni bula.

E rua na vosa e dau kabi vata kei na vakalou ni sucu vakayago: na bula kei na digidigi. Na bula sa tiki vakamareqeti sara ni Nona ituvatuva uasivi sara na Tamada, kei na Nona lewa eda vakamareqeta ka maroroya kina na bula; eda digitaka na tomani ni bula ni sa kunekunetaki. Eda vakamareqeta talega na isolisoli ni digidigi, ni galala ni digidigi—veivuke ena kena vaqaqacotaki na digidigi dodonu e vakadonuya na Kalou ka kauta mai na marau tawamudu.

Na susugi kei na taqomaki ni bula se bera ni sucu e sega ni dua na itutu vakapolitiki. Oqo e dua na lawa ni bula savasava ka vakadeitaka na Turaga mai vei ira na Nona parofita.

Meda vosa vakawasoma ena vakabauta kei na yalololoma vei ira na noda itabagone ena noda itikotiko, kei ira yadua ena noda soqoni ni iSoqosoqo ni Veivukei kei na kuoramu ni italatala qase, me baleta na lawa ni tiko savasava ni Turaga, na savasava ni bula, kei na nodra qaravi na se bera ni sucu kei ira na tinadra.

Kivei kemuni kece era vakarorogo tiko ka sa sotava na mosi titobu kei na veivutuni ni vakalutu se vakaitavi ena vakalutu, yalovinaka nanuma tiko: E dina ga ni da sega ni rawa ni veisautaka na veika sa oti, sa rawa vua na Kalou me vakabula na veika sa oti. Na veivosoti e rawa ni yaco mai ena cakamana ni Nona loloma vakalou veisorovaki, nio gole Vua ena yalo malumalumu ka veivutuni.

Kemuni na taciqu kei na ganequ lomani, sa dua na kauwai bibi na kena sa lutu sobu tiko na nodra lomani ira na gone se bera ni sucu e vuravura raraba. E vakamareqeta na bula na Kalou. Sa Nona cakacaka kei na Nona lagilagi me kauta mai na tawamate rawa kei na bula tawamudu vei ira na Luvena. Nida tisaipeli i Jisu Karisito, eda dau vakamareqeta na bula.