Na Gauna ni Vakalesuimai ni Ka Kecega

Na tauyavutaki taumada ni Lotu i Jisu Karisito ni Yalododonu Edaidai esa itekitekivu ni cakamana veitaravi e sotavi tu.

Na rairai ni Tamada kei na Luvena vei Josefa Simici, na vakadewataki kei na tadu mai ni iVola i Momani, kei na vakalesui mai ni lewa kei na idola ni matabete esa gadrevi taumada kina kena tauyavutaki na Lotu vakalesui mai ni Turaga ena 195 na yabaki sa oti nikua.

Ni oti e dua na yabaki mai na kena tauyavutaki na Lotu, a vakasalataki Josefa Simici na Turaga ni idola ni matanitu ni Kalou sa “soli tale vei ira na tamata e vuravura” kei na “kosipeli [i Jisu Karisito] ena qiqi yani kina iyalayala kei vuravura, me vaka na vatu sa kavida mai na ulunivanua ka sega ni ta ena liga.”

Au vakadinadinataka: Sa vakayacora tiko na Turaga na Nona yalayala.

Me tiki ni parofisai ni vakalesui mai ni ka kecega ena iotioti ni gauna, era a vakatikora vakataki ira na parofita kei na iapositolo ena gauna eliu na lewa ni matabete vei Josefa Simici ka solia vua na idola ni matabete.

Na cakacaka ni Turaga ena iotioti ni gauna “sa dua na inaki ka sa taleitaki ira na tamata ni Kalou ena veitabayabaki kecega; oqo e dua na ulutaga era dau marautaka na parofita, bete kei na tui; era sa nanamaki tiko ena reki kina siga eda bula tiko kina; ka ra sa vakayavalati ena nanamaki vakalomalagi ka rekitaki era sa lagasere ka vola ka parofisaitaka na veika oqo ena noda gauna.”

Na “itukutuku vinaka“ bibi ka lagilagi duadua e rawa ni ciqoma e dua na tamata ena dua na vanua e vuravura sai koya ni sa vakalesuya mai na Turaga o Jisu Karisito na Nona kosipeli kei na Lotu ena iotioti ni gauna.

Na Lotu i Jisu Karisito ni Yalododonu Edaidai esa Lotu ni Veiyalayalati Vou i Karisito vakalesuimai.