Rokova na Veika Tabu

Vaka tisaipeli i Jisu Karisito, eda sa sureti meda vakabulabulataka na isolisoli ni vakarokoroko ena noda bula me rawa nida tadolavi keda kina dua na veimaliwai titobu vata na Kalou kei na Luvena, o Jisu Karisito, ka vaqaqacotaka sara na noda ivakarau ni bula vakayalo. Ke me ovici keda tu na veiyalo vakaoqori, ena sega ni vakatitiqataki na levu ni reki kei na marau ena noda bula, ka na lailai sara na rarawa kei na yaluma.

E ka ni rarawa, nida bula tiko ena dua na vuravura ka sega ni matau tu kina na vakarokorokotaki ni veika tabu.

Na tawarokovi ni veika tabu sa tomana na inaki ni meca me vakasaurarataka na noda sala tudei ni vakatakila, ka sa bibi sara kina noda bula vakayalo ena veisiga.

Kemuni na taciqu kei na ganequ, na rokovi ni veika tabu e vakavurea na vakavinavinaka dina, vakarabailevutaka na marau dina, vagolea na noda vakasama kina ivakatakila, ka vakamarautaka sara na noda bula. E vakatikora na yavada ena vanua tabu ka laveta na yaloda kivua na Kalou.

Au vakadinadinataka vei kemuni nida segata meda vakayacora na ivalavala dodonu vakaoqo kina noda bula ena veisiga, ena vakalevutaki na noda yalomalumalumu, vakarabailevutaki na noda kila na loma ni Kalou vei keda, ka vaqaqacotaki na noda yalodei ena yalayala ni veiyalayalati eda sa cakava vua na Turaga. Au vakadinadinataka nida sa ciqoma na isolisoli oqo ena rokovi ni veika tabu—ena ulunivanua ni vale ni Turaga, ena dua na valenisoqoni, se ena noda itikotiko—eda na vakasinaiti ena kurabui kei na qoroqoro nida sema tu kina loloma uasivi sara ni Tamada Vakalomalagi kei Jisu Karisito.