Sauniga o le Afiafi o le Aso Sa
Migao mo Mea Paia
O Nai Vaega
I le avea ai ma soo o Iesu Keriso, ua valaaulia i tatou e atia’e le meaalofa o le migao i o tatou olaga ina ia tatala atu ai i tatou lava i se fesootaiga loloto atu ma le Atua ma Lona Alo o Iesu Keriso, ma faamalolosia ai foi o tatou tagata faaleagaga. A tele atu na lagona i o tatou loto, o le a le taumate le sili atu o lo tatou olioli ma le fiafia i o tatou olaga, ma o le a itiiti ai se avanoa e faavauvau ma faanoanoa ai. …
Ae paga lea, ua tatou ola i se lalolagi ua matuai faateleina ai le lē masani e faaalia le migao mo mea paia. …
… O le lē migao i mea paia, e atili faateleina ai faamoemoega o le fili e ala i le faalavelaveina o o tatou ala o faaaliga ia e taua mo lo tatou tumau faaleagaga i lo tatou taimi. …
O’u uso e ma tuafafine, o le migao mo le paia e aumaia ai le lotofaafetai faamaoni, e faalautele ai le fiafia moni, e tata’i atu ai o tatou mafaufau i faaaliga, ma aumaia ai le olioli sili atu i o tatou olaga. E tuuina ai o tatou vae i luga o eleele sa, ma siitia ai o tatou loto i le Atua.
Ou te molimau atu ia te outou, a o tatou finafinau e tuufaatasia lena mana i o tatou olaga i aso taitasi, o le a mafai ona tatou faateleina lo tatou lotomaualalo, faalautele lo tatou malamalama i le finagalo o le Atua mo i tatou, ma faamalolosia lo tatou talitonu mautinoa i folafolaga o feagaiga na tatou osia ma le Alii. Ou te molimau atu a tatou talia lenei meaalofa o le migao mo mea paia—pe i le mauga o le fale o Ieova, i se faletapuai, pe i o tatou lava fale—o le a faatumuina i tatou i le maofa maoa’e ma tatou te ofo a o tatou fesootai atu i le alofa atoatoa o lo tatou Tama Faalelagi ma Iesu Keriso.