O Oe o le Keriso

O Mea Na Ia Tatalo Ai E Le Mafai Ona Tusia, saunia e Casey Childs

Ina ua i le vasega fa lo ma atalii o Eli, sa faatuina e lana vasega se faigamalo faafoliga, lea na filifilia ai o ia e ana uo e avea ma faamasino o le vasega. I se tasi aso, sa asiasi atu ai se faamasino moni mai le Faamasinoga o le Itumalo Lona 2 a Iuta, ma tuu ana toniga faafaamasino i luga o Eli, ona faatautaia lea o se faatautoga o le tofi mo la latou vasega. O lea mea na faamumūina ai ia Eli laitiiti se faanaunauga e suesue i le tulafono, ma le Faitulafono Lava Ia, o Iesu Keriso.

I le mavae ai o tausaga o ni taumafaiga filiga, sa maua ai e Eli se valaaulia mo se faatalanoaga i se tasi o ana filifiliga pito i luga mo le aoga faaloia. Sa ia faailoa mai, “… O le fesili faaiu o le, ‘O fea e faapogai ai le tapasa o lou tamali’iaga?’ … Sa ou fai atu afai e ola tagata uma i aoaoga a Iesu Keriso i le Lauga i luga o le Mauga, o le a sili ona lelei ma toafilemu le lalolagi.” Ona uma ai lea o le faatalanoaga, ma sa ia mafaufau ifo ia te ia lava, “Ia ua uma ai foi a’u miti faatamaitiiti. E leai se tasi o le poto salalau e manao e faalogo e uiga ia Iesu Keriso.

O le lua vaiaso mulimuli ane, na taliaina ai Eli ma sa maua se sikolasipi. A o le’i tuuto atu i ai, sa matou asiasi atu i le lotoa. … O le mea e ofo ai, a o matou savavali e ui atu i le faletusi maoae ma alasavali malualii, sa matou vaaia ai i luga o fu’a ma ma’a o loo vaneina ai uiga paia mai le Lauga i luga o le Mauga.

O le Lauga i luga o le Mauga o le lauga ua mautinoa lava e aupito sili ona maoa’e ua fofogaina, na faataimua i ana aoaoga. E leai se isi lauga e mafai ona fesoasoani tatou te malamalama lelei ai i le tamalii o Iesu Keriso, Ona uiga paia, ma lo tatou faamoemoega laualuga e avea faapei o Ia. …

E manaomia ona tatou faasusulu atu le Malamalama o Iesu Keriso i tulimanu uma o o tatou olaga. …