Toamalie i le Afioaga o le Atua

Pe a tatou osia ma tausia feagaiga ma le Atua, e mafai ona tatou maua le toamalie lea e fanau mai le Agaga. Na ta’u atu e le Alii i le Perofeta o Iosefa Samita e faapea, o lo tatou toamalie e mafai ona “solo malosi i luma o le Atua.”…

Pe a ou talanoa atu i le i ai o le toamalie i luma o le Atua, o loo ou faatatau i le i ai o le toamalie e faalatalata atu ai i le Atua i le taimi nei lava! …

O lea la, e faapefea ona tatou maua lea ituaiga o toamalie?

… I fetalaiga a le Alii lava ia, o le alofa mamā ma le amiomamā e tatala ai le ala e maua ai le toamalie i luma o le Atua! …

Muamua, o le alofa mamā. …

O le alofa mamā moni i tagata uma, o le faailoga lea o i latou e faatupuina le filemu! E taua le i ai o le alofa mamā i a tatou talanoaga, i tulaga lautele ma tulaga tuma’oti. …

Ia tatou aioi atu i lo tatou Tama Faalelagi e faatutumu o tatou loto i le alofa mamā sili atu—aemaise lava mo i latou e faigata ona alofa i ai—ona o le alofa mamā o se meaalofa mai lo tatou Tama Faalelagi mo soo moni o Iesu Keriso. …

Ia, sei o tatou talanoa i le amio mamā. Ua ta’u mai e le Alii ia i tatou ia teuteu o tatou mafaufauga e le aunoa i le mamā. … O le amiomamā e faaleleia atili ai mea uma ma tele atu ai le fiafia! … O le amio mamā o le a faasalotoina ai oe mai mafaufauga atuatuvale, ma le popolevale. …

… O le avanoa sili ua i o tatou luma o le avea lea ma tagata e finagalo le Atua e avea ai i tatou. …

… Ou te valaaulia outou ia faia ni faatinoga ma le loto atoa e faatupula’ia ai lo outou toamalie i luma o le Alii. A oo ai la ina tatou o atu i le Tama Faalelagi ma le toamalie faateleina, o le a faatumulia i tatou i le olioli sili atu, ma o le a faateleina lo outou faatuatua ia Iesu Keriso. O le a amata ona tatou maua le mana faaleagaga e silimamao atu i o tatou faamoemoega aupito silisili.