Faamamaina Faaleagaga ia te Ia

O le a faamalolo e le Matai Faamalolo o tatou puapuaga uma—faaletino ma faalelagona—i Lana taimi. Ae i le faatalitali ai ina ia faamaloloina, e mafai la ona faamama ai se tagata? …

O le faatuatua ia Iesu Keriso e maua ai le faamoemoe. Ou te maua le faamoemoe i le tauivi lea ia mamā—o se mamā e fanau mai i le faatuatua ia Iesu Keriso. O le faatuatua ia te Ia e faateleina ai lo’u faamoemoe mo le faamalologa, ma o lena faamoemoe e faamalosia ai lo’u faatuatua ia Iesu Keriso. O se faataamilosaga mamana tele. …

Ina ia mama o lona uiga ia mae’a ma atoa. E pei lava o taupou popoto e toalima o e sa tutumu a latou lamepa i suauu ina ua sau le faatoafaiava, e mafai ona tatou mama ia Iesu Keriso a o tatou faatutumu a tatou lamepa i le suauu faaopoopo o le liua ia te Ia. …

Ua poloaiina i tatou e faasoa atu Lona malamalama. O lea ia faatutumu a outou lamepa o le suauu o le liua ia Iesu Keriso ma ia saunia e teuteu ma faamumu tele pea a outou lamepa. Ona faasusulu atu lea o lena malamalama. A tatou faasoa atu lo tatou malamalama, tatou te aumaia le toomaga o Iesu Keriso i isi, e faalolotoina lo tatou liua ia te Ia, ma mafai ona faamamaina i tatou a o tatou faatalitali atu mo le faamalologa. Ma a tatou faasusulu tele atu o tatou malamalama, e mafai ona tatou fiafia a o tatou faatalitali. …

Uso e ma tuagane, o le tali o le ioe, e mafai ona faamamaina i tatou faaleagaga, e ui lava ina tatou faatalitali mo le faamalologa faaletino ma faalelagona. O le faamamaina e le faapea o le toefuataiga faaletino ma faalelagona i le olaga nei. O le faamamaina o le fanau i le faatuatua, ma le liua ia Iesu Keriso ma i le faatagaina o le malamalama o lena liua e susulu atu.