Na o Tusiga Faatekinolosi: Sau, Mulimuli Mai Ia Te A’u

Pe a Tatou Le Malamalama i Poloaiga

Saunia e Janae Castillo

O Mekasini a le Ekalesia

O nisi o poloaiga, atonu e foliga mai e le fetaui i le tatou vaai, o faailoga moni ia o le alofa o le Atua mo i tatou.

Pe na e faalogo ea i se tasi o faapea mai o poloaiga ua “na o ni faaputuga o tulafono”?

O le mea moni, o se fa’afaigofieina tele lea faaupuga. O nisi taimi, atonu tatou te le malamalama ai pe aisea e tuuina mai ai e le Atua poloaiga, po o le a foi o latou faamoemoega. Ae o le mea ua tatou malamalama i ai, o le Atua o lo tatou Tama Faalelagi alofa. Ma afai e alofa atoatoa o Ia ia i tatou (lea e faia e Ia!), o le a Ia tuuina mai ia i tatou poloaiga ona o le alofa ma le popole mo i tatou.

Se’i o tatou iloiloina ni faaa’oa’oga se lua i le auala e faaalia ai e le Atua lona alofa e ala i Ana poloa’iga.

O Le Upu o le Poto

O le Upu o le Poto o loo i ai ni taiala patino, mo se faataitaiga o le faatonuga e aua nei inu kofe, ava malosi, po o le lauti. Ae e le o i ai i le faaaliga se lisi o vailaau leaga uma . Sa tuuina mai o se “mataupu faavae faatasi ma se folafolaga” (Mataupu Faavae ma Feagaiga 89:3).

O le mea ua faaali mai e lenei faaaliga ia i tatou e alofa le Tama Faalelagi ia i tatou ma e popole i vaega uma o o tatou olaga. E aofia ai lo tatou manuia faaleagaga ma le faaletino.

Mafaufau i faamanuiaga ua folafola mai e le Atua ia i latou o e taumafai e tausi le Upu o le Poto:

“O le a latou maua le maloloina i o latou pute ma le su i o latou ivi;

“Ma o le a latou maua le poto ma oa silisili o le malamalama, o oa natia lava;

Ma o le a taufetuli ae le vaivai, ma o le a savavali ae le matapogia.

“Ma o A’u, o le Alii, Ou te tuu atu ia te i latou se folafolaga, e faapea o le a laaloa le agelu o le faafanoga ia te i latou, e pei o le fanauga a Isaraelu, ma lē fasiotia i latou”Mataupu Faavae ma Feagaiga 89:18 – 21).

O nei faamanuiaga e sili mamao atu nai lo osigataulaga tatou te faia e tausia ai le Upu o le Poto. E ui o le mulimuli i poloaiga e le faigofie i taimi uma, ae o le a manatua pea e le Tama Faalelagi a tatou osigataulaga ma, i Lana lava taimi, faaali mai ia i tatou e aoga.

O Le Tulafono o le Sefuluai

Atonu e fesili nisi: “Aiseā e mana’omia ai e le Atua la’u tupe?” O le mea moni e le manaomia e le Atua ni tupe—ae e finagalo o Ia ia faalatalata atili atu Ana fanau ia te Ia e ala i le tausia o Ana poloaiga. E manaomia foi e le Ekalesia a le Alii ni auala e fesoasoani ai e aumai le talalelei a Iesu Keriso i le lalolagi atoa. O le sefuluai ma isi taulaga e faaaoga mo le tele o mea e lagolago ai le galuega a le Alii, e aofia ai:

Fausiaina ma le tausiaina o malumalu, falelotu, ma isi fale o le Ekalesia.
Lagolagoina o gaoioiga ma galuega faafoe a le Ekalesia ma ona aulotu i le lotoifale.
Faasoaina atu o le talalelei i le lalolagi atoa.
Lagolagoina o polokalama a le Ekalesia, e pei o a’oga ma talafaasolopito o aiga.
Tuuina atu o meaai, malutaga, ma isi mea e manaomia i tagata e le tagolima.

O le sefuluai o se auala mo i tatou e faaali atu ai le agaga faafetai i le Tama Faalelagi mo le tuuina mai ia i tatou o se ala e tausia ai i tatou lava ma o tatou aiga. I le taimi lava e tasi, pe a tatou totogiina le sefuluai, ua tatou fesoasoani i le Atua e faaali atu Lona alofa mo Ana fanau i le lalolagi atoa. Ua tatou fesoasoani e faapotopoto Isaraelu!

Sa faamatalaina e Peresitene Russell M. Nelson i se tasi taimi se tala i le taimi na amata ai ona ia totogiina le sefuluai ina ua mavae se vaitaimi o le le totogiina. Sa ia aoao mai:

“Pe sa ese se tulaga o le Ekalesia ona ua faateleina le matou sefuluai? E leai. Peitai, o le avea ma se tagata e totogi atoa le sefuluai na suia ai a’u. O iina sa ou a’oa’o ai loa o le totogiina o le sefuluai e faatatau atoa i le faatuatua ae le o le tupe. I le avea ai o a’u ma se tagata totogi atoa le sefuluai, sa amata ona matala mai pupuni o le lagi mo a’u. …

“O le totogiina o le sefuluai e manaomia ai le faatuatua, ma e fausia ai foi le faatuatua i le Atua ma Lona Alo Pele.

“Ona E te Alofa Mai ia te A’u”

Sa manatua e Sister Carole M. Stevens, o se sa avea muamua ma Fesoasoani Muamua i le Au Peresitene Aoao o le Aualofa, se tala e uiga i le afafine o lana tama o Chloe. A o ave le taavale a Sister Stevens, sa tatala pea e Chloe lona fusipa’u ma tu i luga i totonu o le taavale.

Ina ua mavae ni nai taumafaiga e faagau mai le loto o Chloe e nofo i lalo ma fai lona fusipa’u, sa maua e Sister Stevens se uunaiga e aoao atu ia Chloe e manaomia lona fusipau ina ia saogalemu ma aloese ai mai i le tulaga faamanu’alia. Ina ua mavae sina taimi, sa malamalama ai Chloe: “Tinamatua, e te manao e fai lo’u fusipa’u ona e te alofa ia te a’u!”

E naunau le Tama Faalelagi e tausia i tatou ma fesoasoani mai ia i tatou. E finagalo o Ia e tuuina mai ia i tatou avanoa uma e saogalemu ai faaleagaga ma faaletino. O Ana poloaiga e le o ni tulafono faatapulaaina—o ni avanoa e maua ai faamanuiaga folafolaina ma faaali atu ai lo tatou alolofa ia te Ia.