“Faalatalata Mai ia te A’u”

E i ai taimi e tatou te lagona ai le latalata atu i le Faaola o Iesu Keriso. Ae ui i lea, i nisi o taimi i o tatou tofotofoga i le olaga nei, tatou te ono lagona ai sina mamao ese mai ia te Ia ma moomoo ai mo se faamautinoaga e faapea, ua silafia e Ia mea o i o tatou loto ma e alofa ia i tatou taitoatasi. …

E alofa Iesu Keriso ia i tatou taitoatasi. Ua Ia ofo mai lena avanoa e latalata atili atu ai ia te Ia. Faapei ona faia i se uo alofa, o le a faapena foi ona e faia, e ala i le fesootai i le tatalo i le Tama Faalelagi i le suafa o Iesu Keriso, faalogologo mo se taitaiga taua mai le Agaga Paia, ona auauna fiafia atu lea i isi mo le Faaola.…

E pei lava o Ona soo pele, o fanau uma a le Tama Faalelagi o e ua filifili e ulu atu i le faitotoa o le papatisoga ua i lalo o le feagaiga e avea o se molimau o le Faaola ma ia tausia i latou o e e lē tagolima i o tatou olaga atoa i le tino. …

A o outou faamaoni i nei folafolaga, o le a outou iloa ai e tausia e le Alii Ana folafolaga ia tasi faatasi ma outou i a outou auaunaga, ma faamāmā ai a outou avega. O le a oo ina e iloa le Faaola, ma e oo mai le taimi o le a avea ai oe e faapei o Ia ma “faaatoatoaina ia te ia.” E ala i le fesoasoani i isi mo le Faaola, o le a e iloa ai ua e faalatalata atu ia te Ia. …

A o e fusifusi i manu’a o i latou o e mafatia, o le a lagolagoina oe e le mana o le Alii. O le a faaloaloa atu Ona aao faatasi ma ou lima e fesoasoani ma faamanuia ai le fanau a lo tatou Tama Faalelagi.

O auauna-osifeagaiga uma a Iesu Keriso o le a maua Lana taitaiga mai le Agaga a o latou faamanuia ma auauna atu i isi mo Ia. Ma o le a latou lagona le alofa o le Faaola ma maua le olioli o le faalatalata atili atu ia te Ia.