“Faalatalata Mai ia te A’u”

Ou uso e ma tuafafine, o se fiafiaga mo au lo tatou faatasi ma outou i lenei konafesi aoao a Le Ekalesia a Iesu Keriso o le Au Paia o Aso e Gata Ai. O Lana Ekalesia lenei. Ua tatou faapotopoto i maota ma aiga i le lalolagi atoa i Lona suafa.

Ua tatou tauaveina i o tatou luga Lona suafa ina ua tatou ulufale mai i Lona malo e ala i feagaiga. O Ia o le Alo toetu ma le mamalu o le Atua. O tatou o tagata i le tino nei, e noatia i le agasala ma le oti. Ae, i Lona alofa mo i tatou taitoatasi, ua Ia valaaulia ai i tatou ia latalata atu ia te Ia.

O Lana fetalaiga lenei: “Faalatalata mai ia te au ma o le a Ou faalatalata atu ai ia te outou; saili mai ia te au ma le filiga ma o le a outou maua ai au; ole mai, ma o le a outou maua ai; tuitui mai, ma o le a tatala atu ai ia te outou.”

E i ai taimi e tatou te lagona ai le latalata atu i le Faaola o Iesu Keriso. Ae ui i lea, i le taimi o o tatou tofotofoga i le olaga nei, tatou te ono lagona ai sina mamao ese mai ia te Ia ma moomoo ai mo se faamautinoaga e faapea e Na Te silafia mea o i o tatou loto ma alofa ia i tatou taitoatasi.

O le valaaulia a le Faaola e aofia ai le ala e lagonaina ai lena faamautinoaga. Faalatalata atu ia te Ia e ala i le manatua pea o Ia. Saili ma le filiga ia te Ia e ala i le suesueina o tusitusiga paia. Ole atu e ala i le tatalo mai le loto i le Tama Faalelagi ina ia lagona le latalata atili atu i Lona Alo Pele.

E i ai se auala faigofie e mafaufau e uiga iai. O le mea lea e te faia pe afai na oulua valavala mo se taimi ma se uo pele. O le a e sailia se ala e te talanoa atu ai ia te i latou, o le a e talia soo se savali e te maua mai ia i latou, ma o le a e faia mea uma e te mafaia e fesoasoani ai ia i latou.

O le tele ona tupu soo o lena mea, o le umi atu foi lena ona i ai, o le loloto atili foi lena o le a faamalosia ai le sootaga o le alofa, ma o le a outou lagonaina ai e outou lava le latalata atili o le tasi i le isi. Afai e tele se taimi e alu e aunoa ma se toe faatauaina o fesootaiga ma le avanoa e fesoasoani ai le tasi i le isi, o le a faavaivaia ai foi le sootaga.

E alofa Iesu Keriso ia i tatou taitoatasi. Na te ofoina mai le avanoa e latalata atili atu ai ia te Ia. Faapei ona faia i se uo alofa, o le a faapena foi ona e faia, e ala i le fesootai i le tatalo i le Tama Faalelagi i le suafa o Iesu Keriso, faalogologo mo se taitaiga taua, ma auauna fiafia atu i isi mo Ia. O le a le pine ona e lagonaina lea o lena faamanuiaga o le faalatalata atili atu ia te Ia.

I lo’u talavou, sa ou oo ai i aafiaga o le olioli o le latalata atu i le Faaola atoa ai ma Lona latalata mai ia te au e ala i nai faatinoga faatauvaa o le usiusitai i poloaiga. A’o o’u laitiiti, sa faia le faamanatuga i le taimi o se sauniga o le afiafi. Ou te manatuaina pea se tasi po, i le silia ma le 75 tausaga talu ai, ina o pogisa ma malulu fafo. Ou te manatua le lagonaina o le olioli ma le alofa i le falelotu i lo’u iloaina lea ua ou tausia le poloaiga ia potopoto faatasi ma le Au Paia ina ia taumamafa i le faamanatuga, osifeagaiga ai ma lo tatou Tama Faalelagi ina ia manatua pea Lona Alo ma ia tausia Ana poloaiga.

I le faaiuga o le sauniga na matou usuina ai le viiga “Iesu, Se’i E Faatasi Mai,” faatasi ai ma na upu e le mafaagaloina: “Iesu, ia e faatasi mai, ua oo mai le po.”

O nei upu na aumaia ai se lagona lofituina o le Agaga ia te a’u, e ui o se alii talavou. Sa ou lagonaina le alofa ma le latalata mai o le Faaola i lena afiafi e ala mai i le mafanafana o le Agaga Paia.

I le tele o tausaga mulimuli ane sa ou manao e toe faamumu lagona lava ia e tasi o le alofa o le Faaola ma Lona latalata mai lea na ou lagonaina ia te Ia i lena sauniga faamanatuga i lou talavou. O lea sa ou tausia ai le isi poloaiga, sa ou suesue i tusitusiga paia.

I le tusi a Luka, sa ou faitau ai e uiga i le aso lona tolu i le mavae ai o Lona faasatauroga ma le falelauasiga ina ua o ane auauna faatuatuaina, i le alofa mo le Faaola, ina ia faauu i Lona tino. Ina ua latou taunuu ane, sa latou iloa ai ua fuliese le ma’a mai le tuugamau ma vaaia ua le o i ai Lona tino iina.

Sa tutu ni agelu se toalua i talaane ma fesili atu pe aisea ua latou fefefe ai, ma faapea atu:

“Se a le mea tou te saili ai le ua soifua i e ua oti?

“E le o iinei o ia, a ua tu: ia outou manatua i lona fetalai atu ia te outou ina o i Kalilaia o ia,

“Ua faapea atu, E tatau ona tuuina atu o le Atalii o le tagata i lima o tagata agasala, ma ia faasatauroina, ma toe tu mai i le aso tolu.”

I lena afiafi po, e toalua ni soo sa savavali atu mai Ierusalema i le auala i Emau, ma sa faaali atu le Alii toetu ia i la’ua ma savavali faatasi ma i la’ua.

O le tusi a Luka ua mafai ai ona tatou savavali faatasi ma i latou i lena afiafi.

“Ua la fetautalatalaa’i, ma fesueai, ona faalatalata mai ai lea o Iesu, ua o faatasi ma i laua.

“A ua punitia o laua mata, o lea ua le iloa ai o ia e i laua.

“Ua fetalai atu o ia ia te i laua, O a ea ia upu ua oulua felafolafoai ai, o oulua o savavali, ma ua mata faanoanoa?

“O le tasi o i laua e igoa ia Kaleopa, ua tali mai ia te ia, ua faapea mai, Pe na o oe ea lē aumau i Ierusalema ma le le iloa o mea ua tutupu ai i ona po nei?”

Sa la tau atu ia te Ia lo la faanoanoaga ina ua maliu Iesu ae sa la talitonu o Ia o le Togiola o Isaraelu.

Atonu sa i ai se naunau alofa i le siufofoga o le Alii toetu a o Ia fetalai atu i nei soo e toalua faanoanoa ma le faavauvau.

A o faaauau ona ou faitau, na o’o mai ai upu nei lea na faamafanafanaina ai lo’u loto, e pei lava ona ou lagona ai i le taimi o se tama itiiti:

“Ua latou faalatalata atu i le aai ua latou o i ai; a o ia ua aga atu peiseai a alu loa.

“A ua la pulunaunau ia te ia, ua faapea mai, Tatou te nonofo ma i maua nei: aua ua taugagaifo le la, ua lata i le afiafi. Ona ulufale atu lea o ia, latou te nonofo.”

Sa talia e le Faaola i lena po le valaaulia e ulufale atu i le fale o Ona soo. Sa Ia taumafa faatasi ma i laua. Sa Ia tago i le areto, faamanuia, ona totofi lea, ma tuu atu ia i laua. Ona pupula ai lea o laua mata, ua la iloa o Ia. Ona mou ese lea o Ia mai le la vaai.

Sa tusia e Luka mo i tatou ia lagona o na soo faamanuiaina: “Ona la fetalatalaai lea, E lei mu ea o ta loto i totonu ia i taua, ina ua fetalai o ia ia te i taua i le ala, ina ua faamatala mai foi e ia o Tusi ia te i taua?”

Ona toe faataalise atu ai lea o ia soo e toalua i Ierusalema e tau atu i Aposetolo e toasefulutasi lea mea ua tupu ia i laua. A o la fefaasoaa’i o la aafiaga, na toe faaali atu foi le Faaola.

Ua tu o Ia i o latou luma, ma “ua fetalai atu ia te i latou, Ia outou manuia.” Ona Ia toe iloiloina lea o valoaga o Lana misiona e togiola mo agasala a fanau uma a Lona Tama ma motusia noataga o le oti.

“Ua fetalai atu foi o ia ia te i latou, Ua faapea ona tusia, e faapea foi ona tatau ina tiga o le Keriso, ma toe tu nai e ua oti i le aso tolu:

“Ina ia tala’iina foi le salamo ma le faamagaloina o agasala i nuu uma i lona igoa, e amata mai i Ierusalema.

“O molimau foi outou i nei mea.”

E pei lava o Ona soo pele, o le a maua e fanau uma a le Tama Faalelagi o e filifili e ulufale mai e ui mai i le faitotoa o le papatisoga le feagaiga i lenei olaga faaletino e avea ai ma se molimau o le Faaola ma ia tausia i latou o e lē tagolima. O lenei tautinoga sa aumai manino mo i tatou e le perofeta o Alema o le Tusi a Mamona i le tele o seneturi ua tuanai i le Vai o Mamona:

“O lenei, ona ua outou manana’o e o mai i le saogalemu o le Atua, ma ta’ua o ona tagata, ma outou loto e fefaasoaai ona tauave o a outou avega ina ia mama ai;

“Ioe, ma outou loto e faanoanoa faatasi ma e e faanoanoa; ioe, ma faamafanafana atu ia te i latou o e e manaomia le faamafanafanaga, ma tutulai o ni molimau a le Atua i taimi uma ma i mea uma, ma i nofoaga uma atonu tou te i ai, seia oo lava i le oti, … ina ia mafai ona togiolaina outou e le Atua, ma … ina ia mafai ona outou maua le ola e faavavau.”

A o outou faamaoni i nei folafolaga, o le a outou iloa ai e tausia e le Alii Ana folafolaga ina ia tasi faatasi ma outou i la outou auaunaga, ma faamāmā ai a outou avega. O le a e iloaina o Ia, ma e oo mai le taimi o le a avea ai oe e faapei o Ia ma “faaatoatoaina ia te ia.” I le fesoasoani ai i isi, o le a e iloa ai ua e faalatalata atu ia te Ia.

O le toatele o outou o loo i ai ni ē pele o loo fesesetai solo i le ala i le ola e faavavau. E te mafaufau po o le a se isi mea e mafai ona e faia e toe faafoi mai ai i latou. E mafai ona e faalagolago i le Alii ia faalatalata atili atu ia i latou a o e auauna atu ia te Ia i le faatuatua.

Tou te manatua le folafolaga a le Alii ia Iosefa Samita ma Sini Rikitone ina o malaga ese i laua mai o la aiga i Lana galuega: “A’u uo o Sini ma Iosefa, o loo manuia o oulua aiga; ua i ai i latou i o’u lima, ma o le a Ou faia ia te i latou e pei ona lelei ia te a’u; ona ua i ai ia te a’u le mana uma.”

A o e fusifusi i manu’a o i latou o e mafatia, o le a lagolagoina oe e le mana o le Alii. O loo faaloaloa atu Ona aao faatasi ma ou lima e fesoasoani ai ma faamanuia le fanau a lo tatou Tama Faalelagi.

O i latou uma o auauna-osifeagaiga a Iesu Keriso o le a maua Lana taitaiga a o latou faamanuia ma auauna atu i isi mo Ia. Ma o le a latou lagonaina Lona alofa, ma maua le olioli o le faalatalata atili atu ia te Ia.

O au o se molimau o le Toetu o le Alii ma le mautinoa e pei sa ou i ai iina i le afiafi a lena e tasi faatasi ma soo e toalua i le fale i le ala i Emau. Ou te iloa o loo soifua o Ia.

O le Ekalesia moni lenei a Iesu Keriso. O le a tatou tutu atu, i le Aso o le Faamasinoga i luma o le Faaola, e faafesaga’i. O le a avea o se taimi o le olioli sili mo i latou, i lenei olaga, o e na faalatalata atu ia te Ia i Lana galuega ma e mafai ona sagisagi ma le naunau atu e faalogo i upu nei: “Ua lelei ia, le auauna lelei e, ma le faamaoni.”

Ou te molimau atu ai o se molimau o le Faaola toetu ma lo tatou Togiola, i le suafa o Iesu Keriso, amene.