Pule Paia, Alii Talavou Maoae

Faafetai Elder Andersen, mo lena faaalia mataina o le pule o le perisitua ma le mana o le Togiola a le Faaola.

I se tasi o taeao o le Aso Sa ia Ianuari talu ai nei, sa o ou saofai i le sauniga faamanatuga, sa silia ma le toasefululua alii talavou na lagolagoina e siitia i le Perisitua Arona. Sa ou lagonaina le suia o le lalolagi i lalo ifo o o tatou vae.

Na faafuasei ona ou lagonaina, i le lalolagi atoa, i taimi o sone taitasi, i sauniga faamanatuga e pei o lea foi, e fiasefulu afe tiakono, aoao, ma ositaulaga—e pei o le uo a Elder Holland i lenei taeao, o Easton—na lagolagoina ina ia faauuina i auaunaga faaleperisitua i le olaga atoa o le a soo ai le umi ma le lautele o le faapotopotoina o Isaraelu.

O Ianuari taitasi, e faaee ai lima i luga o ulu o le tusa ma le 100,000 alii talavou, e faafesootai ai i latou e ala i le sauniga i se laina susulu o le pule e tau atu i tua i le taimi o le Toefuataiga ia Iosefa ma Oliva, iā Ioane le Papatiso, ma iā Iesu Keriso.

Ia, O la tatou ekalesia, e le o se ekalesia e faalialia vale i taimi uma. O iinei tatou te le faia i le vaaiga faaletagata.

Ae tusa lava, o le vaaia o le savavali atu faapei o le taalililili o le faititili i latou ua faatoa faauuina i le perisitua i le salafa o le lalolagi, sa ou tomanatu ai—i se tulaga pei o se “ekalesia o le olioli” pe ua le tatau ona taumanuō mai tumutumu o fale. “O le asō”, sa ou mafaufau ai, “ua tatau ona i ai ni pu ma ni sumepalo tagitagi ma lamepa mūsaesae a Roma. E tatau ona i ai ni solouumi!”

O le iloa ai o le mana o le Atua mo le mea moni e avea aia, sa tatou molimauina ai le faasalaveia o mamanu moni a lenei lalolagi ina ua lolovaia le lalolagi i le pule faaleatua.

O nei faauuga ua amata faalauiloa atu ai nei alii talavou i olaga o le auauna atu, aua o le a i ai i latou lava i taimi ma nofoaga e tatau ai, o le a matua’i taua ai lava lo latou i ai ma tatalo ma mana o le perisitua a le Atua ua latou umia.

O lenei filifili pulea lelei o tali na amata i se agelu o auaunaga na auina mai le Atua. Na faaali atu Ioane le Papatiso o aso anamua ua toetu, ia Iosefa ma Oliva, ma tuu ona lima i luga o o la’ua ulu ma faapea atu, “I Luga o oulua oʼu uso a auauna e, i le suafa o le Mesia, ou te faaee atu i ai le Perisitua o Arona, ua umia ki o le auaunaga a agelu, ma o le talalelei o le salamo, ma o le papatisoga i le faatofuina mo le faamagaloina o agasala” (Mataupu Faavae ma Feagaiga 13:1).

Na ta’ua e Ioane lea pule o le “Perisitua o Arona,” i le uso o Mose ma le soa faaleperisitua. O aso anamua, o i latou na umia lenei perisitua a Arona, sa tatau ona aoao atu ma fesoasoani i sauniga—sauniga na taulai atua le avea ma soo i le Mesia o le lumanai, le Alii o Iesu Keriso (tagai i le Teuteronome 33:10).

O loo atofa manino foi e le tusi o Numera ia ē umia le perisitua o Arona ia galuega o le taulimaina o ipu o sauniga. “E te faalatalataina mai foi Arona ma ona atalii … o lo latou faiva o le … o le la’o’ai … ma mea o i le mea paia latou te auauna a’i” (Numera 3:10, 31).

O le sauniga i le Feagaiga Tuai o taulaga e osi i manu sa faataunuuina ma ua suia i le soifua ma le Togiola a le Faaola. O lena sauniga anamua, na suia i le sauniga ua tatou faaigoaina nei o le faamanatuga o le Talisuaga a le Alii.

Ua valaau mai le Alii ia i latou o umia le perisitua o Arona i ona po nei e faia mea lava ia e tasi na latou faia i aso anamua: e aoao atu ma faatautaia ia sauniga—o ia mea uma ia faamanatu mai ai ia i tatou Lana Togiola.

Pe a fesoasoani ia tiakono, aoao, ma ositaulaga i le faamanatuga, latou te mauaina ona faamanuiaga e faapei foi o isi tagata uma: e ala i le tausia o feagaiga latou te osia, a o taitasi i latou ma taumamafa i le areto ma le vai. Peitai i le faatinoina o nei tiute paia, latou te aoao atili ai foi e uiga i o latou matafaioi ma tiutetauave o le perisitua.

O le Perisitua Arona ua faaigoaina o le perisitua sauniuni o se vaega ona o ona sauniga e mafai ai e i tatou ona lagona le mamafa ma le olioli o le i ai i le feau a le Alii, e saunia ai i latou mo le auaunaga faaleperisitua i le lumanai, pe a valaauina i latou e auauna atu i ni ala e le o mavaaia—e aofia ai le fofogaina atu o faamanuiaga musuia i taimi, e maaleale ai ma ono suia faamoemoe ma miti, e oo lava i le ola ma le oti.

O na faamoemoega o’oo’o e manaomia ai tapenaga ma le loto i ai.

O loo faamatala mai e le Mataupu Faavae ma Feagaiga e faapea, o tiakono ma aoao “latou te … lapatai atu, faamalamalama atu, apoapoai atu, aoao atu, ma valaaulia tagata uma e o mai ia Keriso” (Mataupu Faavae ma Feagaiga 20:59). E faaopoopo atu i nei avanoa, o ositaulaga e tatau ona “talai atu, … ma papatiso atu” (Mataupu Faavae ma Feagaiga 20:50).

E foliga mai ua matuai tele na’uā na mea, ae i le lalolagi moni lava ia, e tutupu a nei mea faanatura i le lalolagi atoa.

Na aoao atu e se tasi o epikopo ia lana au peresitene fou o le korama a tiakono i tiute nei. O lea sa amata ai ona talanoa le au peresitene talavou pe o a foliga e ono i ai lena mea i le latou korama ma i le latou uarota. Sa tonu ia i latou e tatau ona latou amata asiasi i tagata matutua o le uarota ia iloa ai pe o a mea o latou manaomia ona latou faia lea.

O i latou sa latou auauna i ai sa i ai Alan, o se tuaoi e lē mafaufau, e tele ina palauvale, ma o nisi foi taimi e ‘ina’inā. Sa oo ina avea le toalua o Alan, o Wanda ma se tasi o le Ekalesia, ae o Alan, e pei ona matou fai atu, o se tagata faigata.

Ae, sa o lava le au tiakono ma galulue, talitaliē ma lē amana’ia ana faatausuai, a o latou asuina le kiona ma la’u le lapisi. O tiakono e mafai ona faigata ona e ita i ai, ma sa i’u ina amata fiafia Alan ia i latou. Na i ai se taimi na latou valaaulia ai o ia i le lotu.

“Ou te le fiafia i le lotu,” o lana tali lea.

“Ae, e te fiafia ia i matou,” na latou fai atu ai. “Sau la tatou o. E mafai ona e sau tau lava o le sauniga a le matou korama pe a e manao ai.”

Faatasi ai ma le faamaoniga a le epikopo, na sau ai o ia—ma sa sau sau ai lava o ia.

Na avea tiakono ma aoao, ma a o faifai pea lo latou auauna atu ia te ia, sa ia aoaoina i latou e galulue i le faiga o taavale ma fau ni mea. E oo ane i le taimi ua avea ai nei tiakono ua aoao ma ositaulaga, ua valaau i latou e Alan “o a’u tama.”

Sa latou tapena ma le naunautai mo ni misiona, ma sa fesili pe mafai ona latou faata’ita’i ia te ia lesona faafaifeautalai. Sa tauto o ia o le a le faalogo lava pe talitonu i ai, ae, ioe, e mafai ona fai a latou faataitaiga i lona fale.

Ona ma’i lea o Alan. Ma ua faamaluluina lona loto.

I se tasi aso, i le sauniga a le korama, sa ia aioi atu ma le lotomomomo ia i latou e tatalo mo ia e tuu le ulaula, ma sa latou faia. Ona latou mulimuli atu lea ia te ia i le fale ma tatiai uma ana faaaputuga tapaa.

A o avea le fāi ifo o lona malosi ma taofia ai Alan i falemai ma nofoaga tutotonu e toetapu’e ai le malosi, sa auauna atu pea “ana tama” ia te ia, ma faapupula lemu atu mana o le perisitua ma le alofa lē faatuaoia (tagai Mataupu Faavae ma Feagaiga 121:41).

Sa faaauau le vavega ina ua talosaga Alan ia papatisoina—ae na maliu o ia a’o lei mafai ona tupu. I lana talosaga, o ana tiakono-ua-ositaulaga nei, o i latou ia na tauaveina lona pusa maliu ma failauga foi i lona falelauasiga, lea na fetaui—lelei ai—lo latou lapatai atu, faamalamalama atu, apoapoai atu, aoao atu, ma valaaulia tagata uma ia Keriso.

Mulimuli ane, i le malumalu, o se tasi lava o “tama a Alan” lea na papatisoina lē na avea ma peresitene o le korama a tiakono e sui mo Alan.

O mea uma na fai mai Ioane le Papatiso e fai, sa latou faia. Sa latou faia mea e faia e tiakono, aoao, ma ositaulaga i lenei Ekalesia atoa ma i le lalolagi atoa.

O se tasi o mea na poloaiina i latou e umia le perisitua o Arona e fai, e aofia ai le sauniga o le faamanatuga.

O le tausaga na te’a nei, sa ou feiloai ai i se epikopo musuia ma lona faletua ofoofogia. I le taeao o se Aso Toonai talu ai nei, a o tietie atu i le papatisoga a le la atalii, sa pagatia ai i le maliu matautia ma le faafuasei o si o la’ua afafine pele e lua tausaga, o Tess.

O le taeao na sosoo ai, sa faapotopoto ai tagata o le latou uarota mo le sauniga faamanatuga ua faatumulia i le mutimuti alofa, ua mafatia foi i latou i le maliu o lenei teineitiiti atoatoa. Sa leai se tasi na faamoemoe e i ai le aiga o le epikopo i le lotu i lena taeao, ae i ni nai minute a o lei amataina le sauniga, sa ulufale filemu atu ai le aiga ma saofafai i o latou nofoaga.

Sa alu le epikopo i le tulaga ma pasi atu i lona nofoaga masani i le va o ona fesoasoani, ma nofo i le va o ana ositaulaga i le laulau faamanatuga.

I le aluga o lena po o le lotomafatia ma le le mafai ona moe i le sailiga mo se malamalama ma le filemu, sa ia mauaina ai se uunaiga malosi o le mea sa sili ona manaomia e lona aiga—ma le mea sa sili ona manaomia e lana uarota. O le faalogoina lea o le leo o lo latou epikopo, le peresitene o le Perisitua Arona o le latou uarota, lo latou tama lotofaavauvau, o fofogaina folafolaga o le feagaiga o le faamanatuga.

O lea, o le mea lea na tupu, na ia tootuli faatasi ma na ositaulaga ma talanoa atu i Lona Tama. I le faia o lena mea ma le faanoanoa tele, sa ia fofogaina ai nisi o upu sili ona mamana, e fai leotele e se tasi ua faatagaina i lenei olaga.

Upu e faavavau lona taunuuga.

Upu o se sauniga.

Upu o le feagaiga.

Faatonuga e faafesootai ai i tatou i faamoemoega tonu o lenei olaga—ma taunuuga e sili ona matagofie o le fuafuaga a le Tama Faalelagi mo i tatou.

Pe mafai ona outou vaai faalemafaufau i mea na faalogoina e le potopotoga i lena falesa i lena aso—mea na latou lagonaina i upu tatou te faalogo ai i Aso Sa uma i o tatou falelotu?

“Le Atua e, le Tama Faavavau, matou te ole atu ia te Oe i le suafa o Lou Alo, o Iesu Keriso, ia e faamanuiaina ma faapaiaina lenei areto i agaga o i latou uma o e e fetagofi i ai, ina ia latou taumamafa i le faamanatuina o le tino o lou Alo, ma molimau atu ia te Oe, le Atua e, le Tama Faavavau, latou te loto ina ave i o latou luga le suafa o Lou Alo, ma manatua pea o Ia ma tausi i Ana poloaiga ua Ia tuuina mai ia te i latou; ina ia latou maua pea Lona Agaga e faatasi ma i latou. Amene” (Mataupu Faavae ma Feagaiga 20:77).

Ona sosoo lea: “Le Atua e, le Tamā Faavavau, matou te ole atu ia te oe i le suafa o lou Alo, o Iesu Keriso, ia e faamanuiaina ma faapaiaina lenei [vai] i agaga o i latou uma o e e feinu ai, ina ia latou faia i le faamanatuina o le toto o lou Alo, sa faamaligiina mo i latou; ina ia latou molimau atu ia te oe, le Atua e, le Tamā Faavavau, latou te manatua pea o ia, ina ia latou maua lona Agaga e faatasi ma i latou. Amene” (Mataupu Faavae ma Feagaiga 20:79).

Ua tautino e lenei tamā lelei ma le tina e faapea, ua faataunuuina lena folafolaga. Na la faataunuuina, o le mea moni, mo lo latou faamafanafanaga e faavavau, “ia maua pea lona Agaga e faatasi ma i latou.”

E faavavau lo’u faafetai ona o i latou e umia le Perisitua Arona, faatasi ai ma ona mana, sauniga, ma tiute, latou te faamanuia ai i tatou uma e ala i ki o le “auaunaga a agelu, ma o le talalelei o le salamo, ma o le papatisoga i le faatofuina mo le faamagaloina o agasala” (Mataupu Faavae ma Feagaiga 13:1). I le suafa o Iesu Keriso, amene.