Tapuai

O se tasi o tapuaiga sili ona taatele ma taua o le faapotopoto lea i se avanoa ua faapaiaina e auai ai i faatinoga o le sauniga tapuai. Ua fetalai mai le Alii, “Ma ina ia mafai ona e tausi atili atoatoa oe lava i le lē pisia mai le lalolagi, ia e alu atu i le fale tatalo ma osi aʼe au faamanatuga i loʼu aso paia.” Ioe, o lenei, le faaosofiaga autu o le fausiaina o falesa. Ae, afai e manaomia, o le a talafeagai foi se avanoa e lei faapaiaina pe afai e mafai ona tatou tuu i ai se vaega o le paia.

O le mea aupito taua o le mea tatou te faia pe a tatou potopoto i le aso o le Alii. Ioe, tatou te faia laei e sili ona lelei tatou te mafai e tusa ai ma mea ua tatou maua—e le o le taugata ae ia tauagafau i se auala e faailoa atu ai lo tatou faaaloalo ma le migao mo le Atua. E tutusa lava foi le migao ma le faaaloalo o la tatou amio. Tatou te tapuai e ala i le auai faatasi i le tatalo; tatou te tapuai e ala i le lagiina o viiga (ae le na o le faalogologo ae ia pepese i viiga); tatou te tapuai e ala i le aoao atu ma le aoao mai le tasi ma le isi. Na fetalai Iesu, “A ia manatua i lenei aso, o le aso o le Alii, ia e avatu au taulaga [o lona uiga, o au ‘taulaga … o taimi, taleni, po o mea, e auauna atu ai i le Atua ma tagata’ma au faamanatuga i le Silisili Ese, ma ta’uta’u atu au agasala i ou uso, ma luma o le Alii.” Tatou te o mai faatasi e lē ina ia faafiafia pe ia faafiafiaina—e se faaili, mo se faataitaiga—ae ia manatua o Ia ma ia “aoaoina atoatoa atili” i Lana talalelei.

I le konafesi aoao aupito lata mai, sa faamanatu mai ai e Elder Patrick Kearon ia i tatou e faapea, “tatou te le faapotopoto i le Sapati e na ona auai i le sauniga faamanatuga ma maka ese mai le lisi. Tatou te potopoto faatasi e tapuai. E tele lava le eseesega o ia mea e lua. Ina ia auai o lona uiga ia nofo ai. Ae ia tapuai o le vivii a’e lea ma le loto i ai ma faamanū atu i lo tatou Atua i se ala e liua ai i tatou!”

O le tuuto atu o a tatou Sapati i le Alii ma Ona faamoemoega o se faatinoga lava lea o le tapuai. I nai tausaga ua mavae, o le taimi lena-na matauina ai e Elder Russell M. Nelson: “E faapefea ona tatou faapaiaina le aso Sapati? A o ou laitiiti, sa ou suesue i galuega a isi o e na faia ni lisi o mea e fai ma mea e le faia i le Sapati. O se taimi mulimuli ane faatoa ou iloa ai mai tusitusiga paia o la’u amio ma o’u uiga i le Sapati o le a avea ma se faailoga i le va o a’u ma lo’u Tama Faalelagi [tagai i le Esoto 31:13; Esekielu 20:12, 20]. Faatasi ai ma lena malamalamaaga, sa ou le toe manaomia ni lisi o mea e fai ma mea e lē faia. Pe a tatau ona ou faia se faaiuga pe na talafeagai pe leai foi se gaoioiga mo le Sapati, e na o lo’u fesili lava ia te a’u, ‘O le a le faailoga ou te manao e avatu i le Atua?’”

O le tapuai i le aso o le Alii e faailogaina i se taulaiga faapitoa i le taulaga togiola maoae a Iesu Keriso. Tatou te faamanatuina ma le alagatatau ma le faapitoa Lona Toetu i le Eseta, ae faapea foi i vaiaso uma ao tatou aai ma feinu i faatusa o le faamanatuga o Lana Togiola, e aofia ai Lona Toetu. Mo e ua salamo, o le fetagofi i le faamanatuga o le faatumutumuga lea o le tapuaiga i le Sapati.

O le tapuai faatasi o le “tino o Keriso” e i ai se mana tulaga ese ma ni aoga a o tatou aoao atu, auauna atu ma lagolago e le tasi le isi. O le mea e mālie ai, o se tasi o suesuega talu ai nei na maua ai o i latou o e manatu i o latou olaga faaleagaga e faapea e matuai faalilolilo atonu o le a le avea le faamuamua i le tuputupu ae faaleagaga, po o le faapea, o o latou faatuatua e taua tele, po o le i ai e le aunoa o ni taimi e tapuai ai i le Atua. I le avea ai ma se nuu o le Au Paia, tatou te faamalolosia le tasi ma le isi i le tapuai ma i le faatuatua.

E ui i lea, e le mafai ona tatou faagaloina faatinoga o tapuaiga i aso taitasi lea tatou te auai ai faaletagata lava ia ma i le aiga. Ua faamanatu mai e le Faaola ia i tatou “E ui i lea, ia avaʼe i le amiotonu au tautoga i aso uma ma taimi uma.” Sa ta’ua ma le atamai e se tasi o tuafafine, “E le mafai ona ou mafaufau i se auala e sili atu ona loloto e tapuai ai i le Atua nai lo o le talileleia o Ana fanau iti i o tatou olaga ma tausi i latou ma aoao i latou i Lana fuafuaga mo i latou.”

Sa aoao atu e Alema ma Amuleka ia sa Sorama o e na faasaina mai o latou sunako ia tapuai i le Atua e le na o le tasi i le vaiaso, ae ia le aunoa, ma “po o fea lava atonu tou te i ai.” Sa la talanoa atu e uiga i le tatalo o le tapuai lea:

“E ao ina outou sasaa atu o outou agaga i totonu o o outou afeafe, ma o outou nofoaga lilo, ma i o outou vao.

Ioe, ma a outou le tagi atu i le Alii, ia tuu o outou loto ia faatumuina, ia tuuina atu pea ia te ia i le tatalo e le aunoa.”

Sa laua talanoa foi e uiga i le suesueina o tusitusiga paia, tuuina atu o le molimau e uiga ia Keriso, amioga ma auaunaga agaalofa, mauaina o le Agaga Paia, ma le ola i le faafetai i aso uma. Mafaufau i lena manatu: “ola i le faafetai i aso uma.” E talanoa i lo’u manatu lona lua:

O le lagona ma le faaali atu o le agaga faafetai i le Atua, o le mea moni, o le mea lena e faatumulia ai le tapuaiga i se agaga o le olioli faafouina e ese mai i le vaai i ai ua na o se isi tiute e tasi.

O le tapuai moni o lona uiga o le alofa i le Atua ma le gauai atu o o tatou loto ia te Ia—o le meaalofa aupito taua lea e mafai ona tatou ofoina atu. Ina ua fesiliga po o le fea o poloaiga e muamua i tulafono uma, sa tali Iesu, “E te alofa atu i le Alii lou Atua ma lou loto atoa, ma lou agaga atoa, ma lou manatu atoa.” Sa Ia ta’ua foi lenei mea o le poloaiga muamua.

O le mamanu tapuai lenei a Iesu lava ia i le Tama. O Lona soifua ma Lana taulaga togiola sa tuuto atu i le mamalu o le Tama. Tatou te manatua ma le ootia le aioiga faamomoiloto a Iesu i le lotolotoi o mafatiaga ma tiga e lemafaamatalaina: “Lo’u Tama e, afai e mafai, ia ave ese lenei ipu ia te a’u,” peitai o Lona usiusitai, “ae ‘aua le faia lo’u loto, ao Lou finagalo.”

O le tapuai o le taumafai malosi lea e mulimuli i lenei faataitaiga atoatoa. O le a tatou le maua le atoatoa i lenei taumafaiga i se taimi vave, ae afai o aso taitasi tatou te “osi atu mo se taulaga ia te [Ia] le loto momomo [salamo] ma le agaga salamo [usiusitai],” o le a Ia toe papatisoina i tatou i Lona Agaga ma faatumulia i tatou i Lona alofa tunoa.

I le vaega muamua o le Mataupu Faavae ma Feagaiga, o loo fofoga mai ai e le Alii le tausalaga lenei o le lalolagi:

“Ua latou o ese mai au sauniga, ma ua solia lau feagaiga faavavau;

“Ua latou le sailia le Alii e faatu lana amiotonu, ae ua taitoatasi le tagata ma savali i lona lava ala, ma tusa ai ma le faatusa o lona lava atua, o lona foliga ua tusa ma foliga o le lalolagi.”

E lelei ona tatou manatua le faataitaiga a alii talavou sa Iuta e toatolu, o Hanania, Mesaelu, ma Asaria, ia na ave faatagataotauaina i Papelonia a’o le’i leva ona tuua e Liae ma lona aiga ia Ierusalemaa. Sa toe faaigoaina i latou e se taitai Papelonia, o Sataraka, Mesako, ma Apeteniko. Mulimuli ane, ina ua mumusu nei [alii] e toatolu e tapuai i se faatusa na faatuina e Nepukanesa, sa ia poloaiina ina ia lafo i latou i totonu o se ogaumu aasa, ma fai atu ia i latou, “O ai foi se Atua na te laveaiina outou ai o’u lima?”

O le a outou toe manatua la latou tali atu ma le lotototoa:

“Ua mafai e lo matou Atua, matou te auauna i ai, ona laveai mai ia te i matou ai le ogaumu e mu ai le afi, na te laveaiina mai lava i matou ai lau pule, le tupu.

“A le o lea, ia e silafia e oe le tupu e, matou te le auauna i ou atua; o le tupua auro foi ua e faatuina, matou te le ifo i ai.”

Sa matuai aasa le ogaumu o lea na feoti ai i latou o e na lafoina latou i totonu, peitai, sa le’i afaina ai Sataraka, Mesako, ma Apeteniko. “Ua fai atu Nepukanesa, ua faapea atu, Ia faafetaia le Atua o Sataraka, Mesako, ma Apeteniko, “o le na … laveaiina ai ana auauna o e na faatuatua ia te ia, … ua latou tuuina atu o latou tino ina ne’i latou auauna ma ifo i se tasi atua, tau lava o lo latou lava Atua.” Sa latou faatuatuaina Ieova mo le laveaiga, “ae peitai, a le o lea,” e tusa lava pe ana le taofia e le Atua i Lona poto lo latou maliliu, o le a latou tumau faamaoni lava ia te Ia.

Soo se mea lava e faamuamua nai lo le tapuai i le Tama ma le Alo e avea lea o se tupua. O i latou o e teena o le Atua o se faapogai o le upumoni, pe lafoaia soo se tali atu ia te Ia, o le mea moni ua suitulaga i latou lava e fai mo latou atua. O se tasi e tuu [lana] faamuamua i se pati po o se faapogai nai lo le taitaiga faalelagi ua tapuai i se atua ese. E oo lava ia i latou o e fai mai e tapuai i le Atua peitai e le tausia Ana poloaiga, ae savavali i o latou lava ala: “Ua latou faalatalata mai ia te a’u i o latou laugutu, a o o latou loto ua mamao mai ia te a’u.” O le faamoemoega atoa o lo tatou tapuai, o “le Atua moni e toatasi atoa ma [Le] na Ia auina mai o Iesu Keriso lea.”

I le iuga, o le ala tatou ola ai atonu o le ituaiga tapuai sili lea ona lelei ma moni. O le faaalia o lo tatou tuuto o lona uiga o le faataitai lea i le Tama ma le Alo— atinae o Laua uiga auaumama ma uiga faaalia i totonu o i tatou lava. Afai, e pei ona fai mai le upu, o le faataitai [i se tagata] o se aga faamaoni lea o le faamemelo, atonu la tatou te faapea atu ma le migao i le Atua, o le faataitai o le aga aupito faamaoni lea o le tapuai. Ua fautuaina mai e lenei mea se taumafaiga ola ma lagolagoina i la tatou vaega e saili le paia. Peitai o le avea atili e faapei o Keriso o le taunuuga masani lea o faatinoga o la tatou tapuaiga. O le fasifuaitau a Elder Kearon lea na ta’ua muamua atu e uiga i le tapuai, “i se ala e liua ai i tatou,” e taua. O le tapuai moni e liuaina ai.

O le matagofie lea o le ala o feagaiga—o le ala o le tapuai, alofa, ma le faamaoni i le Atua. Tatou te ulu atu i lena ala e ala i le papatisoga, folafola atu tatou te ave i o tatou luga le suafa o Iesu Keriso ma tausi i Ana poloaiga. Tatou te maua le meaalofa o le Agaga Paia, o le avefeau o le alofa tunoa o le Faaola, lea e togiola ma faamama ai i tatou mai le agasala pe a tatou salamo. E mafai foi ona tatou fai atu o le salamo ua tatou tapuai ai ia te Ia.

Ona sosoo ai lea ma sauniga paia ma feagaiga o le perisitua na faia i le maota o le Alii, lea e atili faapaia ai i tatou. O sauniga o le malumalu e amatalia ai se ituaiga tapuaiga e maualuga atu.

Na faamamafa mai e Peresitene Russell M. Nelson, “o alii ma tamaitai uma o e auai i sauniga o le perisitua ma o e osia ma tausia feagaiga ma le Atua e mafai ona maua le avanoa tuusao i le mana o le Atua.” O lenei mea ua le na o se mana tatou te utuvai mai ai e auauna atu ma e faamanuia ai. O se mana paia foi e galue i totonu o i tatou e faaleleia ma faamama i tatou. A tatou savavali i le ala o feagaiga, e “faaalia ai le mana [faapaia] o le faale-atua” i totonu ia i tatou.

Inā se’i o tatou faapei ia o sa Nifaē ma sa Lamanā o anamua, “ia faapauu i lalo i vae o Iesu, ma tapuai atu ia te ia.” Inā se’i o tatou faapei ia, e pei ona poloaiina e Iesu, “ia faapauu i lalo ma tapuai atu i le Tamā i [le] suafa [o le Alo].” Ia tatou mauaina le Agaga Paia ma gauai atu o tatou loto i le Atua, ia le faia ni isi atua i Ona luma, ma i le avea ai o ni soo o Iesu Keriso, ia faataitai i Lana amio i o tatou lava olaga. Ou te molimau atu a tatou faia, o le a tatou maua le olioli i le tapuai atu. I le suafa o Iesu Keriso, amene.