Faatauaina o le Ola

Sa faaauau lana tala: “Ua matuai tele naua le alofa ma le lagolago ua ou maua mai le matou aiga faaleuarota. Sa matuai lofituina lava. Sa faia e [lo’u] epikopo ma le peresitene o Tamaitai Talavou le mau mea e le’i mafaufauina e faaalia ai lo la’ua alolofa ma le lagolagosua. … Ua ou vaaia le aao o le Alii … o taialaina a’u ma lo’u aiga. … O se uarota e pei o la’u uarota o le aiga lea e manaomia e tagata uma, aemaise o se tamaitai talavou i lo’u tulaga.”

Sa faafeiloaia ma le alofa e ia ma lona aiga ma lona aiga faaleuarota lana pepe tama ia Fepuari na te’a nei.

Sa saunoa Peresitene Russell M. Nelson: “O se faailoga o le Ekalesia moni ma le ola a le Alii o le a avea pea ma se taumafaiga faatulagaina … e auauna atu i fanau taitoatasi a le Atua … [auauna atu ma le agalelei-alofa] i le tasi, e pei lava ona sa Ia faia.”

A oo ina iloa e se tamaitai talavou ua ma’itaga i se tamaitiiti e le’i faamoemoeina, o atugaluga faalesoifua maloloina, fememea’i faaleagaga, maasiasi, popolega tautupe, fesili faaleaoaoga, le mautonu i se faaipoipoga, ma le faanoanoa ona o miti ua sātia, e mafai i se taimi o le tiga ma le lē mautonu i le mea e fai, ona taitai atu ai se tamaitai ua lofituina i manatu e faia laasaga o le a loloto ai le tiga ma le faanoanoa.

Mo soo se tasi o faalogologo mai ua o’o i le loloto o le tiga ma le faanoanoa ona o le faia, pe auai i se faapa’ū pepe, faamolemole ia manatua: E ui ina le mafai ona tatou suia le tuanai, ae e mafai e le Atua ona faamalolo le tuanai. E mafai ona oo mai le faamagaloga e ala i le vavega o Lona alofa tunoa togiola pe a e liliu atu ia te Ia ma se loto maualalo ma ua salamo.

E lua upu e tele ina o faatasi ma le paia o le fanau mai i le tino o le: ola ma le filifiliga. O le ola o se vaega sili ona taua o le fuafuaga atoatoa a lo tatou Tama, ma e ala i Lana poloaiga tatou te faataua ai ma faasao le ola; ma tatou te filifilia le faaauauina o le ola i le taimi lava e foafoaina ai. Tatou te faatauaina foi le meaalofa o filifiliga, le faitalia e filifili ai le mea lelei—e fesoasoani e faamalolosia filifiliga amiotonu ua faamaonia e le Atua lea e aumaia ai le fiafia e faavavau.

A feagai se alii ma se tamaitai ma se taimi maaleale, ua fetaiai ma se filifiliga ogaoga, o a tatou upu, o o tatou lima, o o tatou loto—faaleagaga, faalelagona, ma i mea tautupe—e mafai ona faamanuiaina ai i la’ua ia o la lagona le alofa o le Faaola ma e pei ona saunoa Peresitene Henry B. Eyring, e aumaia ai se fetuunaiga faamanino i o la’ua mata faaleagaga mai “mea ua la manatu ua la vaai i ai” i “mea e le o mafai ona la vaai i ai.”

Na saunoa Peresitene Dallin H, Oaks: “O o tatou uiga e faatatau i le faapa’ū pepe e le o faavaea i luga o le malamalama ua faaalia mai i le taimi e amata ai le ola faaletino. … Ua faavae mautu i lo tatou malamalama faapea … o fanau agaga uma a le Atua e tatau ona o mai i lenei lalolagi mo se faamoemoega mamalu, ma o lena faasinomaga o le tagata ua loa ona amata a o le’i amata le foafoaina, ma o le a faaauau ai pea mo le faavavau atoa o le a oo mai.”

O le afioga a le Alii e faatatau i ē e lei fananau mai, na faaleoina mai e ala i le Au Peresitene Sili ma le Korama a Aposetolo e Toasefululua, e le’i suia lava ma o loo ta’u mai ai upu a perofeta i le gasologa o augatupulaga, o loo aumaia ai le manino faalelagi i mea ua poloaiina ai i tatou e le Alii.

“O Le Ekalesia a Iesu Keriso o le Au Paia o Aso e Gata Ai e talitonu i le paia o le ola o le tagata. O le mea lea, e tetee ai le Ekalesia i le filifiliga o le faapa’ū pepe mo le faamalieina faaletagata lava ia pe faaagafesootai, ma ua fautuaina ona tagata ia aua nei gauai atu, faatino, fautuaina, totogi mo, pe fuafuaina se faapa’ū pepe.

“E faataga e le [Alii] ni tuusaunoaga e tatau ai … pe a:

• O le ma’itaga na mafua mai i le fai’aiga faamalosi po o le toe ui i fanau, pe

• Ua tonu i se fomai atamai faapea e lamatia ai le ola po o le soifua maloloina o le tina, pe

• Ua tonu i se fomai atamai faapea ua i ai ni faaletonu matuia i le pepe e le’i fanau mai o le a lē ola pe a fanau mai.”

Ua faaauau mai e le Au Peresitene Sili: “O le faapa’ū pepe o se mataupu e sili ona ogaoga. [E oo foi i nei tulaga e le masani ai] e na’o le pau le taimi e tatau ona iloiloina ai pe a uma ona maua e tagata e fitoitonu i ai le faamautuuga e ala i le tatalo” ma fefautuaai ma isi.

O le tolusefulu tausaga ua mavae, na tuuina mai ai e perofeta a le Alii se folafolaga i le lalolagi. O loo aofia ai upu nei:

“Matou te … ta’utino atu ua poloai mai le Atua, o mana paia o le foafoaina o fanau, ua na o le va lava o le alii ma le tamaitai ua faaipoipoina faaletulafono, o se tane ma le ava, e tatau ona faaaogaina ai.

“Matou te ta’utino atu o le ala ua foafoaina ai le ola faitino, ua faatuina i le finagalo paia. Matou te faamaonia le paia o le ola ma lona taua i le fuafuaga e faavavau a le Atua.”

O le faafailele ma le puipuia o le ola e le’i fanau mai, e le o se tulaga faapolotiki. O se tulafono o le ola amiotonu na faamautu mai e le Alii e ala mai i Ana perofeta.

O se faaupuga a Peresitene J. Reuben Clark Jr. o lē sa auauna atu i le Au Peresitene Sili, o loo faamatala matagofie ai o tatou talavou i le taimi nei: “O le autalavou a le Ekalesia o loo galala mo mea a le Agaga; ua latou naunau e aoao le talalelei, ma e latou te mananao ia tuusa’o, ma manino. Latou te fia iloa e uiga … i o tatou talitonuga; latou te fia maua ni molimau o le upumoni. O i latou o … ni tagata e tuufesilisili, o ē saili i le upumoni.” Ia faatele ona tatou tautatala atu ma le faatuatua ma le agaalofa i o tatou talavou i o tatou fale, ma i le tasi ma le isi i a tatou fonotaga a le Aualofa ma i korama a toeaina e uiga i le tulafono a le Alii o le ola mama, le paia o le ola, ma le tausiga o pepe e lei fananau mai ma o latou tina.

Na tusi mai ia te au se tuafafine pele e uiga i sona aafiaga i le fiasefulu tausaga ua mavae: “I le avea ai ma se [tamaitai] e 17 tausaga le matua …, sa ou iloa ua ou maitaga ma sa itiiti pe leai foi se lagolago mai la’u uo tama. Sa ou lagona le maasiasi ma le tuulafoa’ia [ae ou te] lei mafaufau lava [e faapa’ū le pepe]. … Sa [i ai] lo’u aiga alolofa ma lo’u epikopo, lea sa ma feiloai e le aunoa mo le taitaiga. … Sa ou liliu atu i le Atua. Sa ou suesueina tusitusiga paia … ma sa ou tatalo [ma] maua ai le malosiaga e ala i lo’u Faaola ma le faagasologa o le salamo. … Sa ou maua se tali [i a’u tatalo] sa le mafai ona ou faafitia. … Sa tuia lo’u loto, ae sa ou iloa o le a ou tuuina atu la’u tama e vaetamaina. … Sa ou tatalo mo se lototoa [ma] sa ou lagonaina ma le matua’i manino le alofa o le Faaola e ala i le salamo, ou te iloa e … tali mai le Atua i tatalo ma faamalolosia i tatou.”

Sa vaetamaina e se ulugalii alolofa le pepe teine pele ma aoao o ia i le talalelei. Ua faaipoipo nei o ia ma ua i ai sona lava aiga matagofie.

E i ai taimi, o le ogaoga o faigata ma le tiga matuitui o le le mautonu e mafai ona o mai faatasi ma le puipuiga o le ola.

Lata mai nei sa tusi mai ai se ulugalii talavou ma te alolofa i ai ma Kathy, e uiga i se pepe faapelepele sa laua faatalitali i ai.

Na tusia e le tamā: [Ina ua] 10 vaiaso o le ma’itaga [o lo’u toalua] sa ma maua le tala o le ma pepe faavavega e i ai tulaga faaletonu o koromasone e 21 lea ua lauiloa o le Down syndrome. Sa ma lagonaina le uunaiga … mai le vaega faafomai e mafaufau e faamuta le ma’itaga. I nai vaiaso mulimuli ane, na ma iloaina ai … o le ma pepe e lei fanau mai … o le a moomia ni taotoga o le fatu i le uluai tausaga o lona ola. I le aluga o lenei faagasologa a o ma tatalo faatauanau mo se fesoasoani faalelagi, … na ma lagonaina ai le Agaga o faamafanafanaina i ma’ua. Sa ma maua faaaliga ma le malamalama e faapea, o lo ma afafine o se afafine filifilia o le Tama Faalelagi ma ua i ai se naunauga loloto ia i ai i lo matou aiga ma ia sau i le lalolagi.”

Sa tusia e le tina o le pepe: “Sa matuai faateia [i ma’ua], i le lē mautonu, ma nutimomoia i le tala. … Ina ua 14 vaiaso o lo’u ma’itaga, sa ma maua le tala o le ma pepe e tele tulaga faaletonu o le fatu e fanau mai ma ia, o le tasi e ono lēmatogafitia. E le mafaitaulia foma’i ma fomai faapitoa na ma o i ai, mai le 10-18 vaiaso o le ma’itaga. … I taimi taitasi o a maua siaki atofaina, sa fesiligia ai i ma’ua pe ma te mananao e faaauau le ma’itaga pe faamuta. … Sa faamalolo e le Faaola lo’u loto ma aumaia ia te au se lagona o le toafilemu ma le sagisagi fiafia i le ma pepe teine. … Na faaali mai e le [Tama Faalelagi] ia te au i lea taimi ma lea taimi e faapea, e i ai Sana fuafuaga atoatoa mo a’u [ma] sa ou talitonu ia te Ia.”

Sa la faafeiloa’ia ma le sagisagi fiafia le la pepe teine ua atoa lelei i le asō le tasi le vaiaso. O si a laua tama, ma o i laua o ona matua e faavavau.

O le faatuatua e lēmaluelue ma le lototoa ofoofogia alofa o uiga iloga ia o soo o Iesu Keriso.

I le aluga o tausaga, sa ou maua ai le avanoa e feiloai ai ma alii ma tamaitai o ē na sailia ma le lotomaualalo e toefoi i le ala o feagaiga ma i o latou faamanuiaga faaleperisitua ma le malumalu i le mavae ai o tausaga e tele o le o toe avea o ni tagata auai o le ekalesia.

I se tasi taimi, sa tatau ona ou faatalanoaina e fai ma sui o le Au Peresitene Sili se alii mo le toefuataiina o lona perisitua ma faamanuiaga o le malumalu.

Ina ua mae’a lana faaipoipoga i le malumalu paia, ma i le mavae ai ona i ai sana fanau aulelei e toatolu, sa le’i faamaoni le alii i lona toalua ma ana feagaiga paia. Sa i ai se tamaitai nofofua na ma’itaga ma sa manao e faapa’ū le pepe.

Sa aioi atu le avā paia a le tane i le tamaitai ia fanauina le pepe ma sa folafola atu i ai o le a ia tausia le pepe, pe a fanau mai, faatasi ma lana lava fanau.

Sa malie ma le loto i ai le tamaitai nofofua, o le a lē faamutaina le ma’itaga.

Ua 10 nei tausaga talu ai. O le tuafafine lotomaualalo o loo nofo i o’u luma, e alofa i le tamaitiiti e faapei o sana lava, ma sa ta’u mai ia te au e uiga i taumafaiga a lana tane e faia faaleleiga, ma alofa ma tausia o ia ma le aiga. Sa tagi le tamā a o tautala o ia [le tina].

Pe mafai faapefea e lenei afafine tamalii o le Atua ona ave se tamaitiiti e pei o sana lava, o sē o le a fai pea ma faamanatu i aso taitasi o le lē faamaoni o lana tane? E faapefea? Aua na ia maua le malosiaga e ala ia Iesu Keriso ma sa talitonu o ia i le paia o le ola, le mamalu o le ola. Sa ia iloaina o le pepe e lei fanau mai o se atalii o le Atua, e lotomama ma mama a’ia’i.

O’u uso e ma tuafafine pele, o le alofa faaitiitia mo fanau e lei fananau mai i le lalolagi atoa, o se atugaluga ogaoga. E faatauaina e le Atua le ola. O Lana galuega, ma Lona mamalu ia aumaia le tino ola pea ma le ola faavavau o Ana fanau. I le avea ai o ni soo o Iesu Keriso, tatou te faatauaina le ola. “O le mea lea e iloa ai e tagata uma lava o o’u soo outou, pe afai ua outou fealofani.” Ia tatou saga faateleina lo tatou fefaasoaai o lo tatou alofa ma i latou o ē matuai moomia lava i tatou. E momoli atu o’u alofaaga mo outou ma le alofa o lo tatou Tama Faalelagi mo Ana fanau e o mai i le lalolagi. I le suafa o Iesu Keriso, amene.