Faamamaina Faaleagaga ia te Ia

Na alalaga atu lepela e toasefulu i le Faaola, “Ia e alofa mai ia te i matou.” Ma sa faia e Iesu. Sa Ia fetalai atu ia i latou e faaali atu i latou lava i le faitaulaga ma, a o latou o atu, sa faamamaina i latou mai le faama’i.

O le tasi o i latou, ua na iloa ua faamaloloina ia, ua vivii atu i le Atua ma le leo tele. Sa toe foi atu o ia i le Faaola, ua faapa’ū i lalo i ona vae, ma faailoa atu le loto faafetai.

Ma na fetalai atu le Faaola ia te ia o lē na loto faafetai, “Ua e ola i lou faatuatua.”

Na faamalolo e Iesu Keriso lepela e toasefulu. Ae na’o le toatasi, na toe foi i le Faaola, ma maua ai se mea faaopoopo. Na faamamaina o ia.

E toaiva lepela na faamaloloina faaletino.

E toatasi sa faamaloloina faaletino ma faamamaina faaleagaga.

I le mafaufau loloto ai i lenei tala, sa ou manatunatu ai pe mata e moni le isi itu o le faamatalaga. Afai e le tutusa le faamalologa ma le faamamaina, e mafai la ona faamamaina faaleagaga se tasi e Ia, ae lei faamaloloina faaletino pe faalelagona i lea taimi?

O le a faamalolo e le Matai Faamalolo o tatou puapuaga uma—faaletino ma faalelagona—i Lana taimi. Ae i le faatalitali ai ina ia faamaloloina, e mafai la ona faamama ai se tagata?

Faamata o le a le uiga o le ia faamama faaleagaga?

Tatou te mama ia Iesu Keriso pe a faaali lo tatou faitalia e mulimuli ia te Ia i le faatuatua, gauai atu o tatou loto ia te Ia ina ia mafai ona Ia suia i latou, tausi Ana poloaiga, ma ulu atu i se sootaga faalefeagaiga ma Ia, onosai ma le agamalu ma aoao mai luitau o lenei tulaga faalelalolagi seia oo ina tatou toe foi atu i Lona afioaga ma faamaloloina ai i mea uma lava. E mafai ona ou mama, a o ou faatalitali mo le faamalologa, pe afai e i ai lo’u loto atoa i le ma sootaga ma Ia.

O le faatuatua ia Iesu Keriso e maua ai le faamoemoe. Ou te maua le faamoemoe i le taumafai malosi ia mamā—o se mamā e fanau mai i le faatuatua ia Iesu Keriso. O le faatuatua ia te Ia e faateleina ai lo’u faamoemoe mo le faamalologa, ma o lena faamoemoe e faamalosia ai lo’u faatuatua ia Iesu Keriso. O se faataamilosaga mamana tele.

Na ta’u atu e le Alii ia Enosa o lona faatuatua ua “faamamaina” ai o ia. Na oo mai le faamamaina a o mafaufau loloto Enosa i upu a lona tamā-perofeta o Iakopo, a o galala o ia i le fia malamalama i le avanoa mo le ola e faavavau, a o tagi atu o ia i le Atua i le tatalo malosi. Ma i lena tulaga o le manao ma le lotomaulalo, na oo ifo ai le siufofoga o le Alii ia te ia, ma faailoa atu ua faamagaloina ana agasala. Ma sa fesili atu Enosa i le Alii, “Ua faapefea ea ona faia lenei mea?” Ma sa tali atu le Alii, Ona o lou faatuatua ia Keriso, … ua e ola i lou faatuatua.”

E ala i lo tatou faatuatua ia Iesu Keriso, e mafai ai ona tatou saili ina ia faamamaina faaleagaga a o tatou faatalitali ma le faamoemoe mo le faamalologa faaletino ma faalelagona.

Ona o Lana taulaga togiola, ma pe a tatou salamo faamaoni, e faamalolo ai i tatou e le Faaola mai le agasala, e pei ona sa Ia faia ia Enosa. O Lana Togiola e le iu e oo atu foi i o tatou mafatiaga ma faanoanoaga.

Ma atonu e le tuuina mai e ia le faamalologa mai gasegase ma faama’i—tiga faaumiumi, faama’i e osofaia le tino e pei o faaletonu o le fai’ai ma le maea alio, kanesa, popole, atuatuvale, ma mea faapena. O lena ituaiga o faamalologa e tupu i le taimi a le Alii. Ma i le taimi nei, e mafai ona tatou filifili ia faamamaina e ala i le faaalia o lo tatou faatuatua ia te Ia!

Ina ia faamama o lona uiga ia mae’a ma atoa. E pei lava o taupou popoto e toalima o e sa tutumu a latou lamepa i suauu ina ua sau le faatoafaiava, e mafai ona tatou mama ia Iesu Keriso a o tatou faatutumu a tatou lamepa i le suauu faaopoopo o le liua ia te Ia. I lena faiga, tatou te saunia ai mo le tausamaaga o le faaipoipoga faafaatusa, o Lona Afio Mai Faalua.

I le faataoto, o taupou uma e toasefulu sa i ai i le nofoaga sa’o, e faatalitali i le faatoafaiava. Sa omai i latou uma ma lamepa.

Ae ina ua afio mai o Ia, i le taimi sa lei mafaufauina o le tuneva o le po, sa le’i lava suauu a le toalima valea mo a latou lamepa. Sa le’i faamatalaina o i latou e leaga, ae e valea. Sa le’i lava tapena taupou valea ia faamumu pea a latou lamepa i suauu o le liua.

Ma o lea, i le tali atu i la latou augani ina ia faataga i latou e ulu atu i le tausamaaga o le faaipoipoga, na tali mai le faatoafaiava, “Tou te le iloa a’u.”

E faailoa ai, sa iloa o Ia e taupou popoto e toalima. Sa faamamaina i latou ia te Ia.

Sa tutumu a latou lamepa i le suauu faapelepele o le liua lea na mafai ai e taupou popoto ona ulufale atu i le tausamaaga o le faaipoipoga i le itu taumatau o le faatoafaiava.

E pei ona faaalia e le Faaola, “Ia faamaoni, ma tatalo i taimi uma, ma teuteu ma faamumu a oulua lamepa, ma ia i ai le suauu ia te oulua, ina ia mafai ona oulua saunia i le afio mai o le Faatoafaiavā.”

O Taupou Popoto e Toalima, saunia e Ben Hammond

O se atavane matagofie o loo faaalia ai taupou popoto e toalima sa tuuina talu ai nei i le Lotoa o le Malumalu i fafo mai o faitotoa o le Maota o le Aualofa ma i le faapaologa o le Malumalu o Sate Leki.

O se nofoaga ua fetaui lelei ma le faatatau o le faataoto. Aua a tatou osia ma tausia feagaiga, aemaise lava i feagaiga e maua i le maota o le Alii, o le a tatou faatutumuina a tatou lamepa i suauu o le liua.

E ui e le o faasoa atu e tamaitai ua faatusa i taupou popoto e toalima a latou suauu o le liua, ae o loo latou faasoa atu lo latou malamalama a o latou sii a’e a latou lamepa ia o loo tumu i le suauu ma susulu malamalama. E tulagaese le faaalia o lo latou lagolagoina o le tasi ma le isi—soosoo tau’au, o lima faataamilo i le tasi ma le isi, tilotilo sa’o atu i mata, ma genogeno atu i isi e o mai i le malamalama.

E moni lava,“O [tatou] o le malamalama o le lalolagi.” Sa tautino mai e le Faaola:

“Ou te tuuina atu ia te outou e fai ma malamalama o lenei nuu. O se aai e faatu i luga o se maupuepue e le mafai ona lilo.

“… Pe [tatou te] tutu se lamepa ma tuu i lalo o se fua saito? E leai, ae [tatou] te tuuina i luga o se tuugalamepa, ma o le a susulu atu ai lona malamalama ia i latou uma o e o i totonu o le fale;

“O lea ia faasusulu atu ai lo outou malamalama i luma o lenei nuu, ina ia latou vaai ai ia outou galuega lelei ma viia lo outou Tamā o i le Lagi.”

Ua poloaiina i tatou e faasoa atu Lona malamalama. O lea ia faatutumu a outou lamepa o le suauu o le liua ia Iesu Keriso ma ia saunia e teuteu ma faamumu tele pea a outou lamepa. Ona faasusulu atu lea o lena malamalama. A tatou faasoa atu lo tatou malamalama, tatou te aumaia le toomaga o Iesu Keriso i isi, e faalolotoina lo tatou liua ia te Ia, ma mafai ona faamamaina i tatou a o tatou faatalitali atu mo le faamalologa. A tatou faasusulu atu o tatou malamalama, e mafai ona tatou fiafia a o tatou faatalitali.

E aoga se faataitaiga faaletusi paia e faamalosia ai le mataupu faavae e faapea, e mafai ona tatou mama a o liuaina i tatou ia Iesu Keriso ma utuvai mai i le malosi mai ia te Ia, e tusa lava pe o tatou faatalitali mo le faamalologa.

Sa i ai se ituaiga puapuaga o le Aposetolo o Paulo—lea sa ia faamatalaina o se “mea matuitui i le tino,” lea na faatolu ona ia ole atu i le Alii e aveese. Ma na fetalai atu le Alii ia Paulo, “O lo’u nei alofa tunoa e lava lea e fesoasoani ia te oe: aua o le vaivai e faaatoatoaina ai lo’u mana.” Lea na tautino mai ai e Paulo:

“O lea ua tele ai lava lo’u fiafia … i mea ua ou vaivai ai, ina ia tumau i o’u luga le mana o Keriso.

“Ou te fiafia i mea e vaivai ai, … o le atuatuvale ona o Keriso: aua pe a ou vaivai, ona ou malosi ai lea.”

O faataitaiga a Paulo o loo fautua mai ai e oo lava i o tatou vaivaiga, o lo tatou malosi ia Iesu Keriso e mafai ona faaatoatoaina—o lona uiga e mae’a ma faamamaina. O i latou o e tauivi ma luitau o le olaga nei, ma liliu atu i le Atua i le faatuatua e pei o Paulo, e mafai ona maua faamanuiaga o le masani ma le Atua.

Sa le’i faamaloloina Paulo i ona faafitauli, ae sa faamama faaleagaga o ia ia Iesu Keriso. Ma e oo lava i ona puapuaga, o le malamalama o lona liua, ma le malosi mai ia Iesu Keriso sa susulu atu ma sa olioli o ia. I lana tusi i Filipi sa ia fai atu ai, “Ia outou Olioil i le Alii aua le aunoa: ou te toe fai atu, ia outou Olioli.”

Uso e ma tuagane, o le tali o le ioe, e mafai ona faamamaina i tatou faaleagaga, e ui lava ina tatou faatalitali mo le faamalologa faaletino ma faalelagona. O le faamamaina e le faapea o le toefuataiga faaletino ma faalelagona i le olaga nei. O le faamamaina o le fanauina i le faatuatua, ma le liua ia Iesu Keriso ma i le faatagaina o le malamalama o lena liua e susulu atu.

“E toatele e e valaaulia, ae toaitiiti e ua [filifili ina ia] filifilia.”

O le a faamaloloina uma faaletino ma faalelagona i le Toetutu. Ae o le a e filifili nei ia faamamaina ia te Ia?

Ou te tautino atu ma le olioli ua liuaina a’u i le Alii o Iesu Keriso. O loo ou taumafai malosi ina ia faamamaina ia te Ia. Ou te mautinoa o le a toefuatai mai mea uma ma o le a oo mai le faamalologa, i Lana taimi, aua o loo soifua o Ia.

O Maria le Makatala sa o se tamaitai na faamaloloina ia Iesu Keriso. Ma o ia o se tamaitai sa faamamaina ia Iesu Keriso. I le avea ai ma Ona soo sa mulimuli atu o ia i le Faaola i Kalilaia atoa ma auauna atu ia te Ia.

Sa i ai o ia i vae o le satauro. o se molimau i Lona maliu.

Sa alu atu o ia i Lona tuugamau e faamae’a tapenaga o le falelauasiga ma iloa ai ua aveesea le maa sa tapunia ai, ma na leai se tino o le Alii. Sa i ai Maria i le tuugamau na tagi ai, i le taimi na fesili atu ai ia te ia, muamua o agelu ona sosoo ai lea ma le Faaola lava Ia, “Funa e, se a le mea e te tagi ai? o ai ea e te sailia?”

Sa tali atu Maria, “Auā ua latou ave ese lo’u Alii, ou te lei iloa foi le mea ua latou tuuina ai o ia.”

Ma sa fetalai atu ma le alofa Iesu i lona igoa, “Maria e.” Ma sa ia iloaina o Ia ma sa tali atu ma le faaaloalo, “Raponi e; … Le Aoao e.”

O le vavalo ai e uiga i le Faaola, sa fai mai ai Isaia, “E faaumatia e Ia le oti e faavavau, e soloiesea foi e le Alii o Ieova o loimata i mata uma lava.”

O Lona Toetu na mafai ai ona soloiesea loimata o Maria. E mautinoa lava o le a Ia soloiesea foi ou loimata.

O Maria o le uluai molimau i le Faaola toetu. Ma o ia o le tagata muamua ua molimau atu i isi e uiga i mea sa ia vaaia.

Ou te faaopoopo atu foi la’u molimau ia Maria. Ua toetu o Ia. O loo soifua Iesu Keriso. I le iuga o le a faamaloloina tagata uma, faaletino ma faalelagona ia te Ia. Ma i le faatalitali ai mo lena faamalologa, o le faatuatua i le Matai Faamalolo o le a faamamaina ai i tatou faaleagaga. I le suafa o Iesu Keriso, amene.