O Le Fuafuaga o le Alofamutimutivale

Ia Aperila talu ai, e le’i pine ona mavae le talafou fiafia faapea ua maua e le Ekalesia le Malumalu o Katelani, ae valaaulia i tatou e Peresitene Russell M. Nelson e suesue le tatalo o le faapaiaga o le Malumalu o Katelani, o loo tusia i le vaega 109 o le Mataupu Faavae ma Feagaiga. O le tatalo o le faapaiaga, na saunoa ai Peresitene Nelson, “o se aoaoga e uiga i le auala e faamalosia ai faaleagaga e le malumalu oe ma a’u e taulima luitau o le olaga i nei aso e gata ai.”

Ou te mautinoa o lau suesuega o le vaega e 109 ua aumaia ai ni malamalamaaga ua faamanuiaina ai oe. O lenei afiafi, ou te faasoa atu ai ni mea se lua sa ou aoaoina a o o’u mulimuli i le valaaulia a le perofeta. O la’u suesuega o lea vaega na ta’ita’i atu ai au i le ala o le filemu, na faamanatu mai ai e alofamutimutivale le Alii ma o le fuafuaga o le faaolataga a lo tatou Tama Faalelagi o se fuafuaga moni lava o le alofamutimutivale.

Atonu ua outou silafia, “ua fautuaina faifeautalai faatoa valaauina ina ia maua faaeega paia o le malumalu i le vave e mafai ai ma ia auai soo atu i le malumalu pe a faatagaina ai e tulaga.” A maua loa faaeega paia, ua “mafai foi ona avea … o ni tagata faigaluega i le malumalu a o le’i amataina le galuega faafaifeautalai.”

O le taimi i le malumalu a’o le’i ulufale i le nofoaga e aoao ai faifeautalai (NAF) e mafai ona avea o se faamanuiaga matagofie mo faifeautalai fou a o latou aoao atili e uiga i feagaiga o le malumalu a o le’i faasoaina atu faamanuiaga o na feagaiga i le lalolagi.

Ae i le suesueina o le vaega e 109, sa ou aoao ai e faapea, i totonu o le malumalu, e faamamana ai e le Atua ia faifeautalai fou—ioe, i tatou uma lava—i se ala faaopoopo, paia. I le tatalo o le faapaiaga, na tuuina mai e ala i faaaliga, sa tatalo atu ai Iosefa e faapea, “pe a o atu au auauna mai lou maota … e molimau atu lou suafa,” ia “faamaluluina loto o “tagata uma”—o “tagata silisili o le lalolagi” ma “tagata matitiva uma, ma e ua le tagolima, ma [e] puapuagatia.” Sa tatalo o ia ina “ia aveesea o latou manatu faapito e le upumoni, ma ina ia mafai e lou nuu ona maua le fiafia mai le vaaiga a tagata uma; ina ia iloa ai e tuluiga uma o le lalolagi, o i matou, o au auauna, na matou faalogo i lou siufofoga, ma ua e auina atu i matou.”

O se folafolaga matagofie lenei mo se faifeautalai faatoa valaauina—ia aveesea le manatu faapito “e le upumoni,” ia “maua le vaaiga fiafia mai le vaaiga a tagata uma,” ma ia iloa e le lalolagi na auina atu i latou e le Alii. E mautinoa le manaomia e i tatou taitoatasi o nei foi faamanuiaga. Oka o se faamanuiaga i le faamaluluina o loto a o tatou fegalegaleai ma tuaoi ma ē tatou te galulue. E le o faamatala tonu maia e le tatalo o le faapaiaga le ala o le a faamaluluina ai loto o isi i lo tatou taimi i le malumalu, ae ua faatalitonuina a’u ua fusia faatasi ma le ala e faamaluluina ai o tatou lava loto i le maota o le Alii, e ala i le faatotonugalemuina o i tatou lava ia Iesu Keriso ma Lona alofamutimutivale.

A o ou suesueina le tatalo o le faapaiaga o Katelani, sa faateia foi au i le augani pea lava pea o Iosefa mo le alofamutimutivale—mo tagata o le Ekalesia, mo fili o le Ekalesia, mo taitai o le atunuu, mo malo uma o le lalolagi. Ma, i le mea sili ona patino, sa aioi atu o ia i le Alii ia manatua o ia ma ia alofamutimutivale i lana pele o Ema ma le la fanau.

Pe o le a se lagona o Iosefa ina ua mavae se vaiaso mulimuli ane, i le aso o le Eseta, 3 o Aperila, 1836 i le Malumalu o Katelani, na faaali atu ai le Faaola ia te ia ma Oliva Kaotui ma, e pei ona tusia i le vaega e 110 o le Mataupu Faavae ma Feagaiga, ma fetalai atu, “Ua Ou talia lenei fale, ma o le a i ai iinei lo’u igoa; ma o le a Ou faaali atu a’u lava i lo’u nuu i lenei fale i le alofamutimutivale.” O lea folafolaga o le alofamutimutivale atonu sa i ai se uiga faapitoa ia Iosefa. Pei foi ona sa aoao mai ai Peresitene Nelson ia Aperila talu ai, o lea folafolaga “e faatatau foi i malumalu uma ua faapaiaina i aso nei.”

E tele naua auala e mafai ai e i tatou taitoatasi ona maua le alofamutimutivale i le maota o le Alii. Na moni lava lenei mea talu ona uluai poloaiina e le Alii ia Isaraelu e fau se falefetafa’i ma tuu i lona totonugalemu le “nofoa o le alofamutimutivale.” I totonu o le malumalu, tatou te maua ai le alofamutimutivale i feagaiga tatou te osia. O na feagaiga, e faaopoopo atu i feagaiga o le papatisoga, e fusia ai i tatou i le Tama ma le Alo ma faateleina ai lo tatou mauaina o le mea na aoao mai e Peresitene Nelson o “se ituaiga faapitoa o alofa ma le alofamutimutivale … ua ta’ua o le hesed” i le FaaEperu.

Tatou te maua le alofamutimutivale i le avanoa e faamauina ai i o tatou aiga mo le faavavau. Tatou te malamalama ai foi ma le manino sili atu o le Foafoaga, o le Pa’ū, o le taulaga togiola a le Faaola, ma le mafaia ona tatou toe ulufale atu i le afioaga o lo tatou Tama Faalelagi—ioe, o vaega uma o le fuafuaga o le faaolataga—o se faailoaga o le alofamutimutivale. Ioe, atonu ai na faapea o le ata o le faaolataga o se fuafuaga tonu o le fiafia, ona o se “fuafuaga o le alofamutimutivale.”

Ou te faafetai lava mo le folafolaga matagofie i le vaega e 110 e faapea, o le a faaali mai e le Alii lava Ia i le alofamutimutivale i totonu o Ona malumalu. Ou te faafetai lava foi mo mea ua faaalia mai e uiga i le ala o le a faaali mai ai e le Alii lava Ia i le alofamutimutivale i soo se taimi, tatou te aioi atu ai mo le alofamutimutivale, faapei foi o Iosefa.

O le aioiga a Iosefa Samita mo le alofamutimutivale i le vaega e 109 sa le o le uluai taimi lea na uunaia ai faaaliga mo le alofamutimutivale ona o ana talosaga. I le Vao Paia, sa le gata ina tatalo Iosefa talavou ia iloa pe o le fea Ekalesia e moni, ae sa ia fai mai foi “na ia tagi atu i le Alii mo le alofamutimutivale, aua sa leai se tasi e mafai ona ou alu i ai e maua mai ai le alofa mutimutivale.” Ae peiseai, o lona iloaina sa ia manaomia le alofamutimutivale lea e na o le Alii e mafai ona maua mai ai, sa fesoasoani e talaia ai pupuni o le lagi. Tolu tausaga mulimuli ane, sa faaali atu ai le agelu o Moronae, i le mavae o le mea na fai mai ai Iosefa o lana “tatalo ma le olega i le Atua Malosi Aoao mo se faamagaloga o aʼu agasala uma ma sese.”

O lea mamanu o faaaliga i le mavae ai o se olega mo le alofamutimutivale o se mea masani i tusitusiga paia. Sa faalogo Enosa i le leo o le Alii i le faatoa mavae ai ona tatalo mo se faamagaloga. O le liua o le tamā o le Tupu o Lamonae, na amata i lana tatalo: “O le a ou lafoaia a’u agasala uma ina ia ou iloa oe.” Atonu e le faamanuiaina i tatou i nei aafiaga maoae, ae mo isi o i latou e tauivi i nisi taimi ia lagonaina tali i tatalo, o le sailia o le alofamutimutivale o le Alii o se tasi lea o ala sili ona mamana e lagonaina ai le molimau a le Agaga Paia.

O se mataupu faavae faapena o loo matagofie le aoao mai i le Moronae 10:3–5. E tele ina tatou faafaigofieina nei fuaiupu e aoao atu ai faapea, e mafai ona tatou iloa pe moni le Tusi a Mamona, e ala i se tatalo ma le lotofaamaoni. Ae o lenei faafaigofieina e mafai ona lē amana’iaina ai le matafaioi taua o le alofamutimutivale. Faalogo i le ala o loo amata ai e Moronae lana apoapoaiga: “Ou te apoapoai atu ia te outou pe a outou faitau nei mea, … ia outou manatua le alofa mutimutivale tele o le Alii i le fanauga a tagata, mai i le foafoaga o Atamu e oo mai lava i lalo seia oo mai i le taimi o le a outou maua ai nei mea, ma manatunatu i ai i o outou loto.”

Ua uuna’ia i tatou e Moronae ia le gata ina faitauina nei mea—faamaumauga o le a ia faamaufaailogaina—ae ia manatunatu i ai i o tatou loto i mea ua faaalia mai e le Tusi a Mamona e uiga i le “alofamutimutivale tele o le Alii i le fanauga a tagata.” O le manatunatu i le alofamutimutivale o le Alii e saunia ai i tatou e “ole atu i le Atua, le Tamā Faavavau, i le suafa o Iesu Keriso, pe ua le moni nei mea.”

A o tatou manatunatu loloto i le Tusi a Mamona, atonu tatou te fesili: Pe moni ea, e pei ona aoao mai o Alema, o le fuafuaga o le alofamutimutivale o le Atua e faamautinoa ai o tagata uma o e na ola i lenei lalolagi o le a toetutu ma o le a “toefuata’ia … i o latou tino e tatau ai ma atoatoa”? Pe mo’i Amoleka—e mafai e le alofamutimutivale o le Faaola ona faamalie poloaiga tiga moni uma o le faamasinoga tonu lea, na semanu e faamalosia i tatou e totogi ae nai lo o lena “[ua siomia i tatou] i aao o le saogalemu”?

Pe moni ea, e pei ona molimauina e Alema, na tigaina Keriso e le gata mo a tatou agasala ae mo o tatou “tiga ma puapuaga” ina ia mafai ona Ia “silafia … le ala e fesoasoani ai i ona tagata, e tusa ai ma o latou vaivaiga”? Pe matuai alofamutimutivale ea le Alii, e pei ona aoao mai le Tupu o Peniamina, e faapea, o se meaalofa mauafua, sa Ia togiola ai “mo agasala a i latou … o e na maliliu e aunoa ma le iloa o le finagalo o le Atua e uiga ia te i latou, po o e na agasala ma le le iloa”?

Pe moni ea e pei ona fai mai Liae, na “pau Atamu ina ia i ai tagata; ma ua i ai tagata ina ia latou maua le olioli”? Ma pe moni ea e pei ona molimauina e Apinati, ma sii mai upu a Isaia, o Iesu Keriso sa “faamanualia o ia mo a tatou solitulafono; sa tuimomomo o ia mo a tatou amioletonu; sa i ona luga le aoaiga mo lo tatou filemu; ma o ona faalavalava ua faamaloloina ai i tatou”?

I le aotelega, pe alofamutimutivale moni ea le fuafuaga a le Tama e pei ona aoao mai i le Tusi a Mamona? Ou te molimau atu e moni lava, ma e moni foi aoaoga o le alofamutimutivale i le Tusi a Mamona, lea e aumaia ai le filemu ma le faamoemoe.

Ae tusa lava foi, ou te manatu e i ai nisi atonu o tauivi, e ui i a outou faitauga faamaoni ma tatalo, ia iloa le folafolaga a Moronae e faapea, “o le a faaalia e le [Tama Faalelagi] le moni o ia mea ia te outou, e ala i le mana o le Agaga Paia.” Ua ou iloa lenei tauiviga aua na ou lagonaina, i le tele o tausaga ua mavae, ina ua le aumaia ia te au se tali manino i lea lava taimi i a’u tatalo ina ua uma a’u uluai faitauga faalua o le Tusi a Mamona.

Afai o loo e tauivi, sei ou valaaulia oe e mulimuli i le fautuaga a Moronae ia mafaufau loloto i le tele o auala o loo aoao mai ai le Tusi a Mamona i le “alofa mutimutivale tele o le Alii i le fanauga a tagata”? E faavae i ou aafiaga, ou te faamoemoe a outou faia, e mafai e le filemu o le Agaga Paia ona ulufale atu i lou loto ma mafai ai ona e iloa, talitonu, ma lagona e moni le Tusi a Mamona ma le fuafuaga o le alofamutimutivale o loo aoao mai ai.

E momoli lo’u lotofaafetai mo le fuafuaga sili o le alofamutimutivale a le Tamā, ma mo le naunautai o le Faaola e faataunuuina. Ou te iloa o le a faaali mai o Ia e Ia lava i le alofamutimutivale i totonu o Lona malumalu paia, ma i vaega uma o o tatou olaga pe afai tatou te sailia o Ia. I le suafa o Iesu Keriso, amene.