“O Le Mea Lea e Iloa ai e Tagata Uma Lava o O’u Soo Outou”
O lo tatou alofa mo le Atua ma Ana fanau o se molimau mamana lea i le lalolagi o le Ekalesia moni lava lenei a le Faaola.
E tele o tausaga ua mavae, sa ma malaga ai ma Sister Uchtdorf i le itu i saute o Siamani. Toeitiiti oo i le Eseta, ma sa ma valaaulia ai se uo lelei, e le o se tagata o le Ekalesia matou te auai i le tatou sauniga tapuai o le Aso Sa. Sa ma alolofa i lenei uo pele, o lea sa o se mea fua lava ma masani ai le faasoa atu ia te ia o o ma lagona e uiga i le Faaola ma Lana Ekalesia ma ia valaaulia o ia e sau ma vaai! Sa ia taliaina le valaaulia ma matou auai ai i sauniga i se paranesi na lata ane.
Afai na e aumaia se uo i le lotu mo le taimi muamua lava, masalo e mafai ona e fesootai lelei i le ala sa ou lagonaina i lena taeao o le Aso Sa. Sa ou manao ia atoatoa mea uma. O le ma uo o se tagata e maualuga le aotauina ma le faaleagaga. Sa ou faamoemoe ma le naunautai o le a faia e sauniga a lenei paranesi se uunaiga lelei ia te ia ma faailoa lelei atu le Ekalesia.
Sa lolotu le paranesi i ni potu mautotogi i le fogafale lua o se faleoloa tele. Ina ia oo atu iina, sa ao ia i matou ona ui atu i faasitepu i le pito i tua o le fale, ma pasia manogi malolosi mai oloa o loo teuina ai iina.
Ina ua amata le lotu faamanatuga, sa ou mafaufau i la’u uo i lona aafiaga i lenei mea mo le taimi muamua, ma sa le mafai ona ou le matauina ni mea sa fai ai si o’u lē manofo lelei teisi. O viiga, mo se faataitaiga, sa le’i pei o le Aufaipese a le Tapeneko. O tamaiti lē malolo ma pisapisao na lagonaina i le taimi o le faamanatuga. Sa fai e failauga le mea sili sa latou mafaia, ae sa le’i i ai ni o latou tomai faafailauga. Sa ou nofo ma le lē to’amalie i le lotu atoa, ma le faamoemoe atonu o le a lelei atu le A’oga Sa.
Ae leai.
Sa ou popole i le taeao atoa pe o le a se manatu a le ma uo e uiga i lenei ekalesia na ma aumai i ai o ia.
Mulimuli ane, a o matou toefoi atu i le fale, sa ou liliu atu e talanoa i le ma uo. Sa ou fia faamalamalama i ai o lenei paranesi ua na o se tama’i paranesi ma sa le’i faailoaina moni ai le Ekalesia aoao. Ae a o le’i mafai ona ou fai atu se upu, sa ia saunoa.
“Sa matagofie [le lotu],” sa ia fai mai ai.
Sa ou lē magagana.
Sa ia faaauau, “Ua matua faagaeetia lava a’u i le auala e taulima ai e tagata le tasi ma le isi i le tou lotu. E foliga mai e o mai i latou uma mai ni talaaga eseese [o le olaga], ae ua manino lava lo latou alolofa faamaoni i le tasi ma le isi. O le mea lea ou te mafaufau sa manao i ai Keriso ia foliga i ai Lana Ekalesia.”
Ia, sa vave lava ona ou salamo i o’u uiga faamasinosino. Sa ou manao i ni sauniga matuā atoatoa le faiga e faagaeetia ai la’u uo. Ae o le mea na ausia e le au paia o lenei paranesi o se agaga o le loto-atoa o le alofa, agalelei, onosai, ma le mutimutialofa.
Ina Ia Mafai Ona Faateleina o le Faatuatua i le Lalolagi
O’u uso e ma tuafafine pele, uo pele, ou te alofa i Le Ekalesia a Iesu Keriso o le Au Paia o Aso e Gata Ai. O le Ekalesia moni ma le ola a le Faaola, ma na te aoaoina le atoaga toefuataiina o le talalelei a Iesu Keriso. O Lona mana ma le pule o le perisitua ua i ai iinei. E taitai e Iesu Keriso lava Ia lenei Ekalesia, e ala i auauna Na te valaauina ma faatagaina, ma e ala i se perofeta soifua, o Peresitene Russell M. Nelson lea. Ua tuuina mai e le Faaola i le Au Paia o Aso e Gata Ai se misiona tulagaese e faapotopoto le fanau a le Atua ma saunia le lalolagi mo le Afio Mai Faalua o le Faaola. Ou te tuuina atu la’u molimau o mea uma nei e moni.
Ae e taua le manatuaina pe a oo le toatele o tagata i se aafiaga mo le taimi muamua o le Ekalesia a Iesu Keriso, latou te le o mafaufau i le pule o le perisitua po o ni sauniga po o le faapotopotoina o Isaraelu. O le mea e mautinoa latou te matauina, i lo isi mea uma, o le auala latou te lagonaina pe a latou faatasi ma i tatou ma le auala tatou te taulimaina ai le tasi ma le isi.
“Ia outou fealofani,” sa fetalai ai Iesu. “O le mea lea e iloa ai e tagata uma lava o O’u soo outou.” E tele lava, o se uluai molimau a se tagata e uiga ia Iesu Keriso e oo mai pe a ia lagonaina le alofa faatasi ma soo o Iesu Keriso.
Sa folafola mai e le Faaola na Ia toefuataiina mai Lana Ekalesia ina ia “mafai … ona faateleina [ai] le faatuatua i le lalolagi.” O le mea lea, pe a asiasi mai tagata i sauniga a le tatou Ekalesia, e finagalo le Faaola ia i latou ia o ese atu ma se faatuatua malosi atu ia te Ia! O le alofa e lagonaina e a tatou uo mai ia i tatou o le a siitia ai i latou ia latalata atili atu ai ia Iesu Keriso! O le tatou sini faigofie lena i taimi uma tatou te potopoto ai.
Soo se tasi lava e saili i se faatuatua sili atu ia Keriso po o se fesootaiga latalata atili i le Tama Faalelagi e tatau ona lagonaina le i ai i le aiga i Le Ekalesia a Iesu Keriso o le Au Paia o Aso e Gata Ai. O le valaauliaina o i latou i a tatou sauniga e mafai ona avea o se valaaulia masani ma se mea fua e pei o le valaauliaina o i latou i o tatou fale.
O le Tulaga Atoatoa ma le Tulaga Moni
Ia, ua ou iloa o loo ou faamatalaina le tulaga atoatoa. Ma i lenei olaga faaletino, e seāseā tatou oo i le tulaga atoatoa. Ma “seia oo i le aso atoatoa,” o le a i ai pea se āva i le va o le tulaga atoatoa ma le tulaga moni. O lea la, o le a se mea e tatau ona tatou faia pe a lē pei le Lotu o se aso atoatoa? O afea, po o le a lava le mafuaaga, e le’i faafailele ai lava e le tatou uarota se faatuatua atoatoa po o le alofa? Po o le, o le a se taimi e lagona ai tatou te lē fetaui i ai?
E tasi le mea e lē tatau ona tatou faia o le lafoai o le tulaga atoatoa!
O le itulau autu o le Tusi a Mamona ua aofia ai lenei lapataiga taua: “Afai e i ai ni mea sese,“ o loo faapea mai ai, ”o mea sese ia a tagata; o le mea lea, aua le tausalaina mea a le Atua.”
Pe mafai e se tusi—po o se ekalesia po o se tagata—ona i ai ni “faaletonu” ma “mea sese” ae avea pea ma galuega a le Atua?
O la’u tali o se ioemautinoa!
O lea la, a o tatou taofimau ai i tatou lava i tulaga faatonuina maualuluga a le Alii, ia tatou onosai foi i le tasi ma le isi. O i tatou taitoatasi o se galuega o loo faagasolo, ma e tatou te faalagolago uma i le Faaola mo soo se alualu i luma tatou te faia. E moni lena mea mo i tatou o ni tagata taitoatasi, ma e moni foi mo le malo o le Atua i le lalolagi.
Ua valaaulia i tatou e le Alii ia le na o le auai i Lona malo ae ia auai foi ma le naunautai i le fausiaina . Ua silasila mamao mai le Atua i se nuu e “loto e tasi ma le mafaufau e tasi.” Ina ia tasi le loto, e tatau ona mama o tatou loto, ma e manaomia ai se liuga tele o le loto.
Ae e le faapea ia sui lo’u loto ia ogatusa ma lou loto. Pe sui foi lou loto ia ogatusa ma lo’u loto. O lona uiga ia sui uma o tatou loto ia ogatusa ma le Faaola.
Afai tatou te le’i oo lava i ai, manatua, o le fesoasoaniga a le Alii, e leai se mea e faigata.
Fetaui i ai ma le Avea ma Ni Ō
Ma afai e te lagonaina e te le o fetaui lelei i ai, faamolemole ia iloa e le o tuua na o oe. Pe tatou te le’i oo uma ea i ni tulaga o le olaga na tatou lagona ai pei o se tagata ese i totonu o le potu? Ua sili atu ma le faa-tasi ona ou oo i lea tulaga. Ina ua 11 o’u tausaga, sa faamalosia ai lo matou aiga e tuua lo matou fale ma o atu i se itulagi e le masani ai. Sa ese mea uma mai mea sa ou masani ai. Ma o la‘u tautala na manino ai i isi tamaiti e ese a’u mai mea na latou masani ai. I se taimi sa matuai ou manaomia ai se faauoga ma le avea ma ni o, sa ou lagona ai le tuuatoatasi ma le faaesea.
O iinei i le lalolagi, o le tele o eseesega ua tatou matauina—eseesega ia e faaaoga e isi e faailoga ai le tasi ma le isi—ua mafua ona o mea faalelalolagi: foliga vaaiga faaletino, tagatanuu, gagana, lavalava, agaifanua, ma isi mea faapena. Ae “e le vaai le Alii e pei o le vaai a tagata. Aua e vaai tagata i le tino, a e vaai le Alii i le loto.”
Mai Lana silasila, e na o le tasi lava le vaega e muamua i lo isi uma: atalii po o se afafine o le Atua. Ma e fetaui atoatoa i ai i tatou uma i lenei vaega e tasi.
O se mea masani le manao ia faatasitasi ma tagata e foliga, tautatala, amio, ma mafaufau pei o i tatou. E i ai se nofoaga mo lena mea.
Ae i le Ekalesia a le Faaola, tatou te faapotopoto mai fanau uma a le Atua o ē ua loto ina ia potopoto ma saili i le upumoni. E le o o tatou foliga vaaia faaletino, manatu faaupufai, aganuu, po o ituaiga e aumaia faatasia i tatou. E le o o tatou talaaga tutusa e tuufaatasia ai i tatou. Ae o lo tatou faamoemoega tutusa, o lo tatou alolofa mo le Atua ma tuaoi, la tatou tautinoga ia Iesu Keriso ma Lana talalelei toefuataiina. O tatou ua “tasi ia Keriso.”
O le lotogatasi tatou te sailia e le o le tutu ai o tagata uma i le mea e tasi; ae o le faasasaga atu o tagata uma i le itu e tasi—ia Iesu Keriso. Ua tasi i tatou, e le ona o le mea sa tatou i ai ae o le mea o loo tatou tauivi e o i ai, e le ona o le tagata ua tatou i ai ae o le tagata tatou te saili e avea ai.
O le uiga atoa lena o le Ekalesia moni a le Faaola.
Tasi le Tino
Afai e te alofa i le Atua, afai e te fia iloa atili o Ia e ala i le mulimuli i Lona Alo, o iinei la e tatau ona e i ai. Afai o loo e saili ma le naunautai e tausi poloaiga a le Faaola—e ui e te lē o atoatoa i lena mea—o lona uiga la ua fetaui atoatoa oe mo Le Ekalesia a Iesu Keriso o le Au Paia o Aso e Gata Ai.
Ae a pe afai e ese oe mai tagata o siomia oe? E le faapea o le a lē fetaui ai la mo oe—e faia ai oe ma vaega moomia o le tino o Keriso. E manaomia tagata uma i le tino o Keriso. E iloa e taliga mea e lē mafai e mata ona iloa. E fai e vae mea e lē aoga i lima.
E lē faapea la o lau galuega ia suia tagata uma ina ia faapei o oe. Ae o lona uiga e i ai se mea taua e te saofagā ai—ma e i ai se mea taua e te aoaoina!
Tasi le Leo
I sauniga uma o le konafesi aoao, ua faamanuiaina i tatou i musika musuia mai aufaipese talenia. A e faafofoga i ai, atonu e te matauina e lē usuina e tagata uma ia nota lava e tasi. O nisi taimi e usu ai e le tasi vaega le fati, o nisi taimi o le isi vaega. Ae saofagā uma i latou i le leo matagofie, ma e autasi atoatoa i latou. Ua i ai i tagata taitoatasi o le aufaipese le sini autu e tasi: ia viia le Atua ma sii atu o tatou loto ia te Ia. E tatau i tagata taitasi ona tāmau lona mafaufau ma lona loto i le faamoemoega paia lava e tasi. Ma a tupu lena mea, e avea moni i latou ma leo e tasi.
Afai e le’i avea oe ma se tagata o Le Ekalesia e Iesu Keriso o le Au Paia o Aso e Gata Ai, matou te valaaulia oe ia auai ma i matou a o matou olioli i le “pese o le alofa togiola” a le Faaola. Matou te manaomia oe. Matou te alolofa ia te oe. O le a lelei atili le Ekalesia i au taumafaiga e auauna i le Alii ma Ana fanau.
Afai ua uma ona outou faaalia, e ala i le papatisoga, e ala i le osia o feagaiga ma le Atua, lo outou manao e “o mai i le saogalemu o le Atua, ma ta‘ua o ona tagata,” faafetai atu mo le avea ma se vaega o lenei galuega tele ma le paia ma mo le fesoasoani e avea le Ekalesia a Iesu Keriso ma ekalesia e finagalo le Faaola e avea ai.
E pei ona ou aoao mai la’u uo i Siamani, o lo tatou alofa mo le Atua ma Ana fanau o se molimau mamana lea i le lalolagi o le Ekalesia moni lava lenei a le Faaola.
Tau ina ia faamanuia i tatou e le Atua ia saili ma le onosai ae ia filiga ia ola e tusa ma tulaga atoatoa ua faatulagaina e lo tatou Faaola, Togiola, ma le Matai mo i tatou—ina ia iloa ai e tagata uma o i tatou o Ona soo. I le suafa paia o Iesu Keriso, amene.