Ma Ua Matou Tautalatala e Uiga ia Keriso

I le faaiuga o se tofiga umi i se atunuu mamao, sa ma o atu ma lo’u toalua o Lesa i se mea e siaki ai pasese i se malaevaalele e sauniuni ai mo le toe tasi lava se faigamalaga—o se malaga i le vaeluapo—e o ai i le fale. A o matou tutu faatasi ma le anoanoai o isi, ma si la’a e tasi i le taimi i ni laina uumi, sa mafai ona ma lagonaina le faatupulaia o le atuatuvale o tagata malaga pe maua a latou vaalele, o le siakiina o tusifolau ma visa, ma le sao manuia i siaki o le saogalemu.

Na i’u ina ma taunuu i se vaega sa i ai se ofisa o le tiute, o lē na foliga mai sa le’i āno lava i le maualuga o le popole ma le atuatuvale i le potu. Sa toetoe ina ia aapa mai ona o se mea masani, i o’u pepa malaga, e aunoa ma le tilotilo mai, faamaonia lo’u ata, topetope le susu’e o lea itulau ma lea itulau, ma faaiu ai i le patatū mamafa o le faailoga i lo’u tusifolau.

Ona aapa ane lea i pepa o Lesa. E aunoa ma se āno mai, sa punou ma taulai i lana galuega, sa susu’e ma le faaeteete itulau ma ni mata ua poto masani, ma taulai i auiliiliga o pepa o i ona luma. Sa fai si o ma tete’i ina ua faafuasei ona ia taofi, ea i luga lona ulu, ae pulato’a a’e ia Lesa i se sioa faamo’imo’i ma le agalelei. Faatasi ai ma se ataata agalelei, sa ia tuu malie le faailoga i le tusifolau o Lesa ma toe tuuina atu pepa ia te ia. Sa toe ataata atu i ai lo’u toalua, talia pepa, ma fefaafesuia’i a la’ua upu ofo alofa faatofā.

“O le a le mea lea na tupu nei lava?” Sa ou fesili ai ma le le talitonu.

Ona faaali mai lea e Lesa ia te au le mea na vaaia e le tamaitai ofisa—o se tama’i kata o i ai le ata o le Faaola. Na faafuasei ona pa’u ifo mai le ato a Lesa i totonu o faavaa o lona tusifolau. O le mea lea na maua e le ofisa o le tiute. O le mea lea na suia ai lona tagata atoa.

Alofa Tunoa ma le Upumoni, na saunia e Simon Dewey, faaaloaloga a le altusfineart.com, © 2025, ua faataga le faaaogaina

O lea tama’i ata o le Faaola na faafesootai ai loto o ni tagata ese e toalua e le masani. Na suia ai le sootaga e leai se faiā i se sootaga ua sili ona patino, ua pueina ai le matagofie, le vavega, ma le moni o le Malamalama o Iesu Keriso. O taimi na totoe o lena aso, ma faatele ai talu mai lena taimi, sa ou manatunatu loloto ai i le taimi matagofie, faatauvaa ma le maofa, ma olioli ai i le aafiaga mamalu o le Malamalama o Keriso i luga o fanau a le Atua.

O i tatou o soo o Iesu Keriso, ma e tatou te taufai sailia ia maua ma faasoa atu Lona malamalama. O loo natia i le igoa o le Ekalesia la tatou mataupu silisili e uiga ia “Iesu Keriso lava ia o le maatulimanu autu.” E ala mai i perofeta anamua ma perofeta soifua ua poloaiina ai i tatou e le Tama Faalelagi e “Faalogo ia te Ia!” ma ia “o mai ia Keriso.” “Ua matou tautalatala e uiga ia Keriso, ua matou olioli ia Keriso, ua matou talai atu e uiga ia Keriso, [ma] ua matou vavalo e uiga ia Keriso.”

Tatou te aoao atu o Iesu Keriso o le Alo o le Atua, ma i le taimi o Lana misiona i le lalolagi, na aoao atu ai e Iesu Lana talalelei ma faatuina Lana Ekalesia.

Tatou te molimau atu i le faaiuga o Lona soifua, na togiolaina ai Iesu mo a tatou agasala ina ua puapuagatia o Ia i le Faatoaga o Ketesemane, sa faasatauroina i luga o le satauro, ona toetu mai ai lea.

Tatou te olioli ai, ona o le taulaga togiola a le Faaola, ua mafai ai ona faamagaloina ma faamamaina i tatou mai a tatou agasala pe a tatou salamo. O lenei mea e aumaia ia i tatou le filemu ma le faamoemoe a’o mafai ai foi ona tatou toe foi atu i le afioaga o le Atua ma maua ai se atoaga o le olioli.

Tatou te vavalo atu ona o le Toetu o Iesu, o le oti ua le o le iuga lea ae o se laasaga taua i luma. “O le a tatou toetutu uma pe a tatou oti. O lona uiga o le a toe faatasia le agaga ma le tino o tagata taitoatasi ma ola e faavavau.”

O perofeta soifua i o tatou taimi—o e maua faaaliga mai le Atua e aoao ma taitai ai i tatou—o loo faateleina le valaaulia o i tatou e o mai ia Keriso. O loo latou fesoasoani ia i tatou e faatotonugalemu atoatoa o tatou loto, taliga, ma mata ia te Ia. E mafai ona tatou tolaulauina le anoano o faataitaiga o fetuunaiga ma faalautelega na fofoga mai e le Au Peresitene Sili, ua mamanuina e taulai atu ai i tatou ia Iesu Keriso. O nisi o nei mea e aofia ai:

• O le faaiuga e faamuta le igoa “Ekalesia Mamona” ae suia i le igoa sa’o, O Le Ekalesia a Iesu Keriso o le Au Paia o Aso e Gata Ai.

• O le i ai o atavali musuia e faaautuina ia Keriso e faaali i maota tapuai.

• O autu ma musika a Tamaitai Talavou ma Alii Talavou e taula’i ia Iesu Keriso, e pei o le “O A’u o se Soo o Iesu Keriso” ma le “Vaai Atu ia Keriso.”

• Faamamafa sili atu i le Togiola ma le Toetu moni o Iesu Keriso o ni mea aupito mamalu o le talafaasolopito.

• Faamanatuga o le Eseta o se vaitau ae le na o se aso malolo, ma se faamamafa ia Iesu Keriso.

• O le folasaga o le faailo vaaia o le Ekalesia a Iesu Keriso ma lona natura faafaatusa.

Se’i o tatou tilotilo toto’a i le aafiaga o nisi o nei mea. Muamua, o le faatusa o le Ekalesia.

I le 2020, na folasia mai ai e Peresitene Russell M. Nelson se faailo vaaia fou mo le Ekalesia. O lenei faatusa e atagia mai ai le upumoni o Keriso o loo i le totonugalemu o Lana Ekalesia, ma e tatau foi ona i ai i le totonugalemu o o tatou olaga. Ua tatou vaaia nei lea faatusa masani i luga o pepa faataga o le malumalu, o uepisaite ma mekasini a le Ekalesia, o se aikona mo le polokalama o le Potutusi o le Talalelei, e oo lava i pine ID o le militeli mo le toatele o tagata o le Ekalesia o loo tautua faafitafita. O le faatusa e aofia ai le igoa o le Ekalesia o loo i ai i totonu o le maatulimanu, o se faamanatu o Iesu Keriso o le maatulimanu autu, o loo faaalia iinei i Kemupotia ma ua faaaogaina i gagana e 145.

O le totonugalemu o le faatusa o se ata vaaia o le faatagata maamora o le Christus a Albert Thorvaldsen, lea ua tele ina vaavaalua ma le Ekalesia, ma o loo maua i nofoaga autu mo tagata asiasi, ma luga o laufanua o malumalu i le lalolagi atoa. O lona lauiloa i le faatusa o le Ekalesia ua ta’u mai ai e ao ona avea Keriso ma totonugalemu o mea uma tatou te faia. E faapena foi, o aao faaloaloa o le Faaola ua faaalia ai Lana folafolaga e talia tagata uma o e o le a o mai ia te Ia. O lea faatusa o se ata vaaia lea o le alofa o le Faaola o Iesu Keriso ma o se faamanatu faifaipea o le Keriso soifua.

Ona o le fiailoa, na ou fesiligia ai le tele o aiga ma uo e faatatau i le elemene taua e tasi o le faatusa o le Ekalesia. O le mea e ofo ai, e toatele e le o silafia le itu paia o loo aofia ai. O Iesu Keriso o loo tu i lalo o le faaofuofu. O le faatusa lea o le Faaola toetu o loo tula’i a’e mai le tuugamau. Tatou te faamanatuina moni le Keriso soifua, ua toetu, e oo lava i le faaaogaina o le faatusa o le Ekalesia.

Se’i o tatou mafaufau nei i le taua o le Eseta. I savali talu ai nei a le Au Peresitene Sili e faatatau i le Eseta, na lu’iina ai i tatou “e faamanatu le Toetu Mai o le Faaola soifua e ala i le suesueina o Ana aoaoga ma fesoasoani e faavae ni tumasani o le Eseta i lo tatou sosaiete atoa, aemaise i totonu lava o o tatou aiga.” A faapuupuu, ua fautuaina i tatou e faase’e atu i se faamanatuga maualuga atu ma sili ona paia o le Eseta.

Ou te fiafia lava i faaaliga faifai pea e faatatau i le Eseta ma ou te faafetai mo a outou mau taumafaiga ia avea le Eseta o se gaoioiga e paia ma mamalu. E faaopoopo i se sauniga faamanatuga e tasi le itula i le Aso Sa o le Eseta, o isi faataitaiga o gaoioiga agavaa e aofia ai faigalotu a uarota ma siteki ma gaoioiga i le Aso Sa o le Laupama faapea foi i le gasologa o le Vaiaso Paia. O nei faamanatuga e aofia ai gaoioiga faatasi ma tamaiti ma le autalavou ma e tele foi ina tuufaatasia ai aufaipese o faatuatuaga eseese. O isi na faia ni faletatala o le “Keriso Soifua” mo tagata o le ekalesia ma uo, ma auai foi i gaoioiga o le Eseta a ekalesia eseese i le lotoifale.

O na gaoioiga e faapei foi o le motu o tagata i le aai o Ierusalema, o latou leo na tuufaatasia e vivii ai i le Faaola i le taimi o Lana malaga faatupu. E tutusa lava le faamalieloto o lipoti o a outou tali i le valaaulia a le Au Peresitene Sili e tapuai i le fale o ni aiga e faamanatu ai lenei aso malolo e sili ona taua.

Ou te talitonu o le tapuai faaleaiga i le vaitau o le Eseta ua ofoofogia le siitiaina. Lua tausaga talu ai, sa ou talanoa ai e uiga i le naunautaiga o lo matou aiga ia faaleleia le ala matou te faamamaluina ai le Eseta. Ou te ta’u sa’o atu, o se galuega lea o loo faagasolo pea. Matou te fiafia i taimi uma i se toonai faapitoa o le Aso Sa o le Eseta, o ‘ato o le Eseta ma se su’ega fuamoa, ma o loo matou faia pea. Peitai, o le faaopoopo i ai o se vaega faaleagaga e faia ma le loto i ai e taulai ia Iesu Keriso ma Lana Togiola i la matou faamanatuga, ua aumaia ai se paleni matagofie i lo matou faamanatuina o nei gaoioiga uma e sili ona paia.

O le tausaga lenei, o le matou taumafaiga lona tolu lea e fai le Eseta ia sili ona totonugalemu ia Keriso. E pei o le Vaaiga i le Fanau Mai o le pepe o le Kerisimasi, o le tala faatino a lo matou aiga i le Aso o le Eseta e aofia ai nai toniga faigofie, faitauina o mau mai le Feagaiga Fou ma le Tusi a Mamona, musika, ata o le Eseta, lau pama— ma sina vevesi laitiiti, pe afai ou te matua’i faamaoni atoatoa. O fanau ma fanau a fanau e faitau ma tauloto ia viiviiga o le Aso Sa o le Lau Pama o le “Osana … Amuia le e afio mai i le suafa o le Alii; Osana i mea aupito a luga” ma le “O Iesu lenei … o Kalilaia” e foliga talafeauga e pei o le “Manuia i le lalolagi, ma le finagalo alofa i tagata” i le taimi o le Kerisimasi.

Ua matou fiafia nei i se suifefiloi o teuteuga. O le mea sa toetoe na o lapiti ma fuamoa o le Eseta, ua faapaleni nei i le Christus ma ata o le tuugamau avanoa, o le Faaola toetu o loo faaali mai i le faatoaga i fafo o le tuugamau, ma le faaali atu o le Faaola ia sa Nifae. O loo matou taumafai foi ia avea le Eseta o se vaitau nai lo le na o se aso. O loo matou taumafai ia atili tele ma anoa ona faamanatu ai feagaiga i le Aso Sa o le Laupama, le Aso Maliu ma mea paia na tutupu i le taimi atoa o le Vaiaso Paia.

O le Eseta e faatagaina ai i tatou e faamamalu le taulaga togiola a Iesu Keriso ma le Toetu moni ma le olioli o Ia. E mamafatu o tatou loto pe a tatou manatunatu i mafatiaga o le Faaola i le faatoaga ma luga o Kalevario, ae e olioli o tatou loto pe a tatou vaai atu i le tuugamau avanoa ma le alaga faalelagi, “Ua toetu o Ia!”

O le faamalosiauga lata mai nei a le Au Peresitene Sili ia “sagisagi atu i le Eseta ma le Toetu o Iesu Keriso—o le aupito mamalu o savali uma i tagata” ua faamamafaina ai le maoae o lenei vaitau. E ui e foliga mai ua i ai se itu ua faatupulaia le lilifa i ai o le aufaitofā iloga faaKerisiano, e vaai i le Toetu i ni faaupuga faafaatusa, tatou te faamautinoa lava la tatou aoaoga faavae autu e faapea, “o le Toetu o lona uiga o i latou uma na feola, o le a toetutu, ma o le Toetu e moni lava.” “Aua faapei ona oti uma ia Atamu e faapea foi ona faaolaina uma ia Keriso.” Na motusi e Iesu Keriso noataga o le oti mo tagata ola uma.

Tatou te tutu uma ma le maofa i le alofa tunoa ua ofoina mai e Iesu mo i tatou. Tatou te opogi Ana upu e faapea “e le sili lava le alofa o se tasi i lenei alofa, ia tuuina atu e se tasi lona ola e sui a’i ana uo.”

Na ta’ua e C.S. Lewis e faapea, “ina ia folafola atu le faaKerisiano o lona uiga [i Aposetolo] e muamua ona folafola atu le Toetu. … O le Toetu o le autu tutotonu lea i lauga a Kerisiano uma o loo lipotia mai i le Galuega. O le Toetu, ma ona taunuuga, o le ‘talalelei’ po o le tala e lelei lea na aumaia e le Au Kerisiano.”

Ou te tautino atu e faapea, “ua i ai se toetutu, … ua leai ai se manumalo i le tuugamau, ma ua tofatumoanaina ia Keriso, le tui o le oti.”

I le faaiuga, ou te molimau atu faapea, o i latou uma e taliaina valaaulia mai lo tatou perofeta soifua ma ona fesoasoani ina ia faamanatuina atili ma le loto i ai gaoioiga paia ia e faatusa i ai le Eseta, o le a latou maua ua atili faatupulaia le malosi o la latou sootaga ma Iesu Keriso.

Na o nai aso ua mavae, na ou faalogo ai i se tinamatua sa fai le la faataitaiga o le tala o le Eseta, ma le atalii e fa tausaga o lana tama, e ala i le faaaogaina o faatusa faigofie o le tuugamau, le maa sa pupuni ai le tuugamau, Iesu, Maria, o soo, ma le agelu. Sa matau ma faalogologo toto’a le tamaitiiti a o faamatala e lona tinamatua le tanuga, o le tapunia ma le tatalaina o le tuugamau, ma le vaaiga i le faatoaga o le Toetu. Ona ia toe faamatala lea ma le faaeteete mulimuli ane le tala i ni faamatalaga sa faateia ai i ona matua a o ia fesiita’i atafaatusa e ia lava. I le mae’a ai o lea taimi manaia, sa fesiligia o ia pe na te iloa le mafuaaga ua i ai le Eseta. Sa tilotilo a’e le tamaitiiti ma tali atu ma ona mafaufauga faatamaitiiti, “Aua la e ola o Ia.”

Ou te faaopoopo atu la’u molimau i lana—ma lau foi molimau, ma i le molimau a agelu ma perofeta—ua toetu o Ia ma o loo soifua foi o Ia, ou te molimau atu ai i le suafa o Iesu Keriso, amene.