Alofa Mama—o se Faailoga o le Avea ma Soo Moni

O se soo o sē e mulimuli po o se tagata e a’oga mai se isi. O soo o “tagata e aooga mai se isi” o ē tuuto o latou olaga ia avea e faapei o lo latou faiaoga. O le mea lea, o le avea ai ma soo o Iesu Keriso, e aofia ai le tele o isi mea nai lo le na ona talitonu i Ana aoaoga ma Lana mataupu autu. E aofia ai foi le tele o isi mea nai lo le faailoaina o Lona paia ma le taliaina o Ia o lo tatou Faaola ma le Togiola, e matua’i taua e pei o lena.

Sa faamatala mai e Peresitene Dallin H. Oaks: “O le mulimuli ia Keriso e le o se faiga faasamasamanoa pe na o nisi taimi e fai ai. O se tautinoga faifaipea ma o se ala o le olaga lea e tatau ona taialaina ai i tatou i taimi uma ma i nofoaga uma.” O le avea ai ma soo o se malaga e faia ma le faaeteete ma se faamoemoega, ia tatou liua ai e ala i le taulaga togiola a le Alii ma Lona mana e mafai ai. O le taunuuga moni o le avea ai ma soo o le avea tino e faapei ona i ai Iesu Keriso—e oo lava i le tulaga tatou te maua ai “ona foliga i o [tatou] mata.”

Ina ia avea ma soo o le Alii, e tatau ona tatou mulimulita’ia ma le loto i ai Ona mafaufauga ma faatinoga i aso uma—mo se faataitaiga, o Lona usiusitai, lotomaualalo, ma le onosai. A o tatou faaaofia ai nei uiga faaleatua i o tatou lava faasinomaga, e avea i tatou ma “ē ua tofusia i [Lana] amio Atua.” O lenei mulimulita’ia o uiga o le Faaola o loo i le taulotoaiga o lo tatou tapuai ia te Ia. E pei ona sa aoao mai e Peresitene Nelson, “O lo tatou faamemelo ia Iesu e sili ona faaalia i lo tatou faataitai ia Iesu.”

Mai le mau uiga paia uma o Iesu Keriso e tatau ona tatou faataitai i ai, e tasi lava e aupito sili ona taua ma e aofia uma ai isi. O lena uiga faaleatua o Lona alofa moni lea, po o le alofa mama. Ua faamanatu mai e le perofeta o Mamona ma le Aposetolo o Paulo a aunoa ma le alofa, “[o tatou] o meanoa.” Pe, e pei ona faaalia i le Perofeta o Iosefa Samita, a leai se “alofa mama, e leai se mea [tatou] te mafaia.”

Na faailoa mai e le Faaola lava Ia le alofa o se maka po o se faailoga e iloa ai Ona soo moni ina ua Ia tautino mai:

“O le poloaiga fou ou te tuu atu ai ia te outou, Ia outou fealofani; faapei ona ou alofa atu ia te outou, ia fealofani foi outou.

“O le mea lea e iloa ai e tagata uma lava o o’u soo outou, pe afai ua outou fealofani.”

O le alofa mama o se manatu faavae ‘oa e mafai ona faigata ona faamatala ae e faigofie ona vaaia e i latou uma e ootia ai. Ua aoao mai e le Tala’i La’u Talalelei e faapea, “o le alofa mama, e pei o le faatuatua, e tau atu i le faatinoga.” Ioe, o le alofa mama e mafai ona faamatalaina o le “alofa i lona faatinoga.” O lea faamatalaga e maua ai le malamalamaaga tele i le faamatalaga aotele o le soifuaga o le Faaola—“sa femaliuai [o Ia] ma agalelei.”

I le avea ai ma soo o Iesu Keriso, e ao ona tatou saili e mulimulita’ia le ala o loo faatino ai e lo tatou Matai Lona alofa mama a’ia’i mo isi. E ui ina faaalia e le Faaola le alofa mama i le tele o taimi, ou te fia valaaulia ai le gauai i mamanu faapitoa e tolu o Lona alofa mama ua vaaia moni i Ona soo moni.

Muamua, na faaalia e le Faaola le alofa mama e ala i le agaalofa. I le taimi o Lana auaunaga ia sa Nifae, e pei ona tusia i le Tusi a Mamona, na valaaulia e le Alii ia tagata e toefoi i o latou aiga ma mafaufau loloto i mea sa Ia aoaoina ma ia saunia mo Lona toe taliu ane i le aso e sosoo ai. Ona ta’ua lea e le faamaumauga:

“Ua maligi o latou loimata, ma ua latou pulatoa mai ia te ia e peiseai ua latou mananao e ole mai ia te ia ia afio pea o ia faatasi ma i latou mo sina taimi umi teisi atu.

“Ma sa ia fetalai mai ia te i latou: Faauta, ua tumu lo’u loto i le agaalofa ia te outou.”

O le agaalofa o se vaega o le alofa mama e saili e tuuitiitia le mafatiaga. I le faatumuina ai i le mutimutialofa, sa faamalolo ai e le Alii tagata e mama’i ma mafatia. Mulimuli ane, sa Ia faamanuiaina a latou fanau a o afifio ifo agelu mai le lagi ma siosiomia ai i latou. Sa Ia faatinoina nei galuega faamomoiloto, alofa, ma le tele o isi, ona sa “mutimutivale Lona alofa.”

A o auauna ai o se faifeautalai talavou i Amerika i Saute, sa faapena foi ona faamanuiaina au mai le mutimutialofa o se uo pele. I se tasi afiafi a o alu atu le ma taavale ma la’u soa i le fale o le matou peresitene o le misiona, sa liliu faafuasei e se taulealea lana uila i luma o le taavale. Sa vave tele ona tupu ma sa le mafai ai ona ou alofia le faalavelave. O le mea e faanoanoa ai, sa maliu lenei taulealea i le aafiaga. Sa nutimomoia a’u ona o le maimau o lona soifua. I le fefe ma le faate’ia, a o lofituina au i le mea moni matautia faatoa tupu, sa ave a’u ma loka i le falepuipui. E lei i ai se taimi na ou lagona ai le fefe tele ma le tuuatoatasi. Sa faatumuina a’u i le atuatuvale ma le fefe faapea o le a faafalepuipuia au i aso uma o totoe o lo’u ola.

Sa faalogo se uso faifeautalai, o Elder Brian Kochever, e uiga i le faalavelave ma sa ootia o ia i le mutimutialofa. Sa sau o ia i le falepuipui ma aioi atu i taitai ina ia faataga o ia ma te nonofo i le sela, ina ia le tuuatoatasi ai na o a’u. O se vavega, sa latou malilie i ai. E oo mai lava i lenei aso, ou te lagonaina pea le lotofaafetai mo le faatinoga faaKeriso a lenei soo, lea na faatoafilemu ai, faamafanafana, ma faanā ai a’u i le taimi aupito sili ona mafatia o lo’u olaga. O lona mutimutialofa mama o se faailoga manino o lona avea ai ma soo. E pei ona matauina e Peresitene Nelson, “O se tasi o ala aupito faigofie e faailoa ai se soo moni o Iesu Keriso o le ala e taulima ai ma le agaalofa e lena tagata isi tagata.”

O se isi faataitaiga o le ala e faaali mai ai e le Faaola Lona alofa e ala lea i Lona matauina ma le auauna atu i manaoga lēmafaamatalaina o isi. O le tagata na pipili mo le 38 tausaga ae leai se tasi e fesoasoani ia te ia, sa faaatoaina o ia e le Alii ma fautuaina o ia e ola amiotonu. I le fafine na maua o mulilua, na Ia ofo atu i ai le faamoemoe ma le faamafanafanaga nai lo le ta’usalaina. Mo le tagata ma’i supa, lea sa tuutuu ifo mai le taualuga, sa ofo atu i ai e le Alii le faamagaloga o agasala, ae le na o le faamalologa o le tino.

Ina ua tofia au e avea o se epikopo, sa fai e le ma fanau laiti e toaono ia sauniga faamanatuga o se mea faigata mo lo’u toalua, o Cristin, o lē sa taulimaina toatasi i latou a o ou saofai i luga o le tulaga. Atonu tou te vaai faalemafaufau, sa tele ina lē migao le ma fanau. O le matauina o lea tulaga, sa amata nonofo ai ni tagata se toalua o la matou uarota, o John ma Debbie Benich, faatasi [ma lo’u toalua] i Aso Sa taitasi e fesoasoani ai. Sa faaauau lo la’ua agalelei mo le tele o tausaga, ma sa avea i la’ua ua pei o ni matua matutua sui i lo matou aiga. Faapei o le Alii, na matau e nei soo le manaoga lēmafaamatalaina ma galulue loa i le alofa—o se faailoga iloga o lo la’ua avea ai ma soo.

O le mea mulimuli, o le alofa atoatoa o le Faaola e taulai i le faaagavaaina o fanau uma a le Atua e faataunuu ai lo tatou gafatia paia ia mafai ai ona tatou “taumamafa i lana olataga, ma le mana o lana togiola.” A o tatou avea atili e faapei o lo tatou Matai, o le a faateleina faalenatura lo tatou manao e fesoasoani i o tatou uso ma tuafafine i luga o le ala o feagaiga.

Mo se faataitaiga, e mafai ona tatou siitia ma faauo ia i latou o e lagona le tiga po o le faagaloina, e fesoasoani ia i latou e fou i la tatou faapotopotoga ia lagona le talileleia, pe valaaulia uo tatou te tapuai faatasi i sauniga faamanatuga—atonu i le Eseta o loma nei. E le mafaitaulia auala e faamalosiau ai ma lagolago isi i lo latou agaigai i luma pe afai tatou te saili ma le loto i ai ma le agaga tatalo le fesoasoani mai le lagi ia maua mata e vaai ai ma se loto e lagonaina ai le ala e silasila ai ma lagona o Iesu Keriso mo i latou.

O le fesoasoani i isi i luga o le ala o feagaiga e ono manaomia ai le ituaiga o gaoioiga tulaga ese o le auaunaga. O se faataitaiga, i lo’u tofiga i le taimi nei i Filipaina, sa ou faalogo ai e uiga i le aiga o Agamata. Sa papatiso i latou i le 2023, ona latou faatulagaina ma le naunautai lea o se aso e faamauina ai o se aiga i le Malumalu lata ane o Urdaneta i Filipaina. Peitai, toeitiiti o’o i le aso na faatulagaina a le aiga, sa taia le itulagi i le tele o afa ma asiosio. Sa le mafai e Uso Agamata, o se faifaatoaga alaisa, ona toto ana laau i le taimi o afa matautia. Ina ua i’u ina mavae atu ia afa, sa manaomia ona ia vave totoina le alaisa a o susūpala le eleele i le vai—o tulaga lelei tele e totō ai. O le mea e faanoanoa ai, o le a tatau ona tolopo le malaga i le malumalu.

E toalua soo, o Elder ma Sister Cauilan, faatasi ai ma isi faifeautalai talavou mo auaunaga, sa faalogo i le mafatiaga o le aiga o Agamata, ma sa ofo atu e fesoasoani e ui ina leai so latou poto masani faafaatoaga. O le galulue ai i le mutigitigi o le la, sa latou fesoasoani ai e totō fatu, ma mafai ai e le au Agamata ona faamae’a la latou galuega ma auai i le faamauga i le malumalu e pei ona sa faatulagaina ai. Sa matauina e Elder Cauilan faapea sa susulu foliga o le “[au Agamata] a o matou vaaia i latou o laei papa’e i le maota o le Alii. O le olioli na matou lagonaina i le auauna atu i le toatasi, o se olioli e le mafaatusalia!”

Ua olioli nei le au Agamata i faamanuiaga mau’oa o le faamauina o se aiga e faavavau ona sa i ai ni nai soo sa faatumulia i le alofa mama—o se faailoga o lo latou avea ai ma soo—na naunau e fesoasoani i o latou uso ma tuafafine e agai i luga i lo latou ala o feagaiga.

Uso e ma tuafafine, o le avea ma soo o Iesu Keriso ua na o le pau lea o le ala e maua ai le fiafia tumau. O se ala e faatumulia i gaoioiga ma le loto i ai ma faamoemoega o le alofa i isi. E ui atonu e faigata le ala o le avea ma soo ma i ai luitau, e ui foi e i ai taimi tatou te ono tauivi ai ma toilalo, ae e mafai ona tatou maua le mafanafana aua e silafia e le Atua i tatou ma e naunau e fesoasoani mai i taimi uma tatou te taumafai ai. Ua faamanatu mai e Isaia ia i tatou e faapea… “o le Atua o le a taofi [lo tatou] lima taumatau ma faapea mai, Aua tou te fefefe; Ou te fesoasoani ia te outou.”

Faatasi ai ma lenei faamautinoaga mai lo tatou Tama o i le Lagi, ou te tatalo faatauanau ai ia tatou mulimuli i le valaaulia a Peresitene Nelson e faamuamua lo tatou avea ma soo. Ia tatou “tatalo atu i le Tama ma le malosi atoa o le loto, ina “ia faatumulia i lenei alofa, lea ua ia faaee mai i luga o i latou uma o e o soo moni o lona Alo, o Iesu Keriso; … a oo ai ina afio mai o ia o le a tatou faapei o ia.” aua ua tatou tauaveina se faailoga o le avea ma soo moni, o le “alofa mama lea … o le alofa lē ponā lea o Keriso.”

Ou te molimau atu o Iesu Keriso o lo tatou Faaola soifua, mamalu, o le Togiola, le Faaa’oa’o, ma le Uo. I le suafa o Iesu Keriso, amene.