O le Togiola a Iesu Keriso ua Saunia ai le Laveaiga Silisili

O le Togiola a Iesu Keriso ua saunia ai le laveaiga silisili mai tofotofoga tatou te feagai ai i lenei olaga. Na tofi a’u e Peresitene Russell M. Nelson e faapa’ia le Malumalu o Casper Wyoming i le tausi’usi’uga o le tausaga ua te’a. O se aafiaga loloto, ootia, ma faaleagaga. Na aumaia ai le taulaiga manino o le matafaioi e fai e malumalu i le laveaiina o fanau a le Atua e ala i le Togiola a le Faaola.

O siteki i le itulagi o le Malumalu o Casper Wyoming e aofia ai se vaega o le auala maouta na faaaoga e paioinia o le Au Paia o Aso e Gata ai i le va o le 1847 ma le 1868. I le sauniuni ai mo le faapaiaga o le malumalu, sa ou toe faitauina ai se vaega o le talafaasolopito o le alasopo i auvai o le Vaitafe Palate e latalata i Casper ma faaauau ai i le Aai o Sate Leki. O le alasopo sa avea ma se ala na ui ai le faitauselau afe o tagata malaga mai sisifo. O la’u faamamafa autu o paionia o le Au Paia o Aso e Gata Ai e silia ma le 60,000 na faimalaga i le alasopo lea.

O le toatele o o tatou paionia na o mai i taavaletoso, ae pe tusa o le 3,000 na sopoia i kamupani e sefulu o taavaletosolima. O le valu o nei kamupani o taavale tosolima na faataunuuina lenei alasopo logologoa ma ofoofogia le faamanuiaina ae toalaiti na maliliu. O kamupani taavale tosolima a Uili ma Matini o le 1856 sa ese mai ai.

Sa ou iloiloina tala o kamupani taavale tosolima a Uili ma Matini mai le taimi na amata ai tulaga ogaoga o le tau. Sa oo ina ou iloa lelei luitau na feagai ma i latou i le sopoiaina o le Vaitafe o Sweetwater, Martin‘s Cove, Rocky Ridge, ma Rock Creek Hollow.

I Le Va o Afā, tusia e Albin Veselka

Ou te le’i alu muamua i totonu o le Malumalu o Casper a o le’i faapaiaina. Ina ua ou ulufale atu i le faapaologa, na vave lava ona tosina atu la’u vaai i se uluai atavali o se taavaletosolima ua faaulutalaina I le Va o Afā. Sa manino lava e le’i faamoemoe e toe faaali mai e le atavali ia faalavelave na tutupu. A o ou sioa atu i ai, sa ou mafaufau, “E sa’o lenei atavali; o le toatele o paionia o taavaletosolima sa le’i oo i ni faalavelave.” Sa le mafai lo’u lagonaina e faapea uma lava le olaga i lona tulaga lautele. O nisi taimi tatou te i ai i le va o āfā ma o nisi taimi i le va o ao ma le lasusulu.

Faitotoa o le Lagi, tusia e Jim Wilcox

Ina ua ou liliu atu i le uluai atavali i luga o le puipui, ua faaulutalaina Faitotoa o le Lagi, sa ou iloa ai o lenei atavali matagofie o le taumafanafana o le mea sa ta’ua o le “Faitotoa o le Tiapolo,” faatasi ai ma le tafe malie atu i ai ma le manino o le Vaitafe o Sweetwater, na folasia mai ai le matagofie o le foafoaga a le Alii, e le na o ni luitau na feagai ma paionia i lena vaitau mata’utia o le malulu.

Ona ou vaai atu lea i luma, i tua atu o le laulau o pepa faataga, ma vaaia ai se atavali matagofie o le Faaola. O lenei vaaiga na vave lava ona faaosofia ai lagona lofituina o le lotofaafetai. I se lalolagi o le matagofie na’ua, o loo i ai foi ni luitau tetele. Pe a tatou liliu atu ia Iesu Keriso, le Faaola o le lalolagi, Na te laveaiina i tatou mai āfā o le olaga e ala i Lana Togiola e tusa ma le fuafuaga a Lona Tama.

Mo a’u, o le faapaologa o se tapenaga atoatoa mo potu o sauniga o le malumalu ia ua faatagaina ai i tatou e mauaina sauniga o le faaeaga, osia feagaiga paia, ma ia taliaina ma lagonaina atoatoa faamanuiaga o le Togiola a le Faaola. O le fuafuaga a le Tama mo le fiafia e faavae i le laveaiga togiola a le Faaola.

O le aafiaga o paionia ua maua ai e le Au Paia o Aso e Gata Ai se aganuu faasolopito tulagaese ma se talatuu mamana faaleagaga tuufaatasi. Mo nisi, o le malagaese atu na autausagā o fai i le mavae ai o le tutuliesea faamalosi mai Misuri ma Navu. Mo isi na amata i le mavae ai ona faasilasila e Peresitene Polika Iaga o le fuafuaga mo taavaletosolima, lea sa faamoemoe o le a taugofie atu mo femalagaaiga. O taavaletosolima sa taugofie atu i lo taavale solofanua ma povi.

Na saunoa se faifeautalai i Egelani, o Millen Atwood, ina ua faasilasila mai le fuafuaga o taavaletosolima, “Sa tafe mai e pei o se afi i laau matutu, ma sa osooso loto o le Au Paia matitiva i le olioli ma le fiafia.” E toatele na “tatalo ma anapopogi i lea aso ma lea aso, lea po ma lea po, ina ia latou maua le avanoa e tuufaatasia ai ma o latou uso ma tuafafine i mauga.”

O le toatele o le Au Paia o taavaletosolima na oo i faigata ae na alofia ni faafitauli tetele na tutupu. Ae o kamupani taavaletosolima e lua, le kamupani a Uili ma le kamupani a Matini, sa matelaina i le fia’a’ai, aafia i le tau malulu aisā, ma le toatele na maliliu.

O le toatele o nei tagata malaga na folau mai Liverpool, Egelani, ia Me o le 1856, i luga o vaa e lua. Sa latou taunuu i le nofoaga e fau ai taavaletosolima i le Aai o Iowa ia Iuni ma Iulai. E ui i lapataiga, ae sa tuai tele i lena vaitau ona malaga atu kamupani nei e lua i le Vanu o Sate Leki.

Na faato’a iloa e Peresitene Polika Iaga le tulaga faigata o nei kamupani i le aso 4 Oketopa, 1856. O le aso na sosoo ai na tu ai o ia i luma o le Au Paia i le Aai o Sate Leki ma saunoa atu, “O le toatele o o tatou uso ma tuafafine o loo i laufanua valevalenoa ma taavaletosolima, … ma e tatau ona aumai i latou iinei; e tatau ona tatou auina atu le fesoasoani ia i latou … a o le’i oo mai le taumalulu.”

Sa ia talosagaina epikopo e saunia ni vaega se 60 o asini, 12 taavaletoso pe sili atu, ma le 12 tane o falaoamata ma folafola atu, “O atu ia ma aumai na tagata o i laufanua valevalenoa i le taimi nei.”

O le aofaiga tuufaatasi o paionia i kamupani a Uili ma Matini pe tusa e 1,100. Pe 200 o nisi o nei Au Paia pele na maliliu i luga o le alasopo. Pe ana le seanoa le laveaiga faanatinati, se mea manu e toatele atu nisi e fano ai.

Sa amata āfā aisa toetoe lua vaiaso talu ona tuua e uluai tagata laveai le Aai o Sate Leki. O tala o tagata o kamupani a Uili ma Matini ua faamatala ai luitau faatauma’oi ina ua amata le āfā. O nei tala ua faaalia ai foi le olioli tele i le taimi na taunuu ai tagata laveai.

I le faamatalaina ai o le vaaiga i le taimi na taunuu ai, sa fai mai ai Mary Hurren, “Na tafe ifo loimata i alafau o alii, ae o tamaiti sa sisiva ma le olioli. I le taimi lava na mafai ai e tagata ona pulea o latou lagona, sa latou tootutuli uma ai i lalo i le kiona ma avatu le faafetai i le Atua.”

Lua aso mulimuli ane, sa ao ai ona malaga le kamupani a Uili i le vaega sili ona faigata o le alasopo, i le ā’ea lea o le Rocky Ridge i se āfā aisā. O le vaega mulimuli o i latou sa le’i taunuu i le tolauapiga seia oo i le 5:00 i le taeao na sosoo ai. E toasefulutolu tagata na maliliu ma sa tanumia i se fanuatanu e tasi.

I le aso 7 o Novema, sa latalata atu ai le kamupani a Uili i le Vanu o Sate Leki, ae i lena taeao, sa i ai pea ni maliu se toatolu. Lua aso mulimuli ane, sa taunuu ai le kamupani a Uili i Sate Leki, lea sa i ai se faafeiloaiga ofoofogia ma talileleia i totonu o maota ma laoa o le Au Paia.

I lena lava aso, e 325 maila i tua atu o loo i ai pea le kamupani a Matini i le alasopo, o loo faaauau pea ona mafatia i le malulu ma le le lava o meaai. I ni nai aso mulimuli ane, sa latou sopoia ai le Vaitafe o Sweetwater ma taunuu ai i le mea ua ta’ua nei o le Martin’s Cove, o se nofoaga sa latou faamoemoe e maua ai le puipuiga mai elemene. Sa fai mai se tasi o paionia, “O le vaitafe sili ona leaga lea na sopoiaina i le malaga.” O nisi o le au laveai—e pei o le tamā o lo’u tamā-matua, David Patten Kimball, sa na o le 17 tausaga le matua, faatasi ai ma ana uo talavou o, “George W. Grant, Allen Huntington, Stephen Taylor, ma Ira Nebeker—sa faaaluina le tele o itula i le malulu o le vai,” e fesoasoani ai ma le lotototoa i le kamupani ia sopoiaina le vaitafe o Sweetwater.

E ui sa tele se gauai atu i lenei mea na tupu, ae a o ou aoao atili e uiga i tagata laveai, sa ou iloa ai o i latou uma sa mulimuli i le perofeta ma sa faia ni matafaioi taua i le laveaiina o le Au Paia sa saisaitia. Sa totoa le au laveai uma, faapea ai foi ma le au malaga.

O le suesueina o le latou tala, ua ou talisapaia ai sootaga faapelepele ma le vaaiga mamao mo le faavavau sa i ai i tagata malaga. O John ma Maria Linford ma o la atalii e toatolu o ni tagata o le kamupani a Uili. Sa maliu John ae toe o nai itula taunuu atu le au laveai. Sa fai atu o ia ia Maria, ua ia fiafia lava na latou o atu i le malaga. “O le a ou le ola e āu i Sate Leki,” sa ia fai atu ai, “ae o le a tou oo i ai ma tamaiti, ma ou te le salamo lava i mea uma na tatou oo i ai pe afai e mafai ona tuputupu ae le ta fanau tama ma tausia o latou aiga i Siona.”

Sa saunia e Peresitene James E. Faust lenei aotelega matagofie: “I le taumafaiga totoa a paionia o taavaletosolima, ua tatou aoaoina ai se upumoni maoae. O tagata uma e tatau ona ui atu i le afi a le tunuauro, ma o mea le aoga ma le le taua i o tatou olaga e mafai ona liusuavaia ma tafiesea pei o le otaota ma faasusulu ai lo tatou faatuatua, mausali, ma malosi. E foliga mai ua tumu le ipu o le tiga, faanoanoa, ma e tele lava o le loto nutimomoia o tagata uma, e aofia ai i latou o e saili ma le naunautai e fai le mea sa’o ma ia faamaoni. Ae o le vaega lenei o le faamamaina ina ia masani ai i le Atua.”

I Lana Togiola ma le Toetu e mamanu ai le faavavau, na motusia ai e le Faaola “noataga o le oti, ma manumalo ai i le oti” mo tagata uma. Mo i latou ua salamo i agasala, ua Ia “tauaveina i ona lava luga o latou vaivaiga ma a latou solitulafono, ina ua ia togiolaina i latou, ma faamalieina manaoga o le faamasinotonu.”

A aunoa ma le Togiola, e le mafai ona tatou laveaiina i tatou lava mai le agasala ma le oti. E ui e mafai e le agasala ona faia se matafaioi taua i o tatou tofotofoga, ae o faigata o le olaga e faateteleina i mea sese, faaiuga leaga, amioga leaga a isi, ma le tele o mea e le mafai ona tatou puleaina.

Ua aoao mai leTala’i La’u Talalelei e faapea, “A o tatou faalagolago atu ia Iesu Keriso ma Lana Togiola, e mafai ona Ia fesoasoani ia i tatou ina ia tatou onosa’ia o tatou tofotofoga, ma’i, ma tiga. E mafai ona faatumulia i tatou i le olioli, filemu, ma le mafanafana. O mea uma e le talafeagai e uiga i le olaga e mafai ona faasa’oina e ala i le Togiola a Iesu Keriso.”

I lenei vaitau o le Eseta, o le tatou taulaiga ua tuu atu i le Faaola ma Lana taulaga togiola. Ua maua i le Togiola le faamoemoe ma le malamalama i se taimi e mo le toatele e foliga mai ua pogisa ma pagatia. Sa folafola mai e Peresitene Gordon B. Hinckley, “Pe a suesueina le talafaasolopito atoa, … e leai ma se mea e ofoofogia tele, mamalu tele, maoae tele e pei o lenei faatinoga o le alofatunoa.”

Ou te faasoa atu ni fautuaga se tolu lea ou te manatu e fitoitonu patino mo o tatou aso.

Muamua, aua ne’i vaai faatauvaa i le taua o le faia o mea tatou te mafaia e laveai ai isi mai luitau faaletino aemaise lava luitau faaleagaga.

Lua, ia talia ma le lotofaafetai le Togiola a le Faaola. E tatau ia i tatou uma ona tinoū e faaali le olioli ma le fiafia e tusa lava pe tatou te fetaia’i ma luitau o le olaga. O le tatou sini e tatau ai o le ola lea ma le faamoemoe i le itu lagilelei o le alatele. Ua ou matauina la’u soa pele, o Mary, o faia lenei mea i lona olaga atoa. Ou te talisapaia lana auala faagaeetia ma siitia e oo lava pe a ma feagai ma faafitauli i le tausaga atoa.

O la’u fautuaga lona tolu o le tuu ese lea o se taimi faifai pea e mafaufau ai ma le faamaoni i le Togiola a le Faaola. E anoanoai auala e faia ai lenei mea i a tatou matauga patino faalelotu. Paitai, o le auai i le lotu faamanatuga ma le taumamafa i le faamanatuga e faapitoa lava le taua.

E tutusa foi le taua ma le auai soo i se malumalu i nofoaga e mafai ai. E tuu mai e le malumalu se manatuaga faifai pea o le Togiola a le Faaola ma le mea na te faatoilaloina. Ma, e sili atu foi ona taua, o le auai i le malumalu e faatagaina ai i tatou e tuuina atu se laveaiga faaleagaga mo ē pele ia i tatou ua maliliu ma tuaa e mamao le sootaga.

Sa faamamafa mai e Peresitene Russell M. Nelson, i le konafesi talu ai lenei mataupu faavae ma faaopoopo mai, “O faamanuiaga [o le malumalu] … e fesoasoani e saunia ai se nuu o ē o le a fesoasoani e saunia le lalolagi mo le Afio Mai Faalua o le Alii!”

E le tatau lava ona galo ia i tatou osigataulaga ma faataitaiga a augatupulaga ua mavae, ae o lo tatou faamemelo, talisapaia, ma tapuaiga e tatau ona taulai atu i le Faaola o le lalolagi ma Lana taulaga togiola. Ou te molimau atu o le ki i le fuafuaga a le Tama mo le fiafia, o le Togiola na faataunuuina e le tatou Faaola, o Iesu Keriso. O loo soifua o Ia ma taitaia Lana Ekalesia. O le Togiola a Iesu Keriso ua saunia ai le laveaiga silisili mai tofotofoga tatou te feagai ai i lenei olaga. I le suafa o Iesu Keriso, amene.